Evagelia Faa-Apokerifa​—Po o ni Upu Moni o Loo Natia e Uiga iā Iesu?

“O SE mea mataʻina lenei! E toʻatele tagata o le a lē fiafia.” “Ua suia ai le talafaasolopito o uluaʻi Kerisiano.” O faamatalaga nei a se tagata atamai na taliaina lomiga o le“Gospel of Judas,” o ni tusitusiga na manatu iai ua leva ona leiloloa mo le silia i le 16 senituri (e pei ona faaalia i luga).

Ua toe fiafia tagata i nei evagelia faa-apokerifa. Ua faapea mai nisi, o nei tusitusiga o loo faailoa mai ai mea iloga na tutupu ma aʻoaʻoga mai i le olaga o Iesu, ia ua leva ona natia. Ae o ā nei evagelia faa-apokerifa? Pe e mafai moni lava ona aʻoaʻoina ai i tatou i upu moni e uiga iā Iesu ma le faa-Kerisiano, ia e faapea e lē o maua i le Tusi Paia?

Evagelia Faale-Tusi Paia ma le Faa-Apokerifa

I le va o le 41 ma le 98 T.A., na tusia ai e Mataio, Mareko, Luka, ma Ioane “le gafa o Iesu Keriso.” (Mataio 1:1) O nisi taimi e taʻua ai nei tusitusiga o evagelia, o lona uiga o “tala lelei” e uiga iā Iesu Keriso.—Mareko 1:1.

E ui lava e iai uputuu ma isi tusitusiga e uiga iā Iesu, ae e na o Evagelia nei e fā na faagaeeina e le Atua ma avea o se vaega o Tusitusiga Paia, ia e faailoa ai “le moni o aʻoaʻoga” e uiga i le olaga o Iesu i le lalolagi, ma ana aʻoaʻoga. (Luka 1:1-4; Galuega 1:1, 2; 2 Timoteo 3:16, 17) O loo taʻua nei Evagelia e fā i le lisi o tusi anamua, o Tusitusiga Paia Eleni. E lē mafesiligia le saʻo aʻiaʻi o nei tusi, ma le avea o se vaega o le Afioga faagaeeina a le Atua.

I le taimi lenei, e iai isi tusitusiga ua manatu i ai tagata o ni evagelia. O na evagelia e taʻua o apokerifa.a

I le faaiʻuga o le senituri lona lua, na tusi ai Irenaeus mai i Lyon e faapea, “e tele tusitusiga lē moni ma apokerifa,” o loo iai i ē ua fulitua i le faa-Kerisiano, e aofia ai ma evagelia “na fatuina e i latou lava, ina ia faafenuminumiaʻi ai mafaufau o tagata e taaʻinagofie.” O lea, na manatu ai i evagelia faa-apokerifa o ni tusi e lē tatau ona iai i se tasi, pe e faitau foʻi i ai.

Peitaʻi, na teuina pea na tusitusiga e monike anamua ma i latou na galulue e toe tusia tusi. I le senituri lona 19, ina ua maua le tele o tusitusiga ma faaliliuga eseese faa-apokerifa e aofia ai ma ni evagelia, na faateteleina le fiafia i ai o tagata. I aso nei, ua faaliliuina le tele o na tusi i gagana autū o loo iai nei.

Evagelia faa-Apokerifa: Tala Fatu e Uiga iā Iesu

E masani ona faatāua i evagelia faa-apokerifa ni tagata e lē masani ona taʻua, pe e lē o taʻua foʻi i evagelia o le Tusi Paia, po o ni mea foʻi na tutupu a o laʻitiiti Iesu. Seʻi mātau nei faaaʻoaʻoga.

◼ I le “Proto-Gospel of James,” lea e taʻua foʻi o le “The Birth of Mary,” o loo faamatala ai le fanau mai o Maria, i le taimi a o laʻitiiti, faapea ai ma lona faaipoipo atu iā Iosefa. Ua fetaui ai la ona taʻua ia tala o tala faalotu ma o ni talatuu. O loo faaauiluma ai le manatu e faapea o loo tumau pea ona avea Maria ma taupou, ma e manino mai, na tusia ina ia viiviia ai o ia.—Mataio 1:24, 25; 13:55, 56.

◼ I le “Infancy Gospel of Thomas,” o loo faamatala ai le soifuaga o Iesu a o 5 ona tausaga seʻia oo i le 12, ma o loo taʻuleleia ai o ia i le faia o le tele o vavega e lē moni. (Tagaʻi i le Ioane 2:11.) O loo taʻua ai o Iesu o se tamaitiiti ulavale, itaitagofie, e tauimasui, o lē e faaaogāina lona mana faivavega e tauimasui atu ai i faiaʻoga, tuaoi, ma isi tamaiti, ma sa ia faatauasoina nisi o i latou, faapipili, pe e fasiotia foʻi.

◼ O nisi o evagelia faa-apokerifa, e pei o le “Gospel of Peter,” o loo taulaʻi atu i mea na tutupu iā Iesu, e pei o lona faamasinoga, lona maliu, ma le toe faatūina o ia. O isi tusi e pei o le “Acts of Pilate,” lea e mai i se vaega o le “Gospel of Nicodemus,” o loo faamatala ai tagata na iai i na mea na tutupu. E lē maufaatuatuaina nei tusitusiga ona o nei tala na fatuina, ma e lē o iai se faamaoniga na soifua moni tagata o loo taʻua ai. I le “Gospel of Peter,” o loo taʻuleleia ai Ponotio Pilato ma o loo faamatala ai i se auala logomālie le toetū o Iesu.

Evagelia faa-Apokerifa ma le Fulitua i le Faa-Kerisiano

I a Tesema i le 1945, e lata ane i Nag Hammadi, i le vaega pito i luga o Aikupito, na maua ai e ni tagata faatauvaa ni manusikulipi e 13 e faia mai i paʻu laau, ma o loo iai ni tusitusiga e 52. Na tuuina atu nei tusitusiga mai i le senituri lona fā, i se vaega faalotu ma faifilosofia e taʻua o le ʻau Notisi. O le tuufaatasi o talitonuga faalilolilo, faapaupau, filosofia Eleni, le faa-Iutaia, ma le faa-Kerisiano, ua telē ai se aafiaga leaga i tagata ua faapea mai o Kerisiano.—1 Timoteo 6:20, 21.

I le “Gospel of Thomas,” “Gospel of Philip,” ma le “Gospel of Truth,” ia o loo iai i “tuufaatasiga o manusikulipi na maua e latalata i Nag Hammadi,” o loo faaalia ai manatu lilo eseese o le ʻau Notisi, e peiseaʻī o ni aʻoaʻoga a Iesu. Ua avea foʻi le “Gospel of Judas” lea na maua talu ai nei, o se vaega o evagelia faa-Notisi. O loo taʻuleleia ai Iuta e faapea e na o ia le aposetolo na malamalama lelei iā Iesu. Na taʻua e se tagata atamai i nei evagelia e faapea, o loo faamatalaina ai foʻi Iesu o se “faiaʻoga ma o sē e faailoa mai le poto ma le atamai, ae e lē o ia o se faaola na maliu mo agasala a le lalolagi.” Ae o loo aʻoaʻoina i Evagelia faagaeeina le maliu o Iesu e fai ma taulaga mo agasala a le lalolagi. (Mataio 20:28; 26:28; 1 Ioane 2:1, 2) E manino mai, o evagelia faa-Notisi ua taʻufaatauvaa ai le Tusi Paia, nai lo o le faamalosia ai o le faatuatua o tagata i le Tusi Paia.—Galuega 20:30.

E Sili Atu Evagelia o le Tusi Paia

O le iloiloina totoʻa o evagelia faa-apokerifa, ua faalialia ai le sesē o na tusitusiga. Pe a faatusatusa ma Evagelia o le Tusi Paia, ona mautinoa ai lea, e lē faagaeeina e le Atua evagelia faa-apokerifa. (2 Timoteo 1:13) Ona na tusia na tusitusiga e ni tagata e matuā lē iloa Iesu po o ona aposetolo, e faaalia ai la e lē o natia i na tusitusiga ni upu moni e uiga iā Iesu ma le faa-Kerisiano. Ae o loo iai faamatalaga lē moni, tala fatu, ma tala e logomālie i le faalogo, ia e lē fesoasoani iā i tatou ina ia iloa ai Iesu ma ana aʻoaʻoga.—1 Timoteo 4:1, 2.

I le isi itu, o Mataio ma Ioane o ni sui o le ʻauaposetolo e toʻa 12; ma o Mareko ma Luka o ni uō lelei a le aposetolo o Peteru ma Paulo. Na tusia a latou Evagelia e ala i le taʻitaʻiga a le agaga paia o le Atua. (2 Timoteo 3:14-17) O māfuaaga nei e faapea atu ai, o loo iai i nei Evagelia e fā faamatalaga uma e manaʻomia, ina ia talitonu ai se tasi o “Iesu o le Keriso, o le Alo o le Atua.”—Ioane 20:31.

[Faaopoopoga i lalo]

[Ē Ana le Ata i le itulau 18]

Kenneth Garrett/National Geographic Stock