Ia Mafuta Atu i le Atua

‘E Mausalī Lou Malo’

2 SAMUELU 7:1-16

I LE faagasologa o le talafaasolopito, e toʻatele pule faaletagata na aveesea mai i o latou tofi. Na faiaʻina nisi i palota, a o isi na aveesea faamalosi. Ae faapefea Iesu Keriso, le Tupu o le Malo o le Atua i le lagi? Pe e iai se mea e taofia ai o ia mai i le avea ma Tupu tofia a le Atua? E maua le tali i upu na fetalai atu ai Ieova iā Tavita le tupu o Isaraelu anamua, e pei ona faamauina i le 2 Samuelu mataupu e 7.

I le amataga o le mataupu, ua tatou iloa ai ua māsiasi Tavita, auā e na o ia o se tupu faatauvaa, o loo nofo i se maota matagofie, a o le atolaau a le Atua o loo tuu i se faleʻie faatauvaa.a Ua faaalia e Tavita lona naunau e fausia se fale, po o se malumalu talafeagai mo Ieova. (Fuaiupu e 2) Ae e lē o Tavita o le a fauina le fale. E ala i le perofeta o Natano, na taʻu atu ai e Ieova iā Tavita, o lona atalii o le a fauina le malumalu.—Fuaiupu e 4, 5, 12, 13.

Na fiafia le finagalo o Ieova i le faanaunauga o le loto o Tavita. I le tali atu i le faamaoni o Tavita ma e tusa ai ma valoaga, na osia ai e le Atua se feagaiga ma Tavita e faapea, e faatūina e Ia se tasi i le aiga tautupu o Tavita, o le a pule e faavavau. Na faailoa atu e Natano iā Tavita le folafolaga aloaʻia a le Atua: “E mausalī lou aiga ma lou malo i ou luma i aso uma lava; e matuā faatumauina foʻi lou nofoālii i aso uma.” (Fuaiupu e 16) O ai le Suli tumau o lenei feagaiga, o Lē o le a pule e faavavau?—Salamo 89:20, 29, 34-36.

O Iesu le Nasareta, o sē e tupuga mai iā Tavita. Ina ua faalauiloa mai le fanau mai o Iesu, na faapea mai le agelu: “E foaʻiina atu e Ieova le Atua iā te ia le nofoālii o Tavita lona tamā, ma o le a fai o ia ma tupu i le aiga o Iakopo e faavavau, o lona malo foʻi e leai sona gataaga.” (Luka 1:32, 33) O lona uiga, na faataunuuina iā Iesu Keriso le feagaiga ma Tavita. O lea la, e lē o le filifiliga a tagata na avea ai o ia ma pule, ae e ala i le folafolaga aloaʻia a le Atua, ua maua ai e ia le aiā e pule ai e faavavau. Seʻi o tatou manatua, e faataunuuina lava folafolaga a le Atua.—Isaia 55:10, 11.

E lua ni lesona tāua e tatou te aʻoaʻoina mai i le 2 Samuelu mataupu e 7. Muamua, e tatou te mautinoa e leai se mea ma e leai se tasi, e mafai ona taofia Iesu Keriso mai i le avea ma pule. O lea, e tatou te mautinoa o le a ia faataunuuina le fuafuaga o lana pulega e faapea, ia faia atoatoa le finagalo o le Atua i le lalolagi e pei ona faia i le lagi.—Mataio 6:9, 10.

Lua, ua aʻoaʻo mai ai iā i tatou e lenei faamatalaga se lesona faamāfanafanaloto e uiga iā Ieova. Manatua, na silafia e Ieova ma na tāua iā te ia le faanaunauga o le loto o Tavita. O se faalaeiauga le iloa e faapea, e talisapaia e Ieova lo tatou faamaoni atu i lana tapuaʻiga. I nisi taimi, ona o tulaga e lē maʻalofia, e pei o le faasolo ina faalētonu le soifua mālōlōina po o le agaʻi ina matua, e ono taofia ai i tatou mai i le faataunuuina o mea uma e faanaunau iai o tatou loto, e fai i le auaunaga i le Atua. Afai o lea, seʻi tau ina faamāfanafanaina i tatou i le iloa, e oo lava i faanaunauga o se loto e matuā faamaoni i le tapuaʻiga iā Ieova, e silafia e ia.

[Faamatalaga pito i lalo]