E te Silafia?
Pe e aiga Iesu ma nisi o ona aposetolo e toʻa 12?
▪ E lē o aumaia i le Tusi Paia se tali maʻoti. Peitaʻi, a fua i faamatalaga ma tū i lenā taimi, e foliga mai e aiga Iesu ma nisi o le toʻa 12
O loo taʻua e tusitala o Evagelia igoa o fafine na vaavaai atu a o tautau Iesu i le laau faaoosala, ua lata ina maliu. E toʻafā fafine o loo taʻua o latou igoa i le Ioane19:25: “O lona tinā o Maria, ma le uso o lona tinā; o Maria le avā a Kalopa, ma Maria le Makatala.” Pe a faatusatusa lea mau i tala a Mataio ma Mareko i le mea na tupu, ona iloa ai lea, o Maria le tinā o Iesu, e uso ma Salome, ma e foliga mai o Salome, o le tinā lea o atalii o Sepetaio. (Mataio 27:55, 56; Mareko 15:40) O loo taʻua i isi mau igoa o atalii o Sepetaio, o Iakopo ma Ioane, ma o lona uiga la, e tauusoga i latou ma Iesu. O lenei ʻauso o ni tagata faifaiva ma na filifilia i laʻua e Iesu e avea ma ona soo.—Mataio 4:21, 22.
O loo taʻua foʻi i nisi faamaumauga, o Kalopa po o Alefaio, le tane a se isi fafine o loo taʻua i le Ioane 19:25, o ia o le uso o Iosefa le tamāfai o Iesu. Afai e moni lenei faamatalaga, o lona uiga la, e iai foʻi ma se isi aposetolo o Iesu e la te tauusoga lelei, o Iakopo le atalii o Alefaio.—Mataio 10:3.
O le ā le faiā a Iesu ma Ioane le Papatiso?
▪ E manatu nisi e vavalalata la laʻua faiā, ma e faavae lenā manatu i le Luka 1:36. Ae e lē o manino lelei le faaliliuga o lenā mau. I le tele o faaliliuga, ua taʻua i lenā fuaiupu, e tausoga Elisapeta le tinā o Ioane, ma Maria le tinā o Iesu.
Peitaʻi, e lē o faasino tonu lenā upu Eleni i se tausoga. Pau le mea ua iloa mai i le upu Eleni, e aiga nei fafine, ae e lē faapea e tausoga. E pei ona faamatala mai i le Interpreter’s Dictionary of the Bible, “e faigatā ona iloa tonu la laʻua faiā ona e lautele le faaaogāina o le upu.” Aiseā la ua manatu ai tagata, e tausoga Iesu ma Ioane? Ua faamatala mai i le Catholic Encyclopedia: “O a matou faamatalaga uma e faatatau i . . . mātua o Maria . . . e aumai i lomiga faa-apokerifa.”
O lea, ua tatou iloa mai ai, e aiga Iesu ma Ioane, ae e lē tausoga.