“Se Ovasia Lelei Tele ma o se Uō Pele”

O JOHN (JACK) BARR, o se tasi o le Vaega Pule o Molimau a Ieova, na māeʻa lana auaunaga faalelalolagi i le taeao o le aso Toonaʻi, Tesema 4, 2010. E 97 tausaga o lona soifuaga. Ua taʻua o ia o “se ovasia lelei tele ma o se uō pele.”

Na soifua mai le uso o Jack Barr i le aai o Aberdeen i Sikotilani, ma o ia o le uii o le fanau e toʻatolu. O ona mātua o nisi o le vasega faauuina. Na masani ona talanoa ma le alofa le uso o Barr e uiga i le amatamataga o lona olaga, ma sa lotofaafetai ona o le faaaʻoaʻoga lelei na faataatia e ona mātua pele.

A o talavou Jack, sa matamuli e talanoa atu i tagata e lē masani ai. Ae ui i lea, sa ia taumafai malosi e foʻia lona faafitauli, ma i se tasi aso Sa i le 1927, ina ua atoa lona 14 tausaga, na ia faailoa atu i lona tamā, e fia auai ma ia i le galuega talaʻi i lea fale ma lea fale. O le amataga lenā o le tele o tausaga o lana auaunaga iā Ieova. Talu mai lenā aso seʻia oo i lona maliu, na tumau pea le uso o Barr i le talaʻia ma le maelega o le tala lelei.

Ona o se faalavelave matuiā tau taavale na toetoe lava maliu ai lona tinā pele, na mafaufau ai Jack i le uiga moni o le olaga, ma i le 1929 na tuuina atu ai o ia iā Ieova ma papatisoina ai i le avanoa muamua na ia maua i le 1934. I le 1939, na avea ai o ia ma se tasi o le aiga Peteli i Lonetona, i Egelani. Ma na amata ai i inā lana auaunaga faataimi atoa mo le 71 tausaga.

Iā Oketopa 29, 1960, na faaipoipo ai le uso o Barr iā Mildred Willett, o sē ua leva ona auauna o se paeonia ma o se misionare, ma amata ai se faiā na ia taʻua, o “se mafutaga e sili ona māfana.” Sa lauiloa le uso ma le tuafafine o Barr o se ulugalii e fealofani tele, ma sa tumau ai seʻia oo lava ina māeʻa le soifuaga faalelalolagi o le tuafafine o Mildred iā Oketopa i le 2004. E faitau faatasi e le uso ma le tuafafine o Barr se vaega o le Tusi Paia i aso uma o le la mafutaga.

O ē sa latou masani, pe a taʻua le suafa o le uso Barr, e latou te mafaufau o se tasi e avatua fautuaga e aogā, paleni lelei, agalelei i taimi uma, ma e faavae i le Tusi Paia. Sa galue malosi, o ia o se ovasia e magafagafa ma alofa tele ma o se uō faamaoni. Na faaalia le loloto o lona malamalama i mea faaleagaga ma le vavalalata o le la faiā ma Ieova, i ana tala, lauga ma tatalo.

E ui e tatou te misia lo tatou uso peleina o Barr, ae tatou te fiafia ona ua ia mauaina le meaalofa o le ola e lē mafai ona oti—se faaeaga sa ia talatalanoa ma moomoo i ai. O se faamoemoe ua leva ona ia tulimataʻia.​—1 Kori. 15:53, 54.a

[Faaopoopoga i lalo]