E A‘oa‘o e le Lotu Moni le Faaaloalo i le Afioga a le Atua

E Aʻoaʻo e le Lotu Moni le Faaaloalo i le Afioga a le Atua

SA UUNAʻIA e Iesu le faaaloalo i le Afioga a le Atua, le Tusi Paia. E manino lenei mea i lana tali atu ina ua faaosoosoina o ia e le Tiapolo. (Mataio 4:4-11) O se faataʻitaʻiga, o le ā le tali a Iesu ina ua faaosoosoina o ia e Satani e faaliu areto ni maa? Sa teena e Iesu le faaosoosoga i le taʻua o upu faagaeeina a Mose, e pei ona tatou faitau ai i le Teuteronome 8:3. Ma ina ua ofo atu e le Tiapolo iā Iesu le pule i malo uma o le lalolagi pe a ia faia se gaoioiga e tasi e tapuaʻi atu ai iā te ia, o le ā le tali a Iesu? Sa ia teena le ofo a le Tiapolo i lona taʻu atu o le taʻiala a le Tusi Paia o loo i le Teuteronome 6:13.

Seʻi tagaʻi la i ai! E ui lava o ia o le Alo e toʻatasi o le Atua, ae sa avea le Tusi Paia ma ona taʻiala pe a aʻoaʻo atu. E mautinoa e na te leʻi faagaloina le Afioga a le Atua ona o uputuu a tagata. (Ioane 7:16-18) Peitaʻi, e leʻi amanaʻiaina e le toʻatele o taʻitaʻi lotu i aso o Iesu le Afioga a le Atua. Aiseā? Auā sa manatu i latou e sili ona tāua uputuu a tagata i lo le Tusi Paia. Sa taʻu saʻo atu e Iesu i na tagata lotu e faapea: “Ua outou faalēaogā le afioga a le Atua ona o a outou uputuu. O outou o tagata faafiaamiotonu! Ua moni ai le valoaga a Isaia iā te outou e faapea, ‘Ua āva mai nei tagata iā te Aʻu i o latou laugutu, a o latou loto ua mamao mai iā te Aʻu. E lē aogā la latou tapuaʻiga o loo fai mai iā te Aʻu, auā ua avea mataupu a tagata ma a latou aʻoaʻoga.’”—Mataio 15:6-9, Holman Christian Standard Bible.

O le tele o lotu Kerisiano ma lotu e lē Kerisiano i le lalolagi, ua faapea mai e latou te faatāuaina le Tusi Paia. E ui i lea, e fia ni lotu o e iloaina e latou te teena uputuu a tagata, pe afai e lē talafeagai na uputuu ma aʻoaʻoga manino a le Afioga a le Atua? Seʻi manatu i ni faaaʻoaʻoga se lua.

MATAUPU: Faalagiga faalotu.

LE AʻOAʻOGA A LE TUSI PAIA: Sa taʻusalaina e Iesu taʻitaʻi lotu o ona aso ona o lo latou faatāua o faalagiga faalotu ma le fia taʻutaʻua. Na ia fetalai e faapea, o na tagata e fiafia “i nofoaga sili i faigaʻai, ma nofoa pito i luma i sunako, ma faafeiloaʻiga aloaʻia i nofoaga faitele, ma taʻua i latou e tagata o Aʻoaʻo.” Ona fetalai atu lea o Iesu i ona soo e faapea: “Aua neʻi taʻua outou o Aʻoaʻo; auā e toʻatasi lo outou Matai, a o outou uma o le ʻauuso. Aua foʻi neʻi taʻua se tasi i le lalolagi o lo outou tamā; auā e toʻatasi lo outou Tamā, o Lē o i le lagi.”—Mataio 23:1-10, New Catholic Edition of the Holy Bible.

FESILI: Pe e fiafia taʻitaʻi o lenei lotu i faalagiga maualuluga ma tulaga taualoa i le lautele, pe e latou te usitai i le faatonuga a Iesu ia ʻalofia le faia faapea?

MATAUPU: Faaaogāina o faatusa i tapuaʻiga.

LE AʻOAʻOGA A LE TUSI PAIA: “Aua e te fai mo oe se tupua ua ta, po o se faatusa lava o se mea o i le lagi i luga, po o i le fanua i lalo, po o i le sami o i lalo o le fanua. Aua e te ifo i ai pe auauna i ai.”—Esoto 20:4, 5, English Standard Version.

Na tusi le aposetolo o Ioane i Kerisiano e faapea: “Ia outou taumamao mai i tupua.”—1 Ioane 5:21, Contemporary English Version.

FESILI: Po o usitai lenei lotu i le faatonuga manino a le Tusi Paia, e aua neʻi faaaogāina faatusa ma tupua i le tapuaʻiga i le Atua?

E Mafai Ona E Maua le Ala Saʻo

E ui ina faigatā ona iloa le lotu moni ona o le tele naʻuā o lotu, ae e mafai lava ona e maua le lotu e taʻitaʻiina ai i le ola. E tele mea e iloa ai le “tapuaʻiga e mamā ma lē ponā i le silafaga a le Atua.” (Iakopo 1:27, New Revised Standard Version) Ua avea mau o loo taʻua i nei mataupu e pei o ni faailoilo e faasino atu ai oe i lenā lotu.

Aiseā e te lē fai ai i Molimau a Ieova e taʻu atu iā te oe tali o fesili o loo talanoaina i nei mataupu? A o e iloiloina a latou faamatalaga, ia mulimuli i le faaaʻoaʻoga lelei a tagata Perea o le uluaʻi senituri. Ina ua latou faalogo i le talaʻiga a le aposetolo o Paulo, “sa latou suʻesuʻeina le Tusi Paia ina ia iloa ai pe moni mea na fai atu ai Paulo.” (Galuega 17:11, Today’s English Version) Pe afai e te faatāuaina le Tusi Paia ma filigā e suʻesuʻe e pei o tagata Perea, o le a e mauaina le lotu e taʻitaʻia ai i le ola. O le filifiliga lenā e fitoitonu iā te oe, pe afai e te fia savali ai i lenā auala.

[Faamatalaga faaopoopo i le itulau 9]

O lē fea lotu o loo faalaeiauina tagata e suʻesuʻe le Tusi Paia, ina ia iloa pe e moni mea o loo latou aʻoaʻoina?