O Ai e Mafai Ona Faamatalaina Valoaga?

Sa avea le noataga e taʻua o le Gordian o se mea na matuā iso ai tagata i aso o Alesana le Sili. Afai e mafai e se tasi ona talatalaina lenei noataga lavelave, e sili atu la ona atamai o ia ma e mafai ona manumalo i so o se mea.a Ua faapea mai le tala, na talatalaina e Alesana lenei noataga e ala i le sesele i lana pelu.

I LE faagasologa o tausaga, e lē gata sa taumafai nei tagata atamamai e talatala nei noataga lavelave, ae ua taumafai foʻi e faamatalaina tupua, faamatala valoaga, ma valoia mea o le a tutupu i le lumanaʻi.

Peitaʻi, o le tele o taimi e faigatā ai mo i latou ona faia faapea. O se faaaʻoaʻoga, sa lē mafai e tagata atamamai o Papelonia ona faamatalaina le tusitusiga na faavavega ona vaaia i le puipui o le maota o le tupu o Pelesara, a o faia sa latou tausamiga tele. E na o Tanielu le perofeta matua a Ieova le Atua, o lē na lauiloa i le ʻtalatalaina o mea faigatā,’ sa mafai ona faamatalaina le feʻau faavaloaga. (Tanielu 5:12) O lenā valoaga sa valoia ai le faatoʻilaloina o le Emepaea o Papelonia, ma sa faataunuuina i lenā lava pō!—Tanielu 5:1, 4-8, 25-30, O le Tusi Paia Samoa—Lomiga o le 1969.

O le ā le Uiga o le Upu Valoaga?

Ua faamatalaina le upu valoaga e faapea, o le faailoaina mai o le lumanaʻi, ma le faamauina o taimi o le a tutupu ai mea. O valoaga moni, o se feʻau faagaeeina ua tusia pe ua faamatalaina e se tasi, e faailoa mai ai se fuafuaga po o le finagalo paia. O loo i le Tusi Paia valoaga e uiga i le vaaia ma le iloaina o le Mesia, o “le taufaaiʻuiʻuga o le faiga o mea,” faapea foʻi ma feʻau faafaamasinoga mai i le Atua.—Mataio 24:3; Tanielu 9:25.

Ua taumafai “tagata atamamai” i aso nei i le faasaienisi, mataupu tau tamaoaiga, soifua mālōlōina, o mataupu fai, siʻosiʻomaga, ma isi lava matātā ina ia valoia le lumanaʻi. E ui lava ua tele ina faasalalauina nei valovaloga ma ua talia e le toʻatele, ae o nei valoaga ua faavae mai i manatu o tagata lava ia, ma o ni matematega e tusa ma mea ua latou iloa. E lē gata i lea, e tele lava ina feteenaʻi manatu uma e faaalia, ma e tulaʻi mai ai finauga. E mataʻutia lenei mea o le taumafai e valoia le lumanaʻi, ona e leai se tasi e na te iloaina.

Le Puna o Valoaga Moni

O fea la na amata mai ai valoaga? O ai e mafai ona faamatalaina? Na tusi le aposetolo o Peteru: “E leai se valoaga o i Tusitusiga Paia e tupuga mai i manatu o tagata.” (2 Peteru 1:20) O le upu Eleni ua faaliliuina i le “manatu” e mafai ona uiga atu i le “tali po o le faamatala,” lea e manatu iai “o so o se mea lava ua faamatalaina po ua faaalia mai, o mea ia ua loa ona tusia.” O loo faaliliuina upu a Peteru i le The Amplified New Testament e faapea: “Ua leai se valoaga o i le Tusi Paia e faamatala mai i manatu o tagata.”

Seʻi manatu i se tagata folau e tomai i le noanoaina o ni maea i se auala lavelave. Pe a uma ona ia faia faapea, e mafai lava e se tagata e lē tomai i lea tulaga ona vaaia le auala o loo noanoa ai nei maea, ae e na te lē iloa le auala e talatala ai. I se tulaga tutusa, e mafai e tagata ona vaaia mea o loo tutupu e iʻu atu ai i tulaga faigatā, ae e lē mafai ona latou iloa le mea o le a tupu i le lumanaʻi.

E leʻi iloiloina e perofeta faagaeeina matutua e pei o Tanielu mea na tutupu i o latou aso, ma taumafai loa e valoia le lumanaʻi. Pe afai na latou taumafai e valoia le lumanaʻi e tusa ai ma lenā auala, o lona uiga la e faavae mai na valoaga i o latou lava manatu. O le a avea na valoaga ma ni valovaloga a tagata, ma e lē lelei atoatoa lona faavae. Nai lo lea, na faailoa mai e Peteru: “E lē o loto o tagata na aumai ai valoaga, ae na tautatala tagata i mea na faailoa mai e le Atua e ala i le taʻitaʻiga a le agaga paia.”—2 Peteru 1:21.

ʻO le Atua e na te Faamatalaina Uiga o Mea’

I le pe ā ma le 3,700 tausaga ua mavae, na faafalepuipuiina ai ni tamāloloa se toʻalua i Aikupito ma sa faia ni a la miti mataʻina. Ona sa lē mafai ona talanoa atu i tagata atamamai o le atunuu, o lea, na la faamatalaina atu ai lo la fememeaʻi iā Iosefa, o sē na latou iai faatasi i le falepuipui e faapea: “Na faia ni a ma miti, ae e leai se isi e faamatalaina mai le uiga o ia mea iā i maʻua.” Na fai atu loa lenei auauna a le Atua ina ia faamatala ane a la miti ma ua faapea atu: “Pe e lē o le Atua ea e na te faamatalaina uiga o mea?” (Kenese 40:8) E na o Ieova le Atua e iai le tomai e faamatala ai valoaga, e pei lava ona mafai e se tagata folau tomai ona talatala ni noataga lavelave. E lē gata i lea, o le Atua lava ia na faia pe e noatia na valoaga i se auala e na o ia e mafai ona faamatalaina mai, pe a oo i lana taimi atofaina. O lea la, e tatau ona tatou faalagolago iā te Ia e faamatala mai le uiga o na mea. Ioe, sa talafeagai lelei le viiaina e Iosefa o le Atua.

O le ā le auala ua avea ai le Atua ma lē e “faamatalaina uiga o mea”? E tele auala ua faamaonia ai lenei tulaga. O loo faamauina i le Tusi Paia nisi o valoaga ma auala na faataunuuina ai. O lea la, e faigofie ona faamatalaina nei valoaga, e pei lava ona faigofie ona faamatala e se tagata folau le auala e talatala ai ni noataga.—Kenese 18:14; 21:2.

O nisi o valoaga e mafai ona faamatala ma talatalaina pe afai e iloilo faamatalaga o loo siʻomia ai lenā fuaiupu. Sa iloa e le perofeta o Tanielu i se valoaga “se mamoe poʻa . . . e iai ona seu e lua,” o tuia e se “ʻoti taufulufulua” e iai “se seu mataʻina i le va o ona mata.” Ua faaalia mai i faamatalaga o loo siʻomia ai lenā fuaiupu, o loo faasino atu le mamoe poʻa e iai ona seu e lua i le “tupu o Metai ma Peresia,” ma o le ʻoti o loo faasino atu i “le tupu o Eleni.” (Tanielu 8:3-8, 20-22) I le silia ma le 200 tausaga mulimuli ane, na amata ai ona faatoʻilalo e “le seu telē” o Alesana le Sili le malo o Peresia. Na taʻua e se tusitala o talafaasolopito, a o tauina e Alesana ma lana ʻautau ni taua i vaipanoa e lata ane i Ierusalema, na faaali atu ai iā Alesana lenei valoaga ma sa ia manatu o loo faatatau iā te ia.

E iai se isi auala na avea ai le Atua ma lē e “faamatalaina uiga o mea.” O le taʻitaʻiga a le agaga paia, na mafai ai e Iosefa le auauna faamaoni a le Atua ona malamalama i uiga o miti a pagota sa latou falepuipui faatasi. (Kenese 41:38) I aso nei, pe afai e lē malamalama auauna a le Atua i le uiga o se valoaga patino, ona latou tatalo lea mo lona agaga ma suʻesuʻe ma le filigā, ma saʻili i le Afioga a le Atua lea ua faagaeeina e lona agaga. O le taʻitaʻiga a le Atua o le a mafai ai ona latou maua mau, e malamalama atili ai i le uiga o nisi o valoaga. E lē o toe faavavega ona faamatala e se tasi mea lilo i aso nei. O le a faailoa manino mai e le Atua uiga o nei valoaga, e ala i le fesoasoani a lona agaga ma lana Afioga, ae e lē ala mai i tagata vavalo.—Galuega 15:12-21.

O le “faamatalaina [o] uiga o mea” e le Atua, e aofia ai le iā te ia o le pule i le taimi tonu e ao ai ona malamalama ana auauna faamaoni i le lalolagi i uiga o valoaga. E mafai ona iloa le uiga o se valoaga a o leʻi tupu, a o faagasolo ona tupu, po o le māeʻa foʻi ona tupu. Talu ai o le Atua na noatia pe na faia nei valoaga, o lea la, o le a ia faamatalaina nei mea i le taimi talafeagai, o lana taimi atofaina lea.

I le tulaga o Iosefa ma pagota e toʻalua, na faamatalaina e Iosefa a la miti a o toe tolu aso ona faataunuuina lea. (Kenese 40:13, 19) Mulimuli ane, ina ua aumaia Iosefa i luma o le tupu malosi o Farao e faamatala miti a le tupu, o le taimi lenā o le a amata tausaga e fitu e tele ai meaʻai i le nuu. O le agaga o le Atua na faamatalaina ai e Iosefa le uiga o miti a Farao, ina ia mafai ona faia sauniuniga e faaputu le tele o fua o faaeleeleaga na valoiaina.—Kenese 41:29, 39, 40.

Na faatoʻā mafai ona malamalama atoatoa auauna a le Atua i nisi o valoaga, ina ua uma ona faataunuuina. O le tele o mea na tutupu i le soifuaga o Iesu, na valoiaina mo le tele o senituri a o leʻi fanau o ia, ae na faatoʻā malamalama atoatoa iai ona soo ina ua mavae lona maliu. (Salamo 22:18; 34:20; Ioane 19:24, 36) O le manatu mulimuli, e tusa ai ma le Tanielu 12:4, e iai nisi o valoaga patino o le a “faamauina . . . seʻia oo i le taimi o le iʻuga,” lea “o le a faatuputeleina [ai] le poto saʻo.” O loo tatou ola nei i le taimi tonu o loo faataunuu ai na valoaga.b

Valoaga a le Tusi Paia ma i Tatou

Sa tutū Tanielu ma Iosefa i luma o tupu i o la aso, ma taʻu atu feʻau faavaloaga na aafia ai atunuu ma malo. I le uluaʻi senituri, sa tutū Kerisiano i luma o tagata ma avea o ni perofeta po o ni fofoga fetalai a Ieova o le Atua o valoaga, ma sa tele ni aogā na maua e ē na tali ane i na feʻau.

Ua faalauiloa atu e Molimau a Ieova i aso nei se feʻau faavaloaga, o le tala lelei lea o le Malo o le Atua, ma taʻu atu i tagata o lea ua faataunuuina le valoaga a Iesu e uiga i le “taufaaiʻuiʻuga o le faiga o mea.” (Mataio 24:3, 14) Pe e te iloa lenā valoaga ma le auala o le a aafia ai oe? E fiafia Molimau a Ieova e fesoasoani iā te oe ina ia e malamalama, ma maua aogā mai i se tasi o valoaga e sili ona tāua o le Tusi Paia.

[Faaopoopoga i lalo]

[Ata i le itulau 13]

Sa viia uma e Iosefa ma Tanielu le Atua ina ua la faamatalaina valoaga