Le Agaga o le Kerisimasi

“E faigofie ona matuā aafia i le vevesi o lenei vaitau. Ua avea tū ma aga e masani ai i le Kerisimasi o se mea e tau ina fai, ma e lē lava ai le taimi e faaalu faatasi ma uō ma aiga. O nisi taimi e liua ai le olioli i le tele o mea e popole ai le mafaufau.”—BRAD HENRY, LĒ SA AVEA MA KOVANA O OKLAHOMA, AMERIKA, TESEMA 23, 2008.

A O LATA i le Kerisimasi, e faaalia i pese, ata tifaga, ma polokalame i le TV, le fiafia ma le olioli o le agaga o lenā vaitau. O le ā le sini e te manatu e sili ona tāua i lenā vaitau? Po o le

● Manatuaina o Iesu Keriso?

● Mauaina o le olioli ona o le foaʻi atu?

● Fesoasoani i ē mafatia?

● Faatasitasi ma aiga?

● Faaauiluma ai le filemu?

E pei o le faamatalaga a le kovana o Henry, e faigatā i le toʻatele o loo faamanatuina le Kerisimasi ona ausia sini o loo taʻua i luga. O taimi o le Kerisimasi e masani ona matuā pisi, popole ai le mafaufau, ma e sili atu i lenā, e alu ai le tele o tupe. Pe e mafai ona maua le olioli ma le alofa lea e faapea o se vaega o le Kerisimasi?

O le mea moni o loo faalaeiauina i tatou e le Tusi Paia ina ia manatua Iesu Keriso, foaʻi atu, fesoasoani i ē matitiva, faatasitasi ma aiga, ma o loo aʻoaʻoina ai foʻi i tatou i le auala e tausia ai le filemu. O lea, nai lo o le talanoa i māfuaaga ua lē faamanatu ai e isi le Kerisimasi,a ae o le a talanoaina i lenei faasologa o mataupu fesili nei:

● O ā manatu o isi i le māfuaaga e tatau ai ona faamanatu le Kerisimasi?

● Aiseā e faigatā ai ona maua le olioli ma le alofa, lea e faapea o se vaega o le Kerisimasi?

● O ā mataupu silisili o le Tusi Paia ua fesoasoani i le faitau miliona o tagata e maua se mea e sili atu i le Kerisimasi?

[Faaopoopoga i lalo]