Ia Mafuta Atu i le Atua

“Ieova e, . . . Ua E Silafia Lava Aʻu”

“E LEAI se avega e sili atu ona mamafa nai lo o le iai i se tasi o le manatu e faapea, e leai se isi e alofa pe malamalama iā te ia.”a Pe e faapena ou lagona? Pe na iai se taimi na e manatu ai e leai se isi e alofa mai, pe malamalama i ou faalogona ma mea o loo e fesagaʻia? Afai o lea, atonu o le a faamāfanafanaina oe i upu nei: Ona e alofa faapelepele Ieova i ona tagata tapuaʻi, o lea e na te silafia lelei tulaga o loo latou fesagaʻia i aso taʻitasi o o latou olaga. Ua faamautinoa mai i upu a Tavita i le Salamo 139 lenei mea moni.

O le mautinoa o Tavita i le naunau mai o Ieova iā te ia, na tusi ai e faapea: “Ieova e, ua e suʻesuʻe mai aʻu, ma ua e silafia lava aʻu.” (Fuaiupu e 1) Sa faaaogā e Tavita se talafaatusa matagofie i inei. O le upu Eperu ua faaliliuina i le “suʻesuʻe mai,” e faasino atu i le eliina o maatāua (Iopu 28:3), saʻiliʻiliga o se laueleele (Faamasino 18:2), po o le iloiloina o faamaoniga o se mataupu taufaamasinoga (Teuteronome 13:14). Ioe, e silafia lelei e Ieova i tatou e pei lava o loo ia suʻesuʻeina itu ma gasologa uma o o tatou olaga. E ala i le faaaogāina o le suinauna o “aʻu,” ua aʻoaʻo mai ai e Tavita iā i tatou e faapea, e naunau alofa mai le Atua i ana auauna. E na te suʻesuʻeina i latou uma ma iloa i latou taʻitoʻatasi.

Na faailoa atili mai e Tavita le māeʻaeʻa o le suʻesuʻega a Ieova i lona faapea mai: “Ua e silafia lava loʻu nofo i lalo ma loʻu tulaʻi. Ua e silafia mamao mai foʻi oʻu manatunatuga.” (Fuaiupu e 2) O le mea moni, o loo “mamao” i le lagi le mea o loo afio ai Ieova. Peitaʻi, ua ia silafia lo tatou nonofo i lalo atonu i le faaiʻuga o se aso, ma pe a tatou feala i taeao ma amata fuafuaga i aso taʻitasi. E na te silafia foʻi o tatou manatunatuga, faanaunauga, ma le uunaʻiga e tatou te faia ai mea. Pe na fefe Tavita ona o le suʻesuʻeina ma le māeʻaeʻa o ia e Ieova? E leai, auā sa manaʻo o ia ina ia faia faapea. (Fuaiupu e 23, 24) Aiseā?

Na iloa e Tavita, e iai se māfuaaga lelei o le suʻesuʻeina ma le māeʻaeʻa e Ieova o Ona tagata tapuaʻi. Na tau faaataata mai e Tavita lenā uunaʻiga ina ua ia tusi: “Ua e fuatia loʻu savali ma loʻu taoto, ua e masani foʻi i oʻu ala uma.” (Fuaiupu e 3) Ua vaaia e Ieova o “tatou ala uma” i aso taʻitasi—o a tatou mea sesē faapea foʻi ma a tatou galuega lelei. Pe e taulaʻi o ia i mea sesē po o mea lelei? O le upu Eperu ua faaliliuina “fuatia,” e uiga atu i le “faamamā” po o le “lelea [feula ese],” e pei o aputi o saito e lelea i le matagi, ae tuua na o le saito lelei. O le fuaitau “ua e masani,” e faaliliuina i se upu Eperu e uiga atu i le “faatāua.” E faatāua e Ieova mea lelei, a o ia suʻesuʻeina ma le māeʻaeʻa faamatalaga ma gaoioiga a ona tagata tapuaʻi i aso taʻitasi. Aiseā? E na te faatāua taumafaiga a ona tagata ina ia faafiafiaina o ia.

Ua tatou aʻoaʻoina mai i le Salamo e 139, e alofa faapelepele mai Ieova i ona tagata tapuaʻi. E na te suʻesuʻeina ma silasila alofa iā i latou a o faagasolo o latou olaga i aso taʻitasi. O Lona faia faapea, ua ia silafia ai faafitauli o loo latou fesagaʻia, ma malamalama lelei i le tigā o o latou mafaufau ma loto ona o na faafitauli. Pe e lē o uunaʻia ea oe e tapuaʻi i se Atua alofa faapena? Afai o lea, e te mautinoa la i le manatu lenei: E lē mafai e Ieova ona “faagalogalo . . . la outou galuega, ma le alofa ua outou faaali mai i lona suafa.”—Eperu 6:10.

Faitauga Tusi Paia mo Setema:

◼ Salamo 119-150

[Faaopoopoga i lalo]