O Mala e Ono na Sosoo Ai

Na ō atu Mose ma Arona e taʻu atu iā Farao le feʻau lenei a le Atua: ʻPe afai e te lē tuu mai loʻu nuu e ō, o le a ou faaoo atu lago taufeū i le atunuu.’ Na mumu atu le tele o lago taufeū i fale o tagata Aikupito mauʻoa ma matitiva. Na matuā tele lago taufeū i le atunuu atoa. Ae e leʻi iai ni lago taufeū i le nuu o Kosena lea sa nonofo ai tagata Isaraelu. Na amata atu i le mala lona fā lenei ona aafia ai na o tagata Aikupito. Na talosaga atu Farao: ʻIa ʻaiʻoi atu iā Ieova e aveese nei lago taufeū. O le a ou tuuina atu le nuu e ō.’ Ae ina ua aveese e Ieova na lago taufeū, na toe sui foʻi le mafaufau o Farao. Po o le a aʻoaʻoina ea e Farao se lesona?

Na faapea atu Ieova: ʻPe afai e lē tuu mai e Farao loʻu nuu e ō, o le a mamaʻi ma pepē manu a tagata Aikupito.’ I le aso na sosoo ai, na amata ona pepē manu a tagata Aikupito, ae e leʻi pepē manu a tagata Isaraelu. Ae na faauamaaa pea ma lē usiusitaʻi Farao, ma e leʻi tuuina atu tagata Isaraelu e ō. Ona faapea atu lea o Ieova iā Mose e toe alu iā Farao, ma togi faasalalau i luga o le ʻea le lefulefu. Ona avea ai lea o le lefulefu ma pauta na māfua ai maʻi sua matuā leaga, lea na aafia ai tagata uma o Aikupito ma a latou manu. Ae na musu pea Farao e tuu atu tagata Isaraelu e ō.

Na toe auina atu e Ieova Mose iā Farao ma Lana feʻau: ʻE te lē o manaʻo lava e tuu mai loʻu nuu e ō? I le aso a taeao, o le a toʻulu ai le uatoʻa i le laueleele atoa.’ O le mea lenā na tupu. I le aso na sosoo ai, na faaoo mai ai e Ieova le uatoʻa, faititili ma le afi. O se matagi pito sili ona malosi lea ua vaaia e tagata Aikupito. Na matuā faaleagaina laau ma meatotō a tagata Aikupito, ae e leʻi iai se mea na faaleagaina i le nuu o Kosena. Na fai atu Farao: ʻTalosaga atu iā Ieova e taofi lenei mala, ona tuu atu lea o outou e ō.’ Ae o le taimi lava na uma ai le uatoʻa ma timuga, na toe sui foʻi le mafaufau o Farao.

Ona fai atu lea o Mose: ʻO le a ʻaina e sē akerise so o se laau na totoe mai i mea na faaleagaina i le matagi.’ Na ʻaina e le faitau miliona o sē akerise mea uma sa totoe i fanua ma luga o laau. Na talosaga atu Farao: ʻIa ʻaiʻoi atu iā Ieova e aveese nei sē akerise.’ Ae ina ua aveese foʻi e Ieova sē akerise, sa faauamaaa pea Farao.

Na faapea atu Ieova iā Mose: ʻIa faaloaloa lou lima i le lagi.’ E leʻi umi ae pogisa atoa le lagi. E tolu aso na pogisa ai le atunuu atoa, ma e leʻi mafai e tagata Aikupito ona iloa se mea po o se tagata. E na o tagata Isaraelu lava sa malamalama o latou fale.

Na fai atu Farao iā Mose: ʻE mafai ona outou ō ma lou nuu, ae tuu na o a outou manu i inei.’ Na tali atu Mose: ʻE tatau ona ave a matou manu, ina ia mafai ona fai ai a matou taulaga i lo matou Atua.’ Na matuā ita Farao i lenei mea ma faapea atu ma le leotele: ʻIa alu ese loa mai iā te aʻu. O le taimi lava ou te toe vaai ai iā te oe, o le a ou fasiotia oe.’