Le Auala E te Malamalama ai i le Tusi Paia

3. Talia le Fesoasoani Mai i Isi

Ina ua faimalaga se tagata suʻesuʻe o Edward John Eyre i se fanua laugatasi tuufua, na aʻoaʻoina o ia e tagata Apoliki i le auala e maua ai vai mai faaputuga oneone ma laau o le iukalipi. O le taliaina o le fesoasoani a i latou e malamalama i le laufanua, na faasaoina ai le ola o Eyre.

E PEI ona faataʻitaʻi mai i lenei faaaʻoaʻoga, ina ia taulau manuia se galuega fitā, e masani ona manaʻomia le fesoasoani mai i se isi e lava le poto masani. O le mea foʻi lenā e manaʻomia pe a e faitauina le Tusi Paia.

E leʻi manatu Iesu e mafai ona malamalama ona soo i le Tusi Paia e aunoa ma le fesoasoani mai i isi. I se tasi taimi, na ‘ia matuā faamatala atu iā i latou Tusitusiga Paia, ina ia latou malamalama ai.’ (Luka 24:45) Na silafia e Iesu e manaʻomia e tagata faitau i le Tusi Paia le fesoasoani, ina ia malamalama ai i aʻoaʻoga a le Tusi Paia.

Fesoasoani Mai iā te Ai?

Na tofia e Iesu ona soo ina ia tuuina atu lenā fesoasoani. A o leʻi afio aʻe o ia i le lagi, na poloaʻi Iesu e faapea: “O le mea lea, ia outou ō atu e fai tagata o nuu uma lava ma soo . . . ia aʻoaʻoina i latou e tausi i mea uma ua ou poloaʻi atu ai iā te outou.” (Mataio 28:19, 20) O le galuega autū a Kerisiano, o le aʻoaʻo atu, e aofia ai le faamatala atu o le auala e faatatauina ai mataupu silisili o le Tusi Paia i le olaga i aso faisoo. O Kerisiano moni, e fesoasoani i isi ia malamalama i le Tusi Paia.

E leʻi leva tele talu ona tuuina atu e Iesu lenā tofiga i ona soo, na tupu ai se mea mataʻina. Ua faamatala mai i le Tusi Paia se tagata taualoa mai i Aitiope, o lē sa faitauina se vaega o le valoaga a Isaia. Na tau o ia i se fasi fuaitau sa lē malamalama i ai. E tusa ai ma faamaumauga i le Tusi Paia, e faapenei ona faitauina na fuaiupu faigatā: “E pei o le mamoe ua taʻitaʻi atu e fasia, ma e pei o le tamaʻi mamoe i luma o ē sele ona fulufulu, e lē tagi, e lē tautala o ia. Ua aveesea le faamasinoga tonu i le taimi na faalumaina ai o ia. O ai na te taʻu atu faamatalaga uma i lona tupuaga? Auā ua aveesea lona ola mai le lalolagi.”—Galuega 8:32, 33; Isaia 53:7, 8.

Na fesili atu le tagata taualoa iā Filipo, o se Kerisiano tomai i le faamatalaina o mau o le Tusi Paia: “O ai lea e talanoa i ai le perofeta? Pe faatatau iā te ia po o se isi tagata.” (Galuega 8:34) Na alu atu lenei tagata Aitiope i Ierusalema e tapuaʻi ai, ma atonu sa ia tatalo mo se fesoasoani. E mautinoa sa faitau o ia ma se uiga naunau ma le agamalu. Peitaʻi, e leʻi malamalama lava o ia i lenei mau. Sa talosaga atu loa ma le lotomaulalo o ia iā Filipo mo se fesoasoani. Sa matuā fiafia le tamāloa i le faamalamalamaga a Filipo, ma na uunaʻia ai o ia e avea o se Kerisiano.—Galuega 8:35-39.

O loo faaauau pea e Molimau a Ieova le galuega lea na faia e Filipo ma isi uluaʻi Kerisiano. I le silia ma le 235 atunuu, ua tauofo ai Molimau e fesoasoani atu i isi ia malamalama i aʻoaʻoga moni a le Tusi Paia. E latou te faia lenei mea e ala i suʻesuʻega patino o Tusitusiga Paia. O lenei metotia faaauau pea o le suʻesuʻeina o le Tusi Paia, e aofia ai le talanoaina o mea o loo fai mai ai le Tusi Paia e faatatau i se mataupu patino.a—Tagaʻi i le pusa, “Tali Faamalieloto i Fesili Faale-Tusi Paia.”

“Na Taliina Aʻu Fesili Uma”

O Sitivi, Valvanera, ma Jo-Anne lea e taʻua i le mataupu muamua, sa latou suʻesuʻe le Tusi Paia ma Molimau a Ieova. Ua faapea mai Sitivi, “Sa ou maofa ina ua faatusatusaina nisi o mataupu silisili ma tala o le Tusi Paia, ae o loo maua ai lava i le Tusi Paia le tali saʻo o se mataupu. Ae ou te leʻi suʻesuʻeina le Tusi Paia, e leai lava se isi na faailoa maia lenā auala. O le mea e fiafia ai, ona e lē o avea le Tusi Paia o se tusi o fefinauaʻiga faaauau pea ma manatu feteenaʻi.”

E ioeina e Valvanera e faapea: “O mea uma na ou aʻoaʻoina, sa matuā manino ma saʻo aʻiaʻi. E lē ona na aʻoaʻo mai e le lotu, ae talu ai sa tuuina mai ni faamalamalamaga talafeagai.” Ua faamatala mai e Jo-Anne e faapea: “Talu ai na taliina aʻu fesili uma mai i le Tusi Paia, na faatumuina ai aʻu i le faaaloalo mo Lē e ana le tusi, auā o loo iā te ia le tofā mamao e faamaumau ai tali talafeagai i fesili a so o se tagata.”

Pe e te silafia se tasi o Molimau a Ieova? Aiseā e lē talosaga atu ai iā te ia e faataʻitaʻi mai le auala e fai ai suʻesuʻega faale-Tusi Paia? Pe afai e te lē silafia se tasi o Molimau a Ieova, faamolemole tusi mai i se tasi o tuatusi o loo lisiina i le itulau e 4 o lenei mekasini. Pe afai e iai le agaga paia, se mafaufau e fetālaʻi, ma le fesoasoani mai i se isi e tomai i le aʻoaʻo atu o le Tusi Paia, o le a lē faigatā la ona malamalama i le Tusi Paia. Ioe, e mafai ona e malamalama i le Tusi Paia!

[Faaopoopoga i lalo]

[Pusa/Ata i le itulau 8]

Tali Faamalieloto i Fesili Faale-Tusi Paia

O nisi o nei mataupu o loo talanoaina e Molimau a Ieova i a latou suʻesuʻega faale-Tusi Paia:

• O le ā le finagalo o le Atua mo le lalolagi?

• O fea o iai ē ua maliliu?

• Po ua tatou ola i “aso e gata ai”?

• Aiseā ua lē taofia ai e le Atua puapuaga?

• Le auala e fiafia ai o tatou aiga

[Ata i le itulau 7]

Ina ia malamalama i le Tusi Paia . . . ia tatalo mo le agaga o le Atua, faitau ma se mafaufau e fetālaʻi, ma talia le fesoasoani mai i isi