Ofo Atu le Faamoemoe i Ē Matitiva
1 Na faaalia e Iesu le naunau i ē matitiva. Na iai taimi na ia fai ai vavega e fesoasoani atu ai faaletino ma faamālōlō i ē mamaʻi, ae sa ia uaʻi faapitoa atu i le folafolaina o le “tala lelei” i ē matitiva. (Mata. 11:5) O loo maua e ē matitiva ma isi tagata ia aogā mai le auaunaga faa-Kerisiano.—Mata. 24:14; 28:19, 20.
2 Se Faamoemoe Moni: E masani ona folafola e faifeʻau a lotu i ē matitiva, o le a tele faamanuiaga e latou te maua pe a tele le foaʻi i le lotu. Na i lo lea, o loo aʻoaʻo mai le Tusi Paia, ua na o le Malo o le Atua o le a faaiʻuina le mativa ma fofō faafitauli uma o tagata. (Sala. 9:18; 145:16; Isa. 65:21-23) O le faaali atu i ē matitiva o le mea moni lea o loo aʻoaʻoina e le Tusi Paia, ua tatou ofo atu ai le faamoemoe ma le fesoasoani iā i latou ina ia faamalieina o latou manaʻoga faaleagaga.—Mata. 5:3.
3 Na vaai maulalo le ʻau Faresaio o vaitaimi o Iesu i ē matitiva, i le faaigoa o i latou o ʻam-ha·’aʹrets, po o “tagata o le laueleele.” Peitaʻi, na silasila Iesu i o “latou toto,” po o latou ola, o se mea “silisili” ona tāua. (Sala. 72:13, 14) E mafai ona tatou faataʻitaʻi iā Iesu ma “āva” i ē matitiva, e ala i le agalelei atu ma malamalama i o latou faafitauli. (Faata. 14:31) Aua neʻi o tatou taʻu faatauvaa pe faaalia le uiga o le musuā, e talaʻi atu i nofoaga po o nuu e nonofo ai tagata matitiva. O le toʻatele o ē o loo tali mai i le feʻau o le Malo o ē matitiva.
4 Fesoasoani Nei Loa: O le aʻoaʻo atu o taʻiala o le Tusi Paia i ē matitiva i le oganuu, o le a fesoasoani e faaitiitia ai āuga o le mativa i le taimi nei. Mo se faaaʻoaʻoga, e taʻusalaina e le Tusi Paia le onā, taalo tupe, paiē, le taumafa tapaa, ma isi faiga ia e oo atu ai i le mativa. (Faata. 6:10, 11; 23:21; 2 Kori. 7:1; Efe. 5:5) O loo faalaeiauina e le Tusi Paia le faamaoni ma le galue ma se “loto [atoa],” o uiga na o loo manaʻomia i tagata faigaluega. (Kolo. 3:22, 23; Epe. 13:18) I se tasi o saʻiliʻiliga na faia, e toetoe lava o pule uma e faasilisilia le faamaoni o tagata faigaluega.
5 E tigāalofa Ieova i mafatiaga o ē matitiva. Ua toeitiiti ona laveaʻiina lea e Iesu Keriso “lē mativa i lona alaga mai.” (Sala. 72:12) A o leʻi oo i lenā taimi, o loo iā i tatou le faaeaga o le faamāfanafana o isi, e aofia ai ma ē matitiva, i le faamoemoe o loo i le Tusi Paia.