Ia Mulimuli i le Faaaʻoaʻoga a Iesu ma ia Manatu Mamafa i Ē Matitiva
UA LOA ona iai le mativa ma faiga sauā e pei o le umi talu ona iai le tagata. E ui o le Tulafono a le Atua iā Isaraelu, sa puipuia ai ē matitiva ma faamāmā ai o latou puapuaga, ae sa lē usitaia lenā Tulafono. (Amosa 2:6) Na taʻusala e le perofeta o Esekielu le auala na feagai ai ma ē matitiva. Sa ia taʻua: “Ua faasauā lava tagata o le nuu, ma ua latou fao mea; ua latou faatigā i ē ua puapuagatia ma ē ua matitiva; ua latou faasauā foʻi i le tagata ese a e leʻi faamasinoina.”—Esekielu 22:29.
O le tulaga foʻi lenā a o iai Iesu i le lalolagi. Sa matuā leai se manatu mamafa o taʻitaʻi lotu i ē matitiva. Na taʻua taʻitaʻi lotu o ē “matapeʻapeʻa,” o ē na “faauma fale o fafine ua oti a latou tane,” ma o ē na sili atu ona manatu mamafa i le tausia o a latou uputuu, na i lo ē matutua ma manaʻomia se fesoasoani. (Luka 16:14; 20:47; Mataio 15:5, 6) O se mea e mataʻina ai le faataoto a Iesu i le Samaria agalelei, auā ina ua vaai se ositaulaga ma se sa Levī i le tamāloa na manuʻa, na ui saʻo ane i le isi itu o le ala na i lo le liliu e fesoasoani iā te ia.—Luka 10:30-37.
Na Manatu Mamafa Iesu i Ē Matitiva
Ua faaalia i tala a le ʻau Faievagelia i le soifuaga o Iesu, sa ia silafia lelei tulaga faigatā o ē matitiva, ma sa ia tigā alofa foʻi i o latou manaʻoga. E ui sa soifua Iesu i le lagi, ae sa ia faamaulalo iā te ia, avea ma tagata, ma ‘faamativaina ona o i tatou.’ (2 Korinito 8:9) Ina ua silafia e Iesu le motu o tagata, “ona mutimuti vale ai lea o lona alofa iā te i latou, ona ua lailoa i latou ma tuulafoaʻiina, e pei o mamoe e leai so latou leoleo.” (Mataio 9:36) Ua faaalia i le tala i le fafine mativa ua oti lana tane, sa faagaeetia Iesu, e lē ona na lafo e le ʻaumauʻoa nisi mea “mai a latou mea ua tele,” ae ona o le meaalofa itiiti a le fafine mativa. Na pāʻia le finagalo o Iesu i le mea na ia faia, auā “ua lafo e ia ana mea uma e ola ai sa iā te ia.”—Luka 21:4.
E lē gata sa alofa mutimutivale Iesu i ē matitiva, ae sa ia naunau foʻi i o latou manaʻoga. Sa iai sa latou vaegātupe faitele ma ona aposetolo na foaʻi atu i ē matitiva i Isaraelu. (Mataio 26:6-9; Ioane 12:5-8; 13:29) Na faalaeiau e Iesu ē na fia avea ma ona soo, ina ia malamalama i lo latou tiutefai o le fesoasoani i ē matitiva. Na ia fetalai i se alii mauʻoa: “Ia e faatau atu i au mea uma, ma ia e tufatufaina i ē matitiva, ona iā te oe lea o le faulaʻigāoloa i le lagi; i le e sau, ma mulimuli mai iā te aʻu.” O le lē loto i ai o le alii e foaʻi ana ʻoa, na faaalia ai sa sili lona manaʻo i ana ʻoa na i lo le alofa i le Atua ma tuaoi. O le iʻuga, e leʻi agavaa e avea ma soo o Iesu.—Luka 18:22, 23.
E Manatu Mamafa Soo o Keriso i Ē Matitiva
Ina ua maliu Iesu, sa manatu mamafa pea ona soo ma isi na mulimuli iā te ia i ē matitiva. Pe tusa i le 49 T.A., na feiloaʻi ai Paulo iā Iakopo, Peteru, ma Ioane, ma latou talanoaina le galuega na tofia ai o ia e le Alii o Iesu, o le talaʻia o le tala lelei. Na latou ioe e ao ona ō Paulo ma Panapa i “nuu ese,” ia taulaʻi la laʻua talaʻiga i tagata o Nuu Ese. Ae na faalaeiau e Iakopo ma ana aumea Paulo ma Panapa ina ia “manatua o ē matitiva.” O le mea lenā sa “naunau” Paulo e fai.—Kalatia 2:7-10.
I le taimi o le nofoaiga a le emeperoa o Kalaotia, sa iai se oge tele i vaega eseese o le malo o Roma. I le tali atu a Kerisiano i Anetioka, na latou ‘filifili ai taʻitoʻatasi ia faatatau i mea ua manuia ai, e avatu se alofa i le ʻau uso o nonofo i Iutaia; ua fai foʻi e i latou, ua momoli e Panapa ma Saulo i toeaina.’—Galuega 11:28-30.
Ua iloa foʻi e Kerisiano moni i aso nei, e ao ona manatu mamafa soo o Iesu i ē matitiva ma manaʻomia se fesoasoani, aemaise lava i uso talitonu. (Kalatia 6:10) O lea, latou te manatu mamafa moni i manaʻoga faaletino o ē ua aveesea mea e manaʻomia i o latou olaga. O se faaaʻoaʻoga i le 1998, na faaleagaina ai le tele o le itu i mātū i sasaʻe o Pasili i se lāmala mataʻutia. Na faatamaʻia e le lāmala le araisa, pi, ma togāsana, lea na iʻu i se oge sili ona leaga talu mai le 15 tausaga muamua atu. I nisi nofoaga, sa lē lava le vaitaumafa. Na vave ona faamaopoopo e Molimau a Ieova i isi vaega o le atunuu komiti mo fesoasoani laveaʻi, ma e leʻi pine ae maua le anoanoaʻi o taumafa, ma na latou totogia le tupe e auina atu ai na fesoasoani.
Na tusi mai Molimau na saunia nei fesoasoani: “Ua matou fiafia tele ua mafai ona fesoasoani i o matou uso, aemaise ua matou mautinoa ua faafiafia ai le finagalo o Ieova. E lē taitai galo iā i matou upu o loo i le Iakopo 2:15, 16.” Ua faapea mai: “Afai ua lē ofu se uso po o se tuafafine, ua leai foʻi sana mea e ʻai i lea aso ma lea aso, a fai atu so outou iā te i latou, ‘Inā ō ia outou ma le manuia, ia māfanafana, ma ia maoona,’ a ua lē foaʻi atu iā te i latou ni mea e tatau i le tino, se ā lona aogā?”
I se tasi o faapotopotoga a Molimau a Ieova i le taulaga o São Paulo, e tauivi ai se Molimau lotomaulalo ma maelega o lē e mativa faaletino, ina ia maua ni mea e tausia ai o ia. Ua ia taʻua: “E ui o loo oʻu ola i se olaga mativa, ae ua aumaia e le feʻau o le Tusi Paia se faamoemoe moni i loʻu olaga. Ou te lē iloa po o le ā se mea e tupu iā te aʻu, pe ana ou lē maua le fesoasoani mai aʻu aumea Molimau.” I se taimi e leʻi leva atu, na manaʻomia ai ona faia se taotoga o lenei fafine Kerisiano, ae sa lē mafai ona ia totogia le pili o le falemaʻi. O lea, na totogi e uso ma tuafāfine Kerisiano o le faapotopotoga le taotoga. O loo avatu e Kerisiano moni i le lalolagi aoao, le fesoasoani i uso talitonu o loo latou manaʻomia.
Po o le ā lava le faamāfanafanaloto o nei tala, ae manino mai, e lē mafai e nei taumafaiga faamaoni ona aveesea ai le mativa. E tusa pe na taulau malo malolosi ma faalapotopotoga tetele e aumaia fesoasoani laveaʻi, ae e lē o mafai ai ona soloiesea le faafitauli ua loa ona iai, o le mativa. Ua lāgā ai la le fesili, O le ā le vaifofō sili o le mativa ma isi faafitauli ia ua aafia ai tagata?
Saunia e Aʻoaʻoga o le Tusi Paia le Fesoasoani Tumau
Ua taʻua i tala a Evagelia, sa masani ona faia e Iesu galuega lelei mo ē matitiva po o ē na iai isi manaʻoga. (Mataio 14:14-21) Ae o le ā le galuega sili ona tāua sa ia faamuamua? I se tasi o mea na tupu, ina ua uma ona fesoasoani Iesu i ē sa manaʻomia le fesoasoani, na ia fetalai atu i ona soo: “Inā tatou ō atu ia i aai e latalata mai, ia ou talaʻi atu i ai le tala lelei.” Aiseā na taofia ai e Iesu lana galuega mo ē mamaʻi ma manaʻomia se fesoasoani, ina ia faaauau ai lana talaʻiga? Na ia faamatala i lona fetalai: “Auā o le mea lea [lona uiga, ia talaʻi] na ou sau ai.” (Mareko 1:38, 39; Luka 4:43) E ui na tāua iā Iesu le faia o galuega lelei mo ē manaʻomia le fesoasoani, ae o lana uluaʻi galuega le talaʻia o le Malo o le Atua.—Mareko 1:14.
Ona ua timaʻi e le Tusi Paia Kerisiano ina ia “mulimuli atu i tulagāaao” o Iesu, ua iai la iā i latou i aso nei le taʻiala manino, pe a faatulaga mea e ao ona faamuamua i a latou taumafaiga e fesoasoani i isi. (1 Peteru 2:21) I le pei o Iesu, latou te fesoasoani i ē o loo manaʻomia le fesoasoani. Ae i le pei foʻi o Iesu, latou te faamuamua le galuega e sili ona tāua, o le aʻoaʻo o le feʻau o le Tusi Paia e uiga i le tala lelei o le Malo o le Atua. (Mataio 5:14-16; 24:14; 28:19, 20) Ae aiseā e ao ai ona faamuamua le talaʻia o le feʻau o i le Afioga a le Atua, na i lo isi galuega ia e fesoasoani ai i isi?
Ua faataʻitaʻia e tala o mea moni ua tutupu i le lalolagi e faapea, pe a malamalama tagata ma mulimuli i fautuaga aogā o le Tusi Paia, o le a sili atu ona lava tā oso i latou e fesagaʻia faafitauli o le olaga i aso faisoo, lea e aofia ai le mativa. E lē gata i lea, o le feʻau o le Tusi Paia i le Malo o le Atua lea o loo talaʻia e Molimau a Ieova i aso nei, ua avatua i tagata se faamoemoe mo le lumanaʻi, lea ua aogā ai le ola i le olaga e oo lava i tulaga e sili ona faigatā. (1 Timoteo 4:8) O le ā lenā faamoemoe?
Ua faamautinoa mai i le Afioga a le Atua lo tatou lumanaʻi: “E faatalitali i tatou i le lagi fou ma le lalolagi fou, pei o lana [le Atua] na folafola mai, e mau ai lē amiotonu.” (2 Peteru 3:13) Pe a taʻua i le Tusi Paia le “lalolagi,” e faasino atu i nisi taimi i ē o loo nonofo i le lalolagi. (Kenese 11:1) O le “lalolagi fou” amiotonu la lea na folafola mai o le a iai, o se sosaiete o tagata o ē ua finagalo malie i ai le Atua. Ua folafola atili mai i le Afioga a le Atua e faapea i le pulega a Keriso, o le a maua e i latou ua finagalo malie i ai le Atua le taui o le ola e faavavau, ma o le a soifua i ni olaga faamalieina i se lalolagi parataiso. (Mareko 10:30) O le a maua e tagata uma e aofia ai ma ē matitiva lenā lumanaʻi matagofie. I lenā “lalolagi fou,” o le a foʻia e faavavau le faafitauli o le mativa.
[Pusa/Ata i le itulau 7]
O LE A FAAPEFEA ONA ‘LAVEAʻI E IESU LĒ MATIVA’?—Salamo 72:12
FAAMASINOTONU: “E faamasino e ia o ē puapuaga o le nuu; e faaolaina foʻi e ia le fanau a ē ua matitiva, a e faamomomoina e ia o lē ua faasauā.” (Salamo 72:4) I le taimi o le pulega a Keriso i le lalolagi, o le a iai le faamasinotonu mo tagata uma. O le a lē toe iai ni faiga piʻopiʻo, o se mala lea ua matitiva ai isi atunuu ia e ono tamaoaiga.
FILEMU: “O lana nofoaiga e tupu olaola mai ai lē ua amiotonu; e manuia tele ai, seʻia leai se masina.” (Salamo 72:7) O le tele o le mativa i le lalolagi e māfua mai i feteenaʻiga ma faigātaua a tagata. O le a aumaia e Keriso le filemu lelei atoatoa i le lalolagi, lea o le a aveesea ai se tasi o pogai autū o le mativa.
ALOFA: “E alofa atu ia i lē ua vaivai ma lē ua mativa; e faaola lava e ia ē ua matitiva. E laveaʻi o ia iā i latou ai le sauā ma le faamalō; e silisili foʻi o latou toto i lona manatu.” (Salamo 72:12-14) O le a avea ē vaivai, matitiva ma sauāina, ma vaega o le aiga fiafia ua autasia i le taʻitaʻiga a le Tupu o Iesu Keriso.
TAMAOAIGA: “O le a anoanoaʻi saito i le lalolagi.” (Salamo 72:16, NW ) I le taimi o le pulega a Keriso, o le a tele le tamaoaiga faaletino e faamalie ai tagata uma. O le a lē toe mafatia tagata ona o le lē lava o taumafa ma oge, ia e māfua ai pea le mativa i aso nei.
[Ata i le itulau 4, 5]
Na naunau Iesu i manaʻoga o ē matitiva
[Ata i le itulau 6]
Ua aumaia e le feʻau o le Tusi Paia le faamoemoe moni