Aʻoaʻoga a le Tusi Paia
E Faapefea Ona Taaʻina e Agelu ma Agaga Leaga o Tatou Olaga?
O loo talanoaina i lenei mataupu fesili atonu e te fia malamalama i ai, ma mau o le Tusi Paia e maua ai tali. E fiafia Molimau a Ieova e tou te talanoa i tali o na fesili.
1. O ai agelu?
O agelu, o foafoaga agaga e ola i le lagi. E sili atu ona maualuga o latou tulaga i lo o tagata. O le Atua moni, o ia o le agaga, ma o ia foʻi na foafoaina agelu a o leʻi foafoaina le lalolagi. (Iopu 38:4, 7; Mataio 18:10) O loo siʻomia Ieova i le faitau miliona o agelu faamaoni.—Faitau le Salamo 103:20, 21; Faaaliga 5:11.
2. Pe e fesoasoani agelu i tagata?
Na fesoasoani agelu i se tagata amiotonu e suafa iā Lota. Na nofo o ia i se aai ua uma ona faia ai e le Atua le faaiʻuga o le a faaumatia, ona o le amioleaga o tagata. Na lapataʻia e ni agelu se toʻalua ia Lota ma lona aiga ina ia sosola ese, ae na manatu nisi i lenei lapataʻiga o se tala tausua, ma e latou te leʻi amanaʻiaina. Ae na faasaoina Lota ma ona afafine, ona o le usitaʻia o le lapataʻiga mai i le Atua e ala i agelu.—Faitau le Kenese 19:1, 13-17, 26.
E tusa ai ma le Tusi Paia, e fesoasoani agelu i tagata i aso nei, e ala i le taʻitaʻia o le galuega a ē faamaoni o loo talaʻia le tala lelei o le Malo o le Atua. (Mataio 24:14) O le tala lelei e aofia ai ma lapataʻiga. E pei o le lapataʻiga na tuuina atu iā Lota, sa lē o se tala ula, ae e mai i le Atua e ala i agelu.—Faitau le Faaaliga 1:1; 14:6, 7.
E mafai ona faaaogā e le Atua agelu e faamalosia i tatou i taimi e fesagaʻi ai ma faigatā. Na ia faaaogā foʻi se agelu e faamalosia ai Iesu.—Faitau le Luka 22:41-43.
E lē o toe umi ona faaaogā loa lea e Ieova agelu i se isi auala—o le tafiesea lea o tagata amio leaga o loo faapogaia mafatiaga. O lenā mea o le a aumaia ai se mapusaga mo le fanau a tagata.—Faitau le 2 Tesalonia 1:6-8.
3. E faapefea ona tatou aafia i temoni?
E pei ona toʻatele tagata i le lalolagi e faia mea leaga e ala i le lē usiusitaʻi i le Atua, e faapena foʻi ona tele agelu i le lagi sa fouvale iā te Ia. (2 Peteru 2:4) Ua taʻua agelu lē usiusitaʻi o temoni, ma o loo taʻitaʻia i latou e Satani le Tiapolo. O loo faasesē e Satani ma ana temoni le fanau a tagata.—Faitau le Faaaliga 12:9.
E faaaogā e Satani pisinisi faapiʻopiʻo, malo faaletagata, ma tapuaʻiga sesē, ina ia taaʻina ma faaliliuese tagata mai i le Atua. O lea la, o Satani o loo faapogaia faiga lē tonu, faiga sauā, ma mafatiaga ia o loo pagatia ai le fanau a tagata.—Faitau le 1 Ioane 5:19.
4. E faapefea ona faasesē e temoni tagata?
Ua faasesē e Satani tagata i aʻoaʻoga e faapea, a oti le tagata ona avea lea ma agaga, ma e fesootaʻi mai i tagata ola. A ua faapea mai le Tusi Paia, o ē ua oti e lē toe iloa se mea. (Failauga 9:5) Ua faasesē foʻi e temoni tagata i le faataʻitaʻi mai o le leo o sē ua maliu. (Isaia 8:19) Ua taʻitaʻisesē foʻi e temoni isi e ala i faiga faataulāitu, valovaloga, o ē faia valovaloga, ma ē iite i fetu. A ua lapataʻi mai le Tusi Paia ia ʻalofia le faia o na mea uma. O lea e tatau ai ona lafoaʻi mea uma o loo iā i tatou, e fesootaʻi i temoni ma faiga faataulāitu.—Faitau le Teuteronome 18:10, 11; Galuega 19:19.
Pe afai e tatou te alolofa iā Ieova, e leai la se māfuaaga e fefefe ai fua i temoni. O le suʻesuʻe i le Tusi Paia ma faia mea o loo faatonu mai ai, ua tatou tetee atu ai i le Tiapolo ma mafuta vavalalata atu i le Atua. E sili atu ona malosi Ieova i lo o temoni. E mafai e ana agelu faamaoni ona faamalosia i tatou i taimi e manaʻomia ai.—Faitau le Salamo 34:7; Iakopo 4:7, 8.
Mo nisi faamatalaga, tagaʻi i le mataupu e 10 o lenei tusi, O Ā Aʻoaʻoga Moni a le Tusi Paia?, lomia e Molimau a Ieova.