Ua Iai Nei ni Suiga i le Lomiga mo Suʻesuʻega!
Ua iai nei ni fetuunaʻiga i le lomiga mo suʻesuʻega ina ia manaia atili i le vaai, ma fesoasoani i au suʻesuʻega e faatatau i upu moni matagofie o le Afioga a Ieova.—Sala. 1:2; 119:97.
Ua fā nei tausaga talu ona lomia lomiga e lua o Le Olomatamata, o le isi mo le lautele ae o le isi mo i tatou uma o Molimau a Ieova, ma a tatou tagata aʻoga o le Tusi Paia o loo agaʻigaʻi i luma faaleagaga.
Na tusi se tasi ua loa ona auauna iā Ieova e faatatau i le lomiga mo suʻesuʻega: “E ese le matagofie ma loloto o mataupu o loo aumaia ai—o loʻu faalogona muamua lenā e faatatau i le uluaʻi lomiga mo suʻesuʻega o Le Olomatamata. O le loloto o le gagana ma faaupuga faaleagaga o loo iai, na matuā pāʻia ai loʻu loto. Ou te matuā lotofaafetai mo lenei sauniuniga fou matagofie.” Na tusi se isi uso e faapea: “Ou te tulimataʻi e faaalu se taimi tele e suʻesuʻe ai le lomiga mo suʻesuʻega faatasi ma laʻu Tusi Paia.” E matou te mautinoa o lou faalogona foʻi lenā.
E pei ona outou iloa, na lomia Le Olomatamata talu mai le 1879, o se galuega e lē mafai ona faataunuuina pe ana lē seanoa le agaga o Ieova ma lana faamanuia. (Saka. 4:6) Talu mai nei tausaga e 133, ua iai nisi o suiga i le faavaa o le lomiga. I le 2012, o le a iai i le faavaa o lomiga taʻitasi mo suʻesuʻega se ata o loo faaalia ai ni tagata talaʻi, e faamanatu mai ai iā i tatou lo tatou tofiga mai i le Atua, o le molimau māeʻaeʻa atu lea e faatatau i le Malo o Ieova. (Galu. 28:23) I le pito i totonu o le faavaa i le itulau e 2, o loo taʻu mai ai le atunuu na puʻe ai le ata, atoa ai ma se faamatalaga puupuu e faatatau i le mea o loo faia ma le nofoaga o loo tupu ai. A o faagasolo le tausaga, o lenei auala o le a faamanatu mai ai iā i tatou uma e faapea, o loo talaʻia e tagata o Ieova le tala lelei “i le lalolagi atoa.”—Mata. 24:14.
O ā isi suiga ua faia i lenei lomiga? Ua tuu mai i le amataga o mataupu taʻitasi mo suʻesuʻega le pusa autalu. O lenei faiga o le a faamatilatila atu ai iā te oe manatu autū e tatau ona e suʻeina, a o e faitauina ma suʻesuʻeina le mataupu. O le a manaʻo lē e faia le suʻesuʻega o Le Olomatamata e faaauau ona faaaogā nei fesili, ina ia autalu ai le mataupu i le faaiʻuga o le suʻesuʻega. O le a e mātauina ua tetelē avanoa i autafa o itulau ma ua faalapopoʻa teisi numera o itulau ma palakalafa.
E pei ona faamatalaina i le lomiga o lenei masina, ua iai se faasologa o mataupu fou ua faaulutalaina “Mea Iloga o lo Tatou Talafaasolopito,” ua faaopoopo iai ina ia faaalia ai mea mataʻina o loo tutupu i le talafaasolopito o Molimau a Ieova. E lē gata i lea, o le a lomia talaaga o soifuaga i lalo o le ulutala “Ua Lotomalilie e Ofo Atu i Latou Lava.” O le a faamatala manino i nei mataupu le olioli, faamalieina, ma le fiafia ua maua e uso ma tuafāfine, e ala i le galulue i vaipanoa o loo sili ona manaʻomia ai ni tagata talaʻi o le Malo.
Tau ina ia e maua le fiafia a o e faaalu le taimi e suʻesuʻe ai le Afioga a le Atua faatasi ma le fesoasoani a lenei lomiga.
O Ē na Lomiaina
[Ata i le itulau 3]
1879
[Ata i le itulau 3]
1895
[Ata i le itulau 3]
1931
[Ata i le itulau 3]
1950
[Ata i le itulau 3]
1974
[Ata i le itulau 3]
2008