Le Pogai ua Lē Taulau ai Nisi o Faaipoipoga

“Ua ō ane foʻi le ʻau Faresaio iā [Iesu] ina ia faaosooso iā te ia ma faapea mai: ‘Pe e taga i le tulafono ona faateʻa e se tamāloa lana avā i so o se māfuaaga?’”—Mataio 19:3.

I ASO o Iesu, na fesili nisi, pe e mafai, ma pe e tatau ona tumau faaipoipoga. Ona fetalai atu lea o Iesu iā i latou: “Tou te leʻi faitaulia ea o lē na foafoaina i laʻua i le amataga, na ia faia i laʻua o le tane ma le fafine, ma na ia fetalai atu, ‘O le mea lea e tuua ai e le tane lona tamā ma lona tinā, ae nonofo faatasi ma lana avā, ona avea ai lea o i laʻua ma tino e tasi’? O lea ua lē toe toʻalua ai, ae ua avea i laʻua ma tino e tasi. O ē ua faatasia e le Atua, aua neʻi tuueseeseina e se tagata.”a (Mataio 19:4-6) E manino mai, na finagalo le Atua ia tumau faaipoipoga.

I le tele o atunuu i aso nei, e tusa ma le 40 pasene pe sili atu o faaipoipoga uma “ua tuueseeseina,” ma iʻu ina tatala. Po ua lē toe aogā la le fautuaga a le Tusi Paia e faatatau i faaipoipoga? Po ua lē taulau le faaipoipoga ona e iai se faalētonu i lea faatulagaga?

Seʻi manatu i lenei faataʻitaʻiga: Ua faatau e ni ulugalii se toʻalua se ituaiga o taavale lava e tasi. O le tasi ulugalii, e tausi lelei la laʻua taavale ma ave ma le faaeteete ma e leʻi iai lava se faalētonu. A o le isi ulugalii, e lē tausia lelei la la taavale ma e ave ma le lē faautauta. O lea la ua leaga le taavale, ma ua lafoaʻi. O ai la e tuuaʻia i le leaga o le taavale, o le taavale po o ē e ona le taavale? O ē e ona le taavale!

E faapena foʻi le tele o faaipoipoga ua lē taulau. E lē ona o le faalētonu o le faatulagaga o le faaipoipoga, auā e faitau miliona isi faaipoipoga o loo taulau pea. O na faaipoipoga, o loo maua ai e ulugalii ma aiga le fiafia, ma o le malosiaga foʻi lea o se nuu. Ona e pei le faaipoipoga o se taavale, e manaʻomia ona tausia lelei ma siaki pea, ina ia tumau ona lelei.

Po ua leva pe e leʻi leva ona e faaipoipo, ae e aogā fautuaga a le Tusi Paia i le auala e tausia ma faamalosia ai le faaipoipoga. Tagaʻi i faaaʻoaʻoga o loo mulimuli mai.

[Faamatalaga pito i lalo]