Ia Mafuta Atu i le Atua
O le Leoleo Mamoe Alofa
PE E iai se taimi na e fesili ai faapea, ‘O manatu mai ea le Atua iā te aʻu?’ Afai o loo e fesili faapena, e lē na o oe ua lāgā lenā fesili. O le toʻatele o i tatou e fesagaʻi ma le tele o luʻi ma faafitauli, e tatou te mafaufau ai ailoga o manatu mai Lē na faia mea uma iā i tatou. E ao ona tatou iloa po o alofa mai Ieova le Atua i tagata taʻitoʻatasi. Na taʻu mai e lē na iloa lelei Ieova, o Iesu, se faataʻitaʻiga e maua ai se tali fiafia.
Ina ua faatusaina e Iesu le tausiga a Ieova i le olaga o se leoleo mamoe alofa, na ia faapea mai: “Afai e iai ni mamoe e selau a se tagata ma ua sē le tasi, pe na te lē tuua ea le iva sefulu ma le iva i le mauga, ae alu atu e saʻili mai le tasi ua sē? A oo ina maua, ou te fai atu iā te outou, e sili atu lona olioli i lea mamoe, nai lo le isi iva sefulu ma le iva e leʻi sē. E faapena foʻi loʻu Tamā o i le lagi, e lē finagalo e faaumatia se tasi o ē itiiti.” (Mataio 18:12-14) Seʻi o tatou iloiloina le auala na faamatala ai e Iesu le alofa o Ieova i Ana auauna uma.
E iloa e le leoleo mamoe lona tiute tauave, o le vaaia lea o ana mamoe taʻitasi. Pe a alu ese se mamoe mai le lafu, e na te iloa lelei le mamoe ua taasē. E na te iloa igoa uma na ia faaigoa ai ana mamoe. (Ioane 10:3) E saʻili pea e le leoleo mamoe alofa le mamoe ua leiloa ina ia toe aumai i le lafu. Ae e na te lē tuulafoaʻia isi mamoe e iva sefulu iva i se tulaga lamatia, pe a alu e saʻili lenā mamoe. E masani ona nonofo faatasi leoleo mamoe ma filo faatasi a latou mamoe.a O lea e tuu ai e le leoleo mamoe lea e alu e suʻe lana mamoe ua leiloa, ia isi mamoe e vaai e ana uō leoleo mamoe mo sina taimi. E matuā fiafia le leoleo mamoe pe a maua atu le mamoe, e lē o manuʻa. E na te amoina le mamoe i ona tauau ma toe foʻi atu ina ia vaaia ma leoleoina le lafu.—Luka 15:5, 6.
E tusa ai ma le faataʻitaʻiga, na taʻua ai e Iesu e leʻi finagalo le Atua e “faaumatia se tasi o ē itiiti.” Muamua atu i lenā, na fautuaina e Iesu ona soo e uiga i le faatausuai i “sē itiiti ua faatuatua iā te [ia].” (Mataio 18:6) O le ā la le mea ua tatou aʻoaʻoina mai le faataʻitaʻiga a Iesu e faatatau iā Ieova? Ioe, o Ieova o le Leoleo Mamoe e matuā alofa i ana mamoe, e aofia ai “ē itiiti,” o i latou ia e foliga mai e manatu faatauvaa i ai le lalolagi. E matuā faatāua ma faapelepele e le Atua ona tagata tapuaʻi.
Afai e te manaʻo e fia mautinoa e faatāua oe e le Atua, e lelei ona aʻoaʻo atili e uiga i le Leoleo Mamoe Sili o Ieova le Atua, ma le auala e mafuta atu ai iā te ia. O le faia faapea, o le a tatou maua ai le mautinoa lea na iai foʻi i le aposetolo o Peteru, e lē taumatea sa ia maua mai iā Iesu lava ia i le faataʻitaʻiga o le mamoe na leiloa. Auā na tusi mulimuli ane Peteru: “Ia taʻu atu o outou popolega uma iā [Ieova], auā o loo manatu mamafa mai o ia iā te outou.”—1 Peteru 5:7.
[Faaopoopoga i lalo]
a E faigofie le toe tuueseeseina o lafu mamoe, auā e faalogo mamoe i le eseesega o valaau a latou leoleo mamoe.—Ioane 10:4.