Faauuga Lona 129 o le Aʻoga a Kiliata
“O lo Outou Aso Lenei”
IĀ Setema 11, 2010, e lata i le 8,000 tagata na faapotopoto mo se sauniga faapitoa, o le faauuga o le vasega lona 129 o le Aʻoga Faale-Tusi Paia a le Olomatamata o Kiliata. Na faapea atu Samuel Herd o se sui o le Vaega Pule o Molimau a Ieova i le ʻauaʻoʻoga: “O lo outou aso lenei. Ua matou olioli faatasi ma outou.”
“O Taliga e Faalogo Ai”
Na amata e le uso o Herd i le talanoaina o le manaʻoga mo Kerisiano uma, ia faaaogā lelei o latou “taliga e faalogo ai,” e ala i le uaʻi atu i le Afioga a le Atua. (Faataoto 20:12) Na ia faapea atu i le vasega: “A o faagasolo le aʻoga, sa outou faalogo iā Ieova, ma o le a outou faia faapea e oo i le faavavau.”
E faapefea ona faaaogā lelei e misionare fou o latou taliga? Ua taʻua e le uso o Herd: “Ia uaʻi atu i le Afioga a le Atua. E tele faamatalaga o lenei polokalame o le a aogā i lo outou sauniuni atu, e galulue o ni misionare i tausaga o i luma.”
“Faatuatua iā Ieova ma Lou Lotoatoa”
Na lauga atu Gerrit Lösch, o se sui o le Vaega Pule, i le ʻauaʻoʻoga i lenei matua faatupu manatu. Na ia taʻua le tele o tala e uiga i tagata o le Atua i aso anamua ma aso nei, o ē na faatuatua iā Ieova.
Na taʻu atu e le uso o Lösch “e ao foʻi i misionare ona faaalia le faatuatua i o latou tofiga. O se faaaʻoaʻoga, atonu e te popole: ‘Po o le a mafai ona ou aʻoaʻoina le gagana fou? Po o le a faigofie ona ou faamasani i le aganuu fou? Po o le a mafai ona ou manumalo i le lagona o le misia o le aiga?’” O le ā le tali? Na timaʻi e le uso o Lösch le vasega ia “faatuatua iā Ieova.”
Na faitau foʻi e le uso o Lösch le Faataoto 14:26: “O lē e mataʻu iā Ieova e iai le faatuatuaga malosi.” E atili ona tatou faatuatuaina Ieova pe a manatu i auala ua ia faamanuiaina ai i tatou.
Ua taʻua i le Tusi Paia o lē e faatuatua iā Ieova, “e avea lava o ia e pei o se laau ua totō i tafatafa o vai, e sosolo atu ona aa i tafatafa ane o le vaitafe; ma e lē iloa foʻi e ia pe a oo mai le vevela, ae e lauolaola ona lau.”—Ieremia 17:7, 8.
E manino le lesona. Ua taʻua e le uso o Lösch, “Po o le ā lava e tupu i le lumanaʻi, ia e faatuatuaina Ieova.”
“Faaaʻoaʻo i Agelu Faamaoni”
O le matua lenā o le lauga a Stephen Lett o se sui o le Vaega Pule. Ua faataatia e agelu se faaaʻoaʻoga lelei mo i tatou. Na taʻua e le uso o Lett: “O mea uma ua faaalia e le Tusi Paia e uiga i agelu e ao ona faataʻitaʻi i ai.” Ona ia taʻua lea o uiga e fā o agelu e ao ona tatou faataʻitaʻi i ai—o le tutumau, lotomaulalo, agaga fia fesoasoani ma le faamaoni.
Ua taʻua i le Tusi Paia e 21 aso na teena ai e se agelu se temoni malosi, o ‘le perenise lea o Peresia.’ (Tanielu 10:13) Na tumau lenā agelu. Na taʻua e le uso o Lett, o loo ‘tau foʻi Kerisiano ma agaga leaga’ po o temoni. (Efeso 6:12) Na ia faapea atu, “Ia tauivi malosi i le faataunuuina o la outou galuega faamisionare.”
E leʻi faailoa atu e se agelu lona igoa ina ua fesiligia e Manoa, le tamā o Samasoni. Na faaalia e lenā agelu le lotomaulalo. (Faamasino 13:17, 18) Na faapea atu le uso o Lett i le vasega: “Pe a taumafai se tasi e viiviia pe soona faaeaeaina oe, ia lotomaulalo ma faauaʻi atu le viiga iā Ieova ma lana faalapotopotoga.”—1 Korinito 4:7.
Na iai Iesu i le faatoʻaga o Ketesemane a o lata i lona maliu, ma na sau se “agelu mai le lagi ma faamalosi iā te ia.” (Luka 22:43) Na faaalia e lenā agelu le agaga fia fesoasoani. Na taʻua e le uso o Lett: “E ala i le tatalo, ia taumafai e iloa manaʻoga moni o lo outou tofiga faamisionare, ona taumafai lea e faamalie na manaʻoga i le fesoasoani a Ieova.”
Talu ai e toʻaitiiti se vaega o agelu na fouvale faatasi ma Satani, ua tatou iloa ai o le anoanoaʻi o na foafoaga agaga i le lagi, o ni faaaʻoaʻoga matagofie o le faamaoni.—Faaaliga 12:4.
Na faalaeiau e le uso o Lett le vasega, “I le pei o na agelu faamaoni, ia tetee atu i le Tiapolo ona sola ese ai lea o ia.”—Iakopo 4:7.
Isi Manatu Tāua e Tolu o le Polokalame
“Ia Avea Pea Ieova o se Papa i Lou Loto.” Na faia lenei mataupu manaia e faavae i le Salamo 73:26 e Gary Breaux, o se sui o le Komiti o le Lālā i Amerika, e fesoasoani i le vasega ia iloa e tāua le faalagolago iā Ieova. E faapefea ona avea Ieova o se papa? Na taʻua e le uso o Breaux: “E mafai e se papa ona taofi i lalo se fasi pepa e ui i le malosi o le matagi. I se auala talitutusa, e mafai foʻi ona avea Ieova ma faamalosiau i o tatou loto.” E moni e mafai ona taʻitaʻisesēina i tatou e o tatou loto pe a feagai ma tulaga faigatā. (Ieremia 17:9) E iai tulaga e ono lē toe fia avea ai nisi ma misionare, e pei o le ese o le tau, meaʻai e lē masani ai ma le nonofo faatasi i le fale misionare ma ē e lē masani ai. Na taʻua e le uso o Breaux: “O le a outou feagai ma tulaga e tatau ai ona filifili le mea e fai. Po o le a e filifilia le ala e finagalo malie i ai Ieova? Afai o lea, o le a avea Ieova ma papa o lou loto. E na te taʻitaʻiina ou ala.”
“Pe e Tou te Faatuatua Ina ia Manumalo ai i Faigatā?” O le matua lenā o le lauga a Sam Roberson, o se faiaʻoga o le Aʻoga a Kiliata, na faavae mai i le Iosua mataupu e 3. Na faapefea ona sopoʻia e tagata Isaraelu le vaitafe o Ioritana a o tatafe malosi? Na poloaʻia e Ieova Iosua e faatonu ositaulaga ia ‘tutū i le vaitafe o Ioritana.’ Na folafola mai e le Atua: “O le taimi lava e papaʻi ai alofivae o ositaulaga . . . i vai o Ioritana, ona vaeluaina lea o le vaitafe o Ioritana, . . . e tū foʻi le vai e pei o se mea maupuʻepuʻe.” (Iosua 3:8, 13) Na faapea atu le uso o Roberson: “E pei ona taofia e le vaitafe o Ioritana tagata Isaraelu mai i le mauaina o lo latou faamanuiaga, e tou te fesagaʻi foʻi ma tulaga faigatā e ono lē mafai ai ona maua o outou faamanuiaga.” O se faaaʻoaʻoga, atonu o le a lē lelei le tou va feagai ai ma isi misionare. O le ā le vaifofō? Na timaʻi e le uso o Roberson le vasega: “Ia vaai i le galuega, ae lē o le ʻaufaigaluega. Pe afai e tou te faatuatua e pei o ositaulaga ia na papaʻi o latou vae i vai o Ioritana, o le a fesoasoani foʻi Ieova iā te outou ia manumalo i faigatā, a o auai i le galuega faamisionare.”
“Ia Faatumauina a Outou Fuafuaga.” O le matua lenā o le mataupu a William Samuelson, o se faiaʻoga i le Aʻoga a Kiliata. Sa faavae lana lauga i le Faataoto 16:3: “Ia tuuina atu iā Ieova au galuega, ona matuā faatumauina ai lea o au fuafuaga.” Na fesili atu le uso o Samuelson: “Po o le uiga o lenei mau e leai sa outou vaega i le faatumauina o a outou fuafuaga, ae na ona ‘tuuina atu iā Ieova o a outou galuega’?” Na ia faapea atu, e leai, auā ua taʻua i le Faataoto 16:1: “E faavasega e le tagata manatu o lona loto.” Na taʻua e le uso o Samuelson: “E lē faavavega ona faavasega e Ieova manatu o o outou loto. Peitaʻi, e ao ona faamautinoa o loo outou agaʻi i le ala saʻo. E ala i le suʻesuʻe, tatalo ma fesootaʻi atu i le ofisa o le lālā i lenā vaipanoa, o le a faaauau ona saʻo o outou loto, ma faatumauina e Ieova a outou fuafuaga.”
Mea na Tutupu ma Faatalanoaga
O se tasi vaega o le aʻoga, o le talaʻi faatasi lea o le vasega ma faapotopotoga a Molimau a Ieova i lenā vaipanoa. Na faatalanoa e Mark Noumair, o se faiaʻoga o le Aʻoga a Kiliata, nisi o le vasega e faamatala ni mea na tutupu. Sa sili ona faamatilatila le vaega a le tatalo, i le faasino mai o tagata lotofaamaoni i le oganuu.
O se faaaʻoaʻoga, sa iai se ulugalii i totonu o se faleʻaiga. Na iloa atu e se tagata faigaluega o loo fai se la tatalo lē leoa. Na alu atu ma fesili po o i laʻua o ni Molimau a Ieova. Ina ua iloa o i laʻua o ni Molimau a Ieova, na faamatala atu e le tagata faigaluega sa ola aʻe o ia o se Molimau, ae na alu ese mai i le upu moni. Sa ia faia se solitulafono ma falepuipui ai. O lea ua toe fia foʻi lenei alii talavou iā Ieova. Na ia taʻua foʻi a o leʻi ō atu le ulugalii i totonu o le faleʻaiga, sa ia tatalo i le Atua ma faailoa atu e na te fia maua se fesoasoani, ina ia toe faasaʻo ai lona olaga. Sa taliina lana tatalo!
I le lauga “Inā Outou Tofotofo ia ma Iloa ai e Lelei Ieova,” na faatalanoa ai e Rudi Hartl o le Matagaluega o Tusitusiga, ia Wayne Wridgway mai i Mozambique, Jason Reed mai i Chile, ma Kenji Chichii mai i Nepale. O i latou uma nei, o ni misionare na aʻoaʻoina i Kiliata. Sa taʻua e nei uso tulaga faigatā na latou fesagaʻia ina ua faatoʻā avea ma misionare, e pei o le aʻoaʻoina o se gagana fou, faamasani i se aganuu fou, po o le misia o aiga. Na taʻua e le uso o Chichii: “O se tasi o mea na fesoasoani iā i matou, o le vave faia lea o ni uō i le faapotopotoga fou. A o māfana la matou mafutaga ma le faapotopotoga, na faigofie ai ona matou manumalo i le lagona o le misia o aiga.”
Ina ua maua e tagata uma o le vasega e toʻa 56 a latou tipiloma, ona faitauina lea e se tasi o le ʻaufaauu se tusi mai i le vasega e faaalia ai lo latou lotofaafetai. Ua taʻua i se vaega o lenei tusi i le Vaega Pule: “Na matou vāaitino i lo outou alolofa ma le lē faavaivai e faaavanoa mai outou, saunia mataupu, asiasi mai i le vasega ma aumai iā i matou faatonuga aogā faaleagaga. Talu ai ua matou tofo i lo outou alolofa, o lea o le a faia ai le mea sili e matou te mafai, ina ia faaaʻoaʻo i a outou faaaʻoaʻoga lelei o le alofa, onosaʻi, lotomaulalo ma le naunau moni, pe a taunuu i o matou tofiga.”
[Faamatalaga faaopoopo i le itulau 28]
‘Pe a taumafai se tasi e viiviia oe, ia faauaʻi atu le viiga iā Ieova’
[Faamatalaga faaopoopo i le itulau 29]
“E tou te fesagaʻi foʻi ma tulaga faigatā”
[Siata/Faafanua i le itulau 31]
FAAMAUMAUGA O LE VASEGA
9 atunuu o loo auai o latou sui
56 le ʻauaʻoʻoga
28 ulugalii
33.0 faatatauga o tausaga
17.9 faatatauga o tausaga papatiso
13.3 faatatauga o tausaga paeonia
[Faafanua]
(Tagaʻi i le lomiga mo le ata atoa)
Ua taʻua i lalo atunuu e 25 e galulue ai le ʻaufaauu
ATUNUU UA TOFIA I AI MISIONARE
POLIVIA
BOTSWANA
BULGARIA
CONGO (KINSHASA)
CÔTE D’IVOIRE
GAMBIA
SIAMANI
INITIA
INITONESIA
KENYA
LAIPERIA
MAKETONIA
MADAGASCAR
MELEISIA
MOZAMBIQUE
PANAMA
PERU
POLANI
ROMANIA
SERBIA
SIERRA LEONE
SWAZILAND
TANZANIA
UGANDA
ZIMBABWE
[Ata i le itulau 30]
Faataʻitaʻi e le vasega o le Aʻoga a Kiliata se mea na tupu i la latou talaʻiga
[Ata i le itulau 31]
Vasega Faauu Lona 129 o le Aʻoga Faale-Tusi Paia a le Olomatamata o Kiliata
I le lisi o i lalo, e faanumera laina mai i luma i tua, ma o suafa e lisi mai i le agavale i le taumatau.
(1) Munaretto, R.; Olofsson, Y.; Budden, K.; Najdzion, L.; Moya, G.; Treviño, G.; Dion, A.; Fleegle, A.
(2) Smith, J.; Michael Raj, J.; Smith, S.; Paramo, A.; McDonald, J.; Deans, M.; Joyal, S.; Watson, L.
(3) Joyal, C.; Crawley, T.; Hacker, D.; Shynkarenko, J.; Knapp, T.; Ayling, J.; Highley, C.; Olofsson, B.
(4) Fitzpatrick, M.; Najdzion, B.; Skallerud, L.; Harris, A.; Harris, S.; Budden, R.; Paramo, Y.; Skallerud, K.
(5) Crawley, B.; Michael Raj, J.; Lodge, A.; Lodge, R.; Herms, N.; Fitzpatrick, J.; Moya, R.; Munaretto, P.
(6) Watson, S.; Deans, M.; Hacker, J.; McDonald, J.; Treviño, J.; Harris, S.; Herms, C.; Harris, P.
(7) Shynkarenko, V.; Highley, T.; Smith, A.; Dion, J.; Ayling, R.; Smith, B.; Knapp, T.; Fleegle, B.