Pe e Tāua le Iloa o le Tali?

“Na amata ona fai aʻu uō tama i le sefulu o oʻu tausaga. I le taimi muamua, e na o le uulima ma feāsogi. A o faagasolo taimi, na amata ona loteina itutinosā ma faia amioga lē mamā. Na ou faigaluega i le 15 o oʻu tausaga, ma na masani ona ō mai tamāloloa, ma mananaʻo e faia feusuaʻiga lē mamā. Sa ou manaʻo e faataʻitaʻi i so o se mea, ma auaufaatasi ma aʻu uō i so o se mea e latou te faia. Na atili ona ou faia feusuaʻiga lē mamā, ona o loʻu manaʻo e talia aʻu e aʻu uō.”—SARA,a AUSETALIA.

PE E faateʻia oe i le iloaina na ola aʻe Sara i se aiga mapolotu? Na taumafai ona mātua e tausia aʻe o ia i tapulaa tau amio a le Tusi Paia. Ae sa ese le ala na filifilia e Sara.

E toʻatele e ioe i le filifiliga a Sara. E manatu le toʻatele e lē o toe aogā i aso nei le manatu o le Tusi Paia e uiga i feusuaiga. E manatu isi e lē afaina le faapea mai e mapolotu, ae i le taimi e tasi e ola i se olaga o amioga tuufau i feusuaʻiga lē mamā.

Pe e tāua lou iloaina, ma ola e tusa ai ma aʻoaʻoga a le Tusi Paia e uiga i feusuaʻiga? Ua faailoa mai e faapea, o le Tusi Paia “e mai i le agaga o le Atua, ma e aogā e aʻoaʻo ai.” (2 Timoteo 3:16) Pe afai e te talitonu o le Atua na foafoaina tagata, ma o le Tusi Paia o lana Afioga faagaeeina, e mautinoa la e tāua le iloa o manatu o loo taʻua ai e faatatau i feusuaʻiga.

Peitaʻi, o loo fenuminumiaʻi le toʻatele i aʻoaʻoga a le Tusi Paia e tusa ai ma feusuaʻiga. Ua aʻoaʻo e taʻitaʻi lotu o ē e faapea mai e latou te faatāuaina le Tusi Paia, manatu eseese e tusa ai ma feusuaʻiga. O le mea moni, ua fevaevaeaʻi le tele o lotu autū ona o lenei mataupu.

Nai lo o le faalagolago i manatu o isi, e manaia pe a faaalu sina taimi e iloilo ai e oe lava ia le aʻoaʻoga a le Tusi Paia. O le a talanoaina i le mataupu o sosoo mai ni fesili se sefulu, e uiga i aʻoaʻoga a le Tusi Paia e tusa ai ma feusuaʻiga. O tali tuusaʻo ma manino o loo i lenā mataupu, e faavae mai i aʻoaʻoga moni a le Tusi Paia. O le a talanoaina i le mataupu mulimuli o lenei faasologa, le māfuaaga e tāua ai la tatou filifiliga.

[Faaopoopoga i lalo]