Ua Fesili Mai le ʻAufaitau . . .

Pe e tatau ona aʻoaʻoina e mātua a latou fanau e uiga i feusuaʻiga?

▪ E faia e le toʻatele o mātua taumafaiga sili ina ia puipuia a latou fanau mai i le maua i ni faamaʻi leaga. O le uiga foʻi lenā e tatau ona iai i mātua pe a mananaʻo e puipuia a latou fanau mai i amioga lē mamā e faaleagaina ai. O se tasi o auala e faia ai faapea, o le aʻoaʻoina lea o i latou i faamatalaga saʻo e uiga i feusuaʻiga. (Faataoto 5:3-23) E tāua tele le aʻoaʻoina e mātua o fanau ma avatu le taʻitaʻiga e tusa ai o amioga, ona ua faatupulaʻia le tele o ata matagā o feusuaʻiga i le televise, i le initaneti, i tusi faitau, ma tusi komi.

Ua faapea mai Diane Levin, o se polofesa tau aʻoaʻoga ma o se tusitala: “E lē faapea o le faafitauli o le iloa lea e a tatou fanau o mea e uiga i feusuaʻiga. Peitaʻi, o le faafitauli ona e sesē faamatalaga o loo latou aʻoaʻoina, o le lāiti tele o tausaga ua latou iloa ai nei mea, ma e sesē tagata ua latou aʻoaʻoina mai ai. Ua faaleaga ma faasesēina manatu o fanau e uiga i feusuaʻiga ona o faasalalauga ma āʻega fou.”

E tatau i mātua ona puipuia a latou fanau mai i manatu sesē ma le lē mamā lea ua faasolosolo ina faaleagaina ai manatu o tagata. (Faataoto 5:1; Efeso 6:4) E ao ona malamalama fanau iti i le auala e gaoioi ai o latou tino, tausia lelei ai, ma puipuia mai ai i tagata amio lē mamā. A o leʻi oo i le taimi e iai suiga i le tino o se talavou—o le taimi lea ua amata ona iai faalogona tau i feusuaʻiga—e tatau ona malamalama lou alo teine i suiga o le a tutupu i lona tino, ma le māfuaaga o le maʻi masina, ma pe e faapefea foʻi ona tupu. E faapena foʻi i se tama, e manaʻomia ona malamalama i le tulaga o le alu ese o le sua mai i lona tino a o moe. E mafai ona aʻoaʻo e mātua a latou fanau a o lāiti e uiga i igoa saʻo o vaega eseese o le tino. E aʻoaʻoina e mātua alolofa a latou fanau i mea tāua e tolu e uiga i nei vaega o le tino: (1) E faapitoa. (2) E lē tatau lava ona talanoaina i se auala leaga. (3) E lē tatau ona paʻi pe tilotilo i ai isi tagata. A o tuputupu aʻe fanau, e tatau i mātua ona filifili lelei se taimi e faamatala atu ai le auala e tō ai se fafine.a

O afea e tatau ai i mātua ona aʻoaʻo a latou fanau i nei mea? Aua le faatali seʻia oo ina avea ma talavou. Atonu e amata le maʻi masina o se teine i le 10 o ona tausaga pe e itiiti ifo foʻi. Ae atonu o le 11 po o le 12 o tausaga o se tama, o le taimi muamua lea e alu ese ai le sua mai i lona tino. O nei suiga o le olaga e mafai ona faapopoleina ai fanau, pe afai e latou te lē malamalama i le mea o loo tupu. A o leʻi tutupu na mea, e ao ona faamautinoa atu i fanau e leai se leaga pe a amata nei suiga i o latou tino. O le taimi foʻi lea e fesoasoani ai iā i latou, ina ia malamalama i le tāua ma le aogā o le usiusitaʻi i tapulaa tau amio a le Tusi Paia—o se mea e lē o faia e le tele o polokalame o aʻoaʻoga i faiga faaleituaiga.—Faataoto 6:27-35.

[Faaopoopoga i lalo]