TALIINA FESILI FAALE-TUSI PAIA

O ai le suafa o le Atua?

E iai uma igoa o sui taʻitasi o le aiga, e oo lava foʻi i fagafao. Pe e lē tatau la ona iai se suafa o le Atua? I le Tusi Paia, e tele taʻu e faasino atu i le Atua, e pei o le Atua o Lē e ona le malosi uma lava, Alii Pule Silisili Ese, ma Lē na foafoaina mea uma. Ae e iai foʻi sona suafa patino.​—Faitau le Isaia 42:8.

E finagalo le Atua ia iloa e tagata uma lona suafa patino. O loo taʻua i le Salamo 83:18: “O oe e ou le suafa o Ieova, e na o oe lava o Lē e Silisili Ese i le lalolagi uma.”

Aiseā e tatau ai ona tatou faaaogā le suafa o le Atua?

E finagalo le Atua ia tatou faaaogāina lona suafa patino. E tatou te faaaogāina suafa o i latou e tatou te alolofa i ai e pei o uō mamae pe a tatou talanoa atu iā i latou. Pe e lē o le mea foʻi lenā e tatau ona fai pe a talanoa atu i le Atua? E lē gata i lea, na faalaeiauina i tatou e Iesu Keriso e faaaogā le suafa o le Atua.​—Faitau le Mataio 6:9; Ioane 17:26.

Peitaʻi, i le avea ai ma uō a le Atua, e sili atu mea e manaʻomia ona tatou iloa e faatatau iā te ia, nai lo o le tau ina iloa lona suafa. O se faataʻitaʻiga, e faapeʻī uiga o le Atua? Pe e mafai moni ona mafuta vavalalata atu i le Atua? E mafai ona e maua tali o na fesili i le Tusi Paia.