O Tigā Faagalogatā

TALU ai nei lava, na manaʻo ai se tagata suʻesuʻe e fia iloa po o ā ni faalogona o ē faavauvau ina ua mavae se taimi talu ona maliu sē e pele. Sa ia tuu atu se lisi o fesili i ni mātua se toʻavalu o ē ua maliliu a latou fanau i nai tausaga ua mavae. E lē o mātua uma na tali ane. Na faamatala ane e se tamā e igoa iā Viali, o lē na maliu lona atalii i le lima tausaga ua mavae e faapea, o loo faigatā pea iā te ia ona talanoa e faatatau i lona atalii.a

O nei faanoanoaga e faagalogatā i mātua. Ua sefulu tausaga talu ona maliu le atalii o Viliamu e 18 ona tausaga ina ua malemo. Na tusi mai Viliamu: “Ou te lē iloa pe mafai ona galo o ia iā te aʻu.” Na tusi Lusi ua lima nei tausaga talu ona maliu lana tama ona o se maʻi oso: “Sa ou lē mautonu pe moni ea ua maliu si aʻu tama. Peitaʻi pagā le tigā o le iloaina ua maliu moni o ia ma o le a ma lē toe mafuta. Ua lima nei tausaga talu ona maliu si aʻu tama ma o nisi taimi, e fai ma ou tagi ona ua motusia le ma mafutaga.”

Aiseā e lagona ai pea e mātua faavauvau, e pei o Viali, Viliamu, ma Lusi, lea tigā faagalogatā? Seʻi o tatou tilofaʻia nisi o māfuaaga.

Aiseā ua Tele ai Faanoanoaga?

Pe a fanau mai se pepe i totonu o se aiga, e oo ifo i mātua faalogona ia e lē taitai ona maua i se isi lava faiā faaletagata. O le tau lava ina opo atu i si a la tama, le vaai atu i ai a o moe, po o le vaai atu i si ana ʻataʻata mai, e aumaia ai iā i laʻua le fiafiaga ma le lagona faamalie loto. E faapelepele mātua alolofa i a latou fanau. E latou te aʻoaʻo i ai ina ia amio lelei ma faaaloalo. (1 Tesalonia 2:7, 11) A o amata ona tutupu aʻe fanau ma tali mai i nei taumafaiga, e lagona e mātua le mitamita ma amata ai ona iai ni faamoemoega mo i latou.

E galulue mamafa mātua alolofa mo le saunia o manaʻoga o a latou fanau. Atonu latou te teua tupe po o meafaitino ina ia mafai ona fesoasoani i a latou fanau e amata ai ni o latou lava aiga i le lumanaʻi. (2 Korinito 12:14) E tasi lava le faamoemoe o le faaaluina e mātua o le tele o faalogona, taimi, taumafaiga, ma tupe, o le mananaʻo e tausia a latou fanau ia ola ae lē ia oti. Pe a maliu la se tamaitiiti, ona lē māeʻa ai lea o le tiute o mātua i le tausia o ia, ma ua lē taulau uma ai o la faamoemoega mo ia. Ua motusia le alofa māfana ma lagona faapelepele ia sa faasoa atu e mātua i fanau, ona o le oti. Ua lē atoa lo la fiafia talu ona toesea se tasi o le fanau. O le a faagalogatā i mātua nei tigā matuitui.

Ua faamaonia e le Tusi Paia, e onosaia e mātua faavauvau le tigā e faagalogatā. Ua taʻua i le Tusi Paia ina ua faalogo le tamā o Iakopo ua fasiotia lona atalii o Iosefa: “Ona saei lea e Iakopo ona ofu, ua ia lavalava i le ie talatala, ma ua faanoanoa pea ia i aso e tele ona o lona atalii. Ua tutū i luga ona atalii uma ma ona afafine uma e faamāfanafana iā te ia; a e lē mafai ona faamāfanafanaina o ia, ua fai ane, Auā ou te alu ifo ma le faanoanoa i le tuugamau i loʻu atalii.” Sa faaauau ona faanoanoa Iakopo i lona atalii, o lē na manatu i ai ua oti. (Kenese 37:34, 35; 42:36-38) O le isi faaaʻoaʻoga a le Tusi Paia, o se fafine faatuatua e igoa iā Naomi, o lē na maliliu lana fanau tama e toʻalua. Ona o lona faanoanoa tele, na ia manaʻo ai e suia lona igoa o Naomi, lea e faauiga, “O loʻu Fiafia,” ae sui iā Mara, o lona uiga, o le “Tigā.”—Ruta 1:3-5, 20, 21.

Peitaʻi, e lē na o le tigā e fesagaʻia e mātua, o loo taʻua i le Tusi Paia. Auā o loo aumai ai foʻi auala e faamalosia ai e Ieova i latou o loo faanoanoa. I le mataupu o loo sosoo mai, o le a tatou iloiloina ai nisi o auala e saunia ai e le Atua faamāfanafanaga mo ē faavauvau.

[Faamatalaga pito i lalo]