TALIINA FESILI FAALE-TUSI PAIA
Pe e mafai ona fesoasoani mai agelu iā i tatou?
E pei ona fesoasoani se agelu i le auauna faamaoni a le Atua o Tanielu, e faapena foʻi ona fesoasoani agelu i tagata i aso nei, ina ia maua aogā mai i le tala lelei
Na foafoaina e Ieova le Atua le faitau miliona o agelu a o leʻi taitai faia le tagata. (Iopu 38:4, 7) O nei foafoaga agaga malolosi o loo auauna atu i le Atua, ma o nisi taimi e auina atu e taʻitaʻia ma puipuia Ana auauna i le lalolagi. (Salamo 91:10, 11) I aso nei, o loo fesoasoani agelu i tagata lotofaamaoni e ala i le taʻitaʻi atu o soo o Iesu e faailoa atu i ai le tala lelei.—Faitau le Faaaliga 14:6, 7.
Pe e tatau ona tatou tatalo i agelu mo se fesoasoani? E leai. O le tatalo o se vaega o le tapuaʻiga ma e na o le Atua e tatau i ai. (Faaaliga 19:10) Talu ai o agelu o auauna a le Atua, e faatalitalia la i latou e usitaʻi i faatonuga a le Atua ae lē o tagata. O lea, e tatau ona taulaʻi saʻo atu a tatou tatalo i le Atua e ala atu iā Iesu.—Faitau le Salamo 103:20, 21; Mataio 26:53.
Pe e iai ni agelu leaga?
E pei o tagata, na foafoaina foʻi agelu ma tuu i ai le filifiliga saʻoloto e filifili ai i le mea saʻo po o le mea sesē. Ae pagā lea, ua fouvale le toʻatele o agelu i le Atua. (2 Peteru 2:4) O lē na muamua filifili e faia faapea o Satani, ma mulimuli ane fouvale foʻi isi agelu ia ua avea ma temoni. E leʻi leva atu ona tuliesea Satani ma ana temoni mai i le lagi, ma lafo mai i le lalolagi.—Faitau le Faaaliga 12:7-9.
O le faatupulaʻia o mea leaga ma faiga sauā talu mai le tausaga e 1914, ua faamaonia ai ua toeitiiti ona faaumatia lea e le Atua o Satani ma ana temoni. Pe a māeʻa lenā, ona toe faafoʻisia lea e le Atua o le lalolagi i lona tulaga sa iai muamua.—Faitau le Faaaliga 12:12; 21:3, 4.