Le Auala e Avea ai o ni Tagata Tapuaʻi Faamaoni ma Tagatānuu Amiolelei

O Ā MEA e lua na matilatila i le faiva a Iesu? Muamua, na taumafai Iesu e faaliliu loto o tagata ae e lē o faalapotopotoga faapolotiki. O se faaaʻoaʻoga, mātau le manatu na faamamafa e Iesu i lana Lauga i le Mauga. A o leʻi talanoa i le manaʻomia ona avea ma masima ma malamalama, sa ia fai atu i ona soo, e maua le fiafia moni e i latou “e naunau i mea faaleagaga.” Na faaopoopo atili atu: “E fiafia o ē e agamalu, . . . lotomamā, . . . [ma] faatupuina le filemu.” (Mataio 5:1-11) Na fesoasoani Iesu i ona soo ina ia iloa le tāua o le fetuunaʻi o o latou manatu, ma faalogona e tusa ai ma tapulaa a le Atua i le mea e lelei ma le mea e leaga, ma le tāua o le auauna i le Atua ma le lotoatoa.

Lona lua, ina ua vaai Iesu i mafatiaga o tagata, ona uunaʻia lea o ia e lona alofa ina ia faaitiitia tigā o tagata. Peitaʻi, e leʻi fai ma ona sini le aveesea atoatoa o mafatiaga uma. (Mataio 20:30-34) Na ia faamālōlōina tagata mamaʻi, ae e leʻi aveesea atoatoa ai maʻi. (Luka 6:17-19) Na ia aumaia le mapusaga i ē na feagai ma faiga lē tonu, ae na tumau pea ona iai mafatiaga ona o le lē faamasinotonu. Na ia saunia meaʻai mo ē na fia aai, ae na tumau pea ona mafatia tagata ona o oge.—Mareko 6:41-44.

Faaliliu Loto ma Faaitiitia Mafatiaga

Aiseā na taulaʻi atu ai Iesu i le faaliliuina o loto, ma le faaitiitia o mafatiaga, nai lo o le suia o faalapotopotoga po o le aveesea atoatoa o mafatiaga? Na iloa lelei e Iesu, e finagalo Ieova e faaaogā Lona Malo i se taimi o i luma, ina ia aveesea ai faigāmalo a tagata ma pogai o mafatiaga uma. (Luka 4:43; 8:1) O lea la, ina ua uunaʻia Iesu e ona soo ina ia faaalu le tele o le taimi e faamālōlō ai maʻi, na tali atu o ia e faapea: “Seʻi tatou ō atu ia i se isi nofoaga, i aai o loo latalata mai, ina ia ou talaʻi atu ai, auā o le mea lea na ou sau ai.” (Mareko 1:32-38) E ui lava na faaitiitia e Iesu mafatiaga o le toʻatele, ae na ia faamuamua le talaʻia ma le aʻoaʻoina o le afioga a le Atua.

I aso nei, e taumafai malosi Molimau a Ieova ina ia faaaʻoaʻo iā Iesu a o faia la latou galuega talaʻi. Ua uunaʻia i latou ina ia faaitiitia mafatiaga e ala i le avatu o fesoasoani aogā i ē o loo manaʻomia. Ae e lē taumafai Molimau ina ia aveesea atoatoa le lē faamasinotonu mai i le lalolagi. E latou te talitonu, o le a aveesea e le Malo o le Atua ia pogai o mafatiaga uma. (Mataio 6:10) I le pei o Iesu, e latou te taumafai e faaliliu loto o tagata, ae e lē o faalapotopotoga faapolotiki. E talafeagai lenā manatu, auā o amioga le faafitauli autū o tagata, ae e lē o faiga faapolotiki.

Tagatānuu Amiolelei

I le taimi e tasi, e manatu Molimau a Ieova o lo latou tiute tauave faa-Kerisiano le avea ma tagatānuu amiolelei. O lea, e latou te faamamaluina ma faaaloalogia pule o malo. O a latou lomiga o loo faaaogā i le talaʻiga, o loo faalaeiau ai tagata ina ia tausia le tulafono. Peitaʻi, e latou te lē mulimuli i faatonuga a malo, pe afai e faatonu i latou e faia ni mea e feteenaʻi ma le finagalo o le Atua. E latou te “usiusitaʻi i le Atua o le pule, nai lo o tagata.”—Galuega 5:29; Roma 13:1-7.

E asiasi Molimau a Ieova i tagata uma, e ofo atu ni aʻoaʻoga faale-Tusi Paia e aunoa ma se totogi. O nei aʻoaʻoga ua suia ai loto o le faitau miliona o tagata. I tausaga taʻitasi, e faitau selau afe i latou ua tuua masaniga leaga sa iai e pei o le ulaula, onā, faaaogā sesē o fualaau faasāina, taaloga faitupe, ma feusuaʻiga lē mamā. Ua avea i latou o ni tagatānuu amiolelei ona ua faatatauina mataupu silisili o le Tusi Paia i o latou olaga.—Tagaʻi i le mataupu “E Mafai e le Tusi Paia Ona Suia Olaga,” i le itulau e 18 o lenei mekasini.

E lē gata i lea, ua fesoasoani nei aʻoaʻoga faale-Tusi Paia i sui taʻitoʻatasi o le aiga, ina ia matuā faaaloalo le tasi i le isi, ma ia faaleleia fesootaʻiga i le va o le tane ma le avā, o mātua ma fanau, faapea le va o fanau lava ia. O nei fesootaʻiga e faamalosia ai pea le autasi o le aiga. O aiga lelei, e iʻu atu ai i le mauaina o ni nuu lelei.

O le ā sou iloa e tusa ai ma manatu na iloiloina: Po o faamaonia mai i le Tusi Paia i latou o loo lagolagoina i le taimi e tasi lotu ma faiga faapolotiki? E manino le tali, e leai. Ae pe e tatau ona avea Kerisiano moni o ni tagatānuu amiolelei? Ioe, e tatau. E faapefea ona latou faia faapea? E ala i le mulimuli i le faatonuga a Iesu, i le avea lea o i latou e pei o ni masima ma malamalama o le lalolagi.

O ē e taumafai malosi e faatatau poloaʻiga nei a Keriso, o le a maua e i latou ma o latou aiga ma nuu ni aogā. E fiafia Molimau a Ieova e faasoa atu nisi faamatalaga atili e uiga i le polokalame o aʻoaʻoga faale-Tusi Paia, lea o loo faia i lou vaipanoa.a

[Faaopoopoga i lalo]

[Faamatalaga faaopoopo i le itulau 10]

Na taumafai Iesu ina ia faaliliu loto, ae e lē o faalapotopotoga faapolotiki

[Faamatalaga faaopoopo i le itulau 11]

E manatu Molimau a Ieova, o lo latou tiute tauave le avea ma tagatānuu amiolelei