Pe E te Iloa Lou Tamā i le Lagi?

PE E te iloa lelei lou tamā? Atonu e lē fetaui lenei fesili pe afai na e ola aʻe i se aiga alofa. E te ono faapea atu, ‘Ioe, ou te iloa lelei o ia.’ Ioe, o le toʻatele latou te iloa mea e fiafia ma lē fiafia ai o latou tamā, pe faapefea foʻi ona ia taulima se mea, ma le auala na te tausia ai lona aiga.

E ui i lea, atonu na iai se taimi na faateʻia ai oe ina ua faatoʻā e iloa isi uiga o lou tamā. O se faaaʻoaʻoga, atonu e iloa e se atalii lona tamā o se tagata e filemu ma toʻa. Peitaʻi, ina ua tupu se faalavelave, ua ia vaaia loa lona tamā o loo taumafai malosi e puipuia lona aiga.

Ae faapefea Lē na faia i tatou? Ua faamatala mai e faatatau iā te ia e faapea, “Ua tatou ola ai, gaoioi ai, ma ua tatou iai foʻi ona o ia.” (Galuega 17:28) O lea la, o le Atua e ana o tatou ola; auā o ia o le Tamā o i latou uma o loo soifua. (Isaia 64:8) Atonu o ou faalogona lenā mo le Atua, ma o se mea lelei toe talafeagai. E ui i lea, e tele atu nisi mea e ao ona tatou iloa ma aʻoaʻoina e faatatau iā te ia, lea e tatou te lelei ma fiafia ai.

O ou faalogona e faatatau i lou tamā na e fanau mai ai ma lou faaaloalo mo ia, e faalagolago i lou iloa lelei o ia. O lea la, o lou iloa lelei o le Atua, o le māfana foʻi lenā o la oulua faiā. E mafai ona fesoasoani atu le Atua iā te oe e fesagaʻia tofotofoga ma faigatā, pe afai e te iloa lelei o ia ma aʻoaʻo e fai lona finagalo.

O le ā le ituaiga tagata e iai le Atua? E tatau faapefea ona aafia ou faalogona mo ia ona o na uiga? Pe e iai ni ou tiute tauave ona o lou iloa o ia? O le a e mauaina tali o nei fesili i le mataupu o sosoo mai.

[Faamatalaga faaopoopo i le itulau 3]

E mafai ona aafia ou faalogona mo isi pe a e iloa lelei i latou