Aiseā e Tatalo Atu ai i le Suafa o Iesu?

E MASANI ona aʻoaʻo Iesu e faatatau i le tatalo. I ona vaitaimi, na tatalo taʻitaʻi lotu Iutaia i “magāala o ala tetele.” Aiseā? “Ina ia iloa ai i latou e tagata.” E manino mai lo latou mananaʻo e amanaʻia a latou galuega lelei i lotu. E toʻatele e faia ni tatalo uumi, e fai pea lava upu masani, ma faapea ina ia faafofogaina tatalo e manaʻomia le “tele o upu.” (Mataio 6:5-8) Na faapea mai Iesu e lē aogā nei faiga, ma o loo ia fesoasoani i tagata loto faamaoni e ʻalofia lenei faiga pe a tatalo. O lea la, e tele atu ana mea na fai nai lo le aʻoaʻo e tatalo.

Na aʻoaʻo e Iesu tagata e tatau ona atagia i a latou tatalo ia faanaunauga e faapaiaina ai le suafa o le Atua, ia oo mai Lona Malo, ma ia faia Lona finagalo. Na aʻoaʻo foʻi e Iesu le talafeagai o le talosaga atu i le Atua mo se fesoasoani i mataupu e patino i le tagata lava ia. (Mataio 6:9-13; Luka 11:2-4) I le faaaogāina e Iesu o talafaatusa, na ia faasino mai ai le tāua o le tatalo faifai pea, i le faatuatua ma le lotomaulalo ina ia faafofogaina ai a tatou tatalo. (Luka 11:5-13; 18:1-14) Ma na avea o ia ma faaaʻoaʻo o mea na ia aʻoaʻoina.—Mataio 14:23; Mareko 1:35.

E mautinoa le fesoasoani o nei faatonuga i soo o Iesu e faaleleia ai a latou tatalo. Peitaʻi, na faatalitali Iesu i lona pō mulimuli i luga o le lalolagi ina ia aʻoaʻoina ona soo i se lesona e sili ona tāua e faatatau i le tatalo.

“Le Suiga i le Auala e Tatalo Ai”

Na faaalu e Iesu lona taimi mulimuli e faalaeiauina ai ona aposetolo faamaoni. E talafeagai lelei le taimi e faailoa atu ai iā i latou se mea fou. Na fetalai Iesu: “O aʻu o le ala, o le upu moni ma le ola. E leai se tasi e alu atu i le Tamā pe a lē ui mai iā te aʻu.” Na ia toe avatu se folafolaga mautinoa: “E so o se mea foʻi tou te talosaga atu ai i loʻu igoa, ou te faia lava, ina ia faamamaluina le Tamā ona o le Atalii. Afai tou te talosaga atu i se mea i loʻu igoa, ou te faia lava.” A o lata i le iʻuga o la latou talanoaga, na ia faapea mai: “E oo mai lava i le taimi nei, e leʻi talosaga atu outou i se mea e tasi i loʻu igoa. A ia talosaga atu, ona outou maua ai lea, ina ia faaatoatoaina ai lo outou olioli.”—Ioane 14:6, 13, 14; 16:24.

E tāua tele nei fetalaiga. Na faapea mai se lomifefiloi o le Tusi Paia, “o le suiga lea o le talafaasolopito o tatalo.” E leʻi faapea Iesu e tatau ona uaʻi atu tatalo iā te ia nai lo le Atua. Ae na ia tatalaina se auala fou e fesootaʻi atu ai iā Ieova le Atua.

O le mea moni, o loo faafofoga mai pea le Atua i tatalo a ana auauna faamaoni. (1 Samuelu 1:9-19; Salamo 65:2) Peitaʻi, mai le taimi na faavae ai le feagaiga a tagata Isaraelu ma le Atua, o i latou e mananaʻo e faafofogaina a latou tatalo, e tatau ona latou amanaʻia o Isaraelu le nuu tofia o le Atua. Mulimuli ane, mai le taimi o Solomona, sa tatau ona latou amanaʻia o le malumalu o le nofoaga lea ua tofia e fai ai taulaga. (Teuteronome 9:29; 2 Nofoaiga Tupu 6:32, 33) Peitaʻi, o lea ituaiga o tapuaʻiga e lē tumau. E pei ona tusia e le aposetolo o Paulo, na tuuina le Tulafono iā Isaraelu ma o taulaga na faia i le malumalu o ‘ata ia o mea lelei i le lumanaʻi ae lē o le tino mai o mea.’ (Eperu 10:1, 2) O le a suia e mea moni nei ata. (Kolose 2:17) Talu mai le 33 T.A., e leʻi toe faalagolago le faiā a se tasi ma Ieova e ala i le tausia o le Tulafono a Mose. Ae e faalagolago i le gauaʻi i lē na faasino i ai le Tulafono, o Keriso Iesu.—Ioane 15:14-16; Kalatia 3:24, 25.

Le Suafa e “Sili i Isi Igoa Uma”

Na faailoa mai e Iesu se faavae sili e faalatalata atu ai iā Ieova. Na ia faailoa mai o ia o se uō e māfana toe malosi, o lē tatalaina mai le avanoa e faafofogaina ai e le Atua a tatou tatalo. Aiseā na mafai ai ona avea Iesu ma o tatou sui?

Ona tatou te agasala uma, e leai se galuega po o se taulaga tatou te faia e mafai ona tuusaunoa ai i tatou mai le agasala, po o le maua ai foʻi o se faiā ma le Atua paia, o Ieova. (Roma 3:20, 24; Eperu 1:3, 4) Peitaʻi, na ofo atu e Iesu lona ola lelei atoatoa e totogi ai agasala a tagata uma o loo toe fia lelei ma le Atua. (Roma 5:12, 18, 19) O lea la, o i latou uma e mananaʻo e iai se faiā lelei ma Ieova ma fiafia e ‘tautala atu ma le lē taofiofia’ i le Atua, e manaʻomia ona latou faatuatua i le taulaga togiola a Iesu, ma tatalo e ala atu i lona suafa.—Efeso 3:11, 12.

Pe a tatou tatalo atu i le suafa o Iesu, o loo faailoa atu ai lo tatou faatuatua i le vaega a Iesu auā le faataunuuina o le finagalo o le Atua i ni vala se tolu: (1) O ia o le “Tamaʻi Mamoe a le Atua,” ma o lona togiola ua faataatiaina ai le faavae mo le faamagaloina o agasala. (2) Na faatūina o ia e Ieova ma o loo avea nei o ia ma “ositaulaga sili” i le puleaina o faamanuiaga o le togiola. (3) Ua na o ia “o le ala” e auala atu ai tatalo iā Ieova.—Ioane 1:29; 14:6; Eperu 4:14, 15.

E faamamaluina Iesu pe a tatalo atu e ala i lona suafa. E talafeagai lenā mamalu, auā e finagalo Ieova “ina ia tootutuli tulivae uma lava i le suafa o Iesu . . . , ma ia taʻutaʻu atu e laulaufaiva uma o Iesu Keriso o le Alii, ina ia faamamaluina ai le Atua le Tamā.” (Filipi 2:10, 11) E tāua atu i lenā, e faamamaluina ai Ieova e ala i le tatalo atu i le suafa o Iesu, o lē na tuuina mai lona Alo ina ia tatou maua ai faamanuiaga.—Ioane 3:16.

Ina ia tatou malamalama i le maualuga o le tulaga o Iesu, e faaaogā e le Tusi Paia ni tofi po o suafa e faamatala ai o ia. Ua fesoasoani foʻi iā i tatou e malamalama ai i le tele o faamanuiaga ua maua ona o mea na faia, o loo ia faia, ma mea o le a fai e Iesu mo i tatou. (Tagaʻi i le pusa “Le Matafaioi Tāua a Iesu,” Itulau e 14) O lea la, ua tuuina iā Iesu “le suafa e sili i isi igoa uma.”a Ua tuuina iā te ia le pule uma i le lagi ma le lalolagi.—Filipi 2:9; Mataio 28:18.

E Lē na o se Masaniga

Ioe, e tatau ona ala atu tatalo i le suafa o Iesu, pe a tatou mananaʻo e faafofogaina e Ieova. (Ioane 14:13, 14) Ae aua lava neʻi o tatou tatalo ma faapea “e ala atu i le suafa o Iesu,” ona o se faaupuga ua tatou masani ai. Aiseā?

Seʻi mafaufau i le talafaatusa lenei. I faiga o tusi faapisinisi, o le auala masani e faaiʻu ai le tusi e faapea, “ma loʻu faaaloalo lava,” ona saini lea o le igoa o lē na tusia. Pe faamata o faaaloalo moni le tagata faipisinisi i lē o loo tusi i ai, pe na ona taʻu lava ona o se faiga ua masani ai? E faapenā le uiga o le faaaogā o le suafa o Iesu i a tatou tatalo, ia aua le faia ona ua masani ai. E ui o loo tatou “tatalo e lē aunoa,” ae ia tatou tatalo ma le “loto atoa,” ae lē faia ona ua tatou masani ai.—1 Tesalonia 5:17; Salamo 119:145.

E faapefea ona e ʻalofia le faaaogā o le faaupuga “i le suafa o Iesu” e pei o se mea e masani ai? Aiseā e te lē manatunatu ai i uiga māfana o Iesu? Seʻi mafaufau i mea ua ia faia ma mea o loo ia manaʻo e fai mo i tatou. E ala i le tatalo, ia faafetaia Ieova ma vivii atu iā te ia ona o mea matagofie ua ia faia e ala i lona Alo. Pe a e faia faapea, o le a e mautinoa atili ai i le folafolaga lenei a Iesu: “Afai tou te talosaga atu i le Tamā i se mea, e na te foaʻi mai iā te outou i loʻu igoa.”—Ioane 16:23.

[Faaopoopoga i lalo]

[Faamatalaga faaopoopo i le itulau 13]

E tatau ona tatou tatalo ma le “loto atoa,” ae lē o le fai e pei ona masani ai

[Pusa/Ata i le itulau 14]

LE MATAFAIOI TĀUA A IESU

Ina ia malamalama atoatoa i le matafaioi a Iesu, seʻi iloiloina nisi o ona suafa, faamatalaga, ma nisi o igoa e faasino iā te ia.

Aʻoaʻo.—Ioane 13:13.

Alii.—Ioane 13:13.

Alii o le Filemu.—Isaia 9:6.

Alo o le Atua.—Ioane 1:34.

Amene.—2 Korinito 1:19, 20; Faaaliga 3:14.

Aposetolo.—Eperu 3:1.

Atalii o le Tagata.—Mataio 8:20.

Atamu Mulimuli.—1 Korinito 15:45.

Atua Malosi.—Isaia 9:6.

Emanuelu.—Mataio 1:23.

Ositaulaga Sili.—Eperu 4:14, 15.

Ulu o le Faapotopotoga.—Efeso 5:23.

Faaola.—Luka 2:11.

Faamasino.—Galuega 10:42.

Faipule.—Isaia 9:6.

Leoleo Mamoe Lelei.—Ioane 10:11.

Le Upu.—Ioane 1:1.

Mikaele le Agelu Sili. —1 Tesalonia 4:16; Iuta 9.

Molimau Faamaoni. —Faaaliga 1:5.

Puluvaga.—1 Timoteo 2:5.

Sui Sili o le Ola.—Galuega 3:15.

Taʻitaʻi.—Mataio 23:10.

Tamaʻi Mamoe a le Atua. —Ioane 1:29.

Tamā o le Faavavau.—Isaia 9:6.

Tupu.—Faaaliga 11:15.

Keriso po o le Mesia.—Mataio 16:16; Ioane 1:41.