Mea e Aofia ai i le Iloa o le Suafa o le Atua

PE E iai se uiga o lou igoa? O le tū masani i isi vaega o le lalolagi, o le faaigoa o se tamaitiiti i se igoa e iai se uiga. O le igoa e filifilia e atagia ai talitonuga, mea e faatāua, ma faamoemoega o mātua mo le lumanaʻi o la la tama.

E lē o se mea fou le faaigoa o fanau i igoa e iai uiga. I taimi o le Tusi Paia, na faaigoa le tagata i se igoa ona e iai le uiga. E taʻu mai e le igoa o le tagata mea o loo faatalitalia e na te faia. O se faaaʻoaʻoga, ina ua fetalai Ieova iā Tavita e faatatau i le matafaioi a lona atalii o Solomona i le lumanaʻi, na ia faapea atu: “O lona igoa o Solomona [o lona uiga o le “Filemu”], ou te tuuina atu iā te ia le filemu ma le toʻafimālie iā Isaraelu i ona aso.”​—1 Nofoaiga a Tupu 22:9.

I nisi taimi, e faaigoa ai e Ieova se tagata i se igoa fou ona o se matafaioi faapitoa e na te faia. Na faaigoa le avā e pā a Aperaamo iā Sara, o lona uiga o le “Purinisese.” Aiseā? Na faamatala atu e Ieova: “Ou te faamanuia o ia, e tupuga mai iā te ia o nuu; ma e tupuga mai foʻi iā te ia o tupu o nuu.” (Kenese 17:16) E manino la, o le malamalama i le māfuaaga na faaigoa ai Sara i se igoa fou, e manaʻomia ai foʻi ona malamalama i lana matafaioi fou.

Ae faapefea Ieova, o le suafa e sili ona tāua i suafa uma? O le ā le uiga o lea suafa? Ina ua fesili atu Mose i le Atua e uiga i Lona suafa, na tali mai Ieova: “E avea aʻu ma lē ou te loto i ai.” (Esoto 3:14) Ua faaalia mai ai e Ieova, e lē mafaitaulia le tele o ana matafaioi. O se faataʻitaʻiga faigofie: E tele matafaioi a se tinā e faia i aso taʻitasi a o tausia lana fanau, e avea o ia o se tausimaʻi, o se kuka, ma se faiaʻoga e tusa ma le manaʻoga e tulaʻi mai. E faapena foʻi Ieova, ae e sili atu lona tulaga. Ina ia faataunuu lana fuafuaga alofa mo tagata, e mafai ona ia faia so o se matafaioi e manaʻomia, e tusa ma lona finagalo. O le iloa o le suafa o Ieova, e aofia ai le malamalama ma talisapaia le tele o ana matafaioi.

E faanoanoa ona o ē e lē iloa le suafa o le Atua, ua latou lē iloa foʻi le matagofie o ona uiga. Peitaʻi, o le suʻesuʻe i le Tusi Paia, e te talisapaia ai nisi o matafaioi a Ieova e pei o le Faufautua atamai, Lē e laveaʻi mamana, Lē e saunia mea ma le lima mafola. E matuā ofoofogia le uiga o le suafa o Ieova.

Peitaʻi, e lē faigofie ona iloa le suafa o le Atua. Ua taʻu mai i le mataupu o sosoo ai le māfuaaga.