O Ai le Atua?

O le toʻatele o tagata e faapea mai e latou te talitonu i le Atua. Ae pe a fesili i ai po o ai le Atua, e eseese uma a latou tali. O nisi e faapea mai o le Atua o se faamasino sauā, e pau le mea e manaʻo i ai o le faasala o tagata ona o a latou agasala. E manatu isi o ia o se Atua e alofa ma e faamagalo i taimi uma e tusa lava po o ā mea e latou te faia. Ae e talitonu pea nisi o loo mamao le Atua ma e lē o naunau mai. O na manatu feteenaʻi, ua manatu ai le toʻatele e lē mafai ona tatou iloa le Atua.

Pe e tāua le iloaina o le Atua? Ioe, e tāua. O le iloa lelei o le Atua e maua ai se olaga e sili ona aogā. (Galuega 17:26-28) O le tele e te mafuta vavalalata ai i le Atua, o le tele foʻi lenā o lona alofa ma lona fesoasoani mai iā te oe. (Iakopo 4:8) O le mea moni, o le mauaina o le poto saʻo e faatatau i le Atua e iʻu ai i le ola e faavavau.—Ioane 17:3.

E faapefea ona e iloa le Atua? Seʻi mafaufau i se tasi e te iloa lelei e pei o sau uō vavalalata. Na faapefea ona tuputupu aʻe le lua faauōga? E mautinoa sa tatau ona e iloa lona igoa, le ituaiga tagata e iai o ia, o mea e fiafia ma lē fiafia i ai, o mea na ia faia ma mea o loo fuafua e fai, ma isi faamatalaga faapena. Na e tosina i lau uō ona o mea na e aʻoaʻoina e faatatau iā te ia.

I se tulaga talitutusa, e mafai ona tatou iloa le Atua e ala i le iloilo o fesili o loo mulimuli mai:

O AI LE SUAFA O LE ATUA?
O Ā ONA UIGA?
O Ā MEA UA FAIA E LE ATUA?
O Ā MEA O LE A IA FAIA?
E FAAPEFEA I LE ILOAINA O LE ATUA ONA AOGĀ IĀ TE OE?

O loo maua i lenei mekasini tali faale-Tusi Paia o na fesili. O le a fesoasoani mataupu taʻitasi iā te oe e aʻoaʻoina ai e faatatau i le Atua, faapea aogā e tatou te maua ona o le iai o se faiā ma ia.