1 Ia Atiaʻe le Talitonu i le Tusi Paia

“O Tusitusiga Paia uma e mai le agaga o le Atua, ma e aogā e aʻoaʻo ai, e aʻoaʻi ai, e faasaʻo ai mea.”—2 Timoteo 3:16.

AISEĀ E FAIGATĀ AI? E toʻatele ua maumauaʻi e faapea, o le Tusi Paia ua na o se tusi e tumu i le poto o tagata. Ua talitonu nisi e sesē talafaasolopito o loo iai. Ae ua faapea mai isi, e lē aogā po o ua uma foʻi le aogā o fautuaga o loo i le Tusi Paia.

E FAAPEFEA ONA E MANUMALO MAI AI? E masani lava, o i latou e fesiligia le maufaatuatuaina ma le aogā o le Tusi Paia, e latou te leʻi iloiloina lenā mataupu. E latou te toe taʻua manatu o isi. Peitaʻi, ua lapataʻi mai le Tusi Paia: “O lē ua faigofie, e talia e ia upu uma; a o lē ua mafaufau, ua faautauta o ia i lona ala.”—Faataoto 14:15.

Nai lo le talia o faamatalaga e fai mai e isi, aiseā e lē mulimuli ai i faaaʻoaʻoga a Kerisiano na nonofo i Perea i le uluaʻi senituri, lea ua taʻua nei o Eleni i mātū? E latou te leʻi tau ina talia faamatalaga a isi na fai atu. Nai lo lea, sa iai so latou talaaga mo le “matuā iloiloina [o] Tusitusiga Paia i aso taʻitasi pe e moni nei mea.” (Galuega 17:11) Seʻi o tatou iloiloina puupuu māfuaaga e lua e mafai ai ona e mautinoa na faagaeeina e le Atua le Tusi Paia.

E saʻo talafaasolopito o loo i le Tusi Paia. A o faagasolo tausaga, ua luʻia e le ʻaufaitio, ma faaauau pea ona latou luʻia le saʻo e faatatau i igoa o tagata ma nofoaga o loo taʻua i le Tusi Paia. E ui i lea, ua tele taimi ua faamaonia ai le lē faavaea o faamatalaga a le ʻaufaitio, ae e talitonuina faamaumauga a le Tusi Paia.

O se faaaʻoaʻoga, na iai le taimi na masalosalo ai tagata suʻesuʻe pe na iai moni le tupu Asuria o Sarekona, e pei ona taʻua i le Isaia 20:1. Peitaʻi, i tausaga e amata mai le 1840, na eli aʻe ai e tagata suʻesuʻe toega o le fale o lenei tupu. I le taimi nei, ua aupito i taʻutaʻua Sarekona i tupu o Asuria.

Sa fesiligia e le ʻaufaitio pe na ola moni ia Ponotio Pilato, le kovana Roma lea na faatonuina le maliu o Iesu. (Mataio 27:1, 22-24) Ae i le 1961, sa maua ai i se vaipanoa e lata i Kaisareia i Isaraelu, se maa o loo iai le igoa o Pilato ma lona tulaga.

E tusa ai ma le saʻo o le talafaasolopito o loo i le Tusi Paia, ua faapea mai le faamatalaga a le U.S. News & World Report o Oketopa 25, 1999: “Ua ofoofogia le auala ua faamaonia ai e suʻesuʻega o toega mea mai anamua le moni o talafaasolopito o loo i le Feagaiga Fou ma le Feagaiga Tuai, i le faamaonia ai o vaega autū o faamatalaga o augātamā anamua o Isaraelu, o le malaga a Isaraelu mai Aikupito, le nofoaiga a Tavita ma le soifuaga i le taimi o Iesu.” E ui e lē faalagolago le faatuatua i le Tusi Paia i toega mea e maua, ae e te faatalitalia le saʻo aʻiaʻi o talafaasolopito i se tusi na faagaeeina e le Atua.

O le poto o loo i le Tusi Paia e aogā mo tagata uma. A o leʻi taitai ona iloa e tagata ia siama ma le auala e pepesi ai faamaʻi, na maua i le Tusi Paia fautuaga e faatumauina ai le tulaga tumamā, lea o loo aogā pea i aso nei. (Levitiko 11:32-40; Teuteronome 23:12, 13) O sui o le aiga e faatatauina le fautuaga i le auala e ao ona feutagaʻi ai sui taʻitasi o le aiga, e sili atu le fiafia. (Efeso 5:28–6:4) O sē e ola e tusa ma taʻiala o le Tusi Paia, o le a avea o ia ma se tagata faigaluega faamaoni po o se pule e fetuutuunaʻi. (Efeso 4:28; 6:5-9) E aogā foʻi taʻiala o le Tusi Paia e maua ai le filemu o le mafaufau. (Faataoto 14:30; Efeso 4:31, 32; Kolose 3:8-10) E tatou te faatalitalia fautuaga aogā mai Lē na faia i tatou.

O LE Ā LE TAUI? O le atamai o loo i le Tusi Paia e mafai ona faapoto ai lē e lē o iai se poto masani. (Salamo 19:7) Afai e tatou te talitonuina le Tusi Paia, o le a tatou maua mai ai ni fesoasoani e lē maua i se isi lava tusi i le laasia o le isi laasaga i le mauaina o se faatuatua malosi.

Mo nisi faamatalaga, tagaʻi i le mataupu e 2, “O le Tusi Paia, o se Tusi Mai le Atua,” i le tusi O ā Aʻoaʻoga Moni o le Tusi Paia?a

[Faaopoopoga i lalo]