E TE SILAFIA?
Na faapefea ona saunia tino o tagata oti i Iutaia anamua?
I Iutaia, e masani ona tanuina ē e maliliu i le aso lava e maliliu ai i latou. Aiseā? Ona e vave ona pala le tino oti i le vevela o le tau, ma e manatu tagata, o le tuu umi o le tino oti o se lē faaaloalo lea i lē ua maliu faapea lona aiga.
O loo taʻua i tusi Evagelia ma le Galuega ni maliu se fā na tanuina i le aso lava na maliliu ai i latou. (Mataio 27:57-60; Galuega 5:5-10; 7:60–8:2) Ina ua maliu le avā a Iakopo o Rasela a o alu sa latou faigāmalaga, e leʻi toe foʻi Iakopo e tanu o ia i le fanua tanu o lo latou aiga. Nai lo lea, sa tanu ai lava o ia “i le ala i . . . Peteleema.”—Kenese 35:19, 20, 27-29.
O tala i le Tusi Paia ua iloa ai le matuā lelei ona saunia e tagata Iutaia o tino o o latou tagata oti. E latou te faatāʻele lē ua maliu, uu i suāuu manogi, ona tāʻai lea i ʻie. (Ioane 19:39, 40; Galuega 9:36-41) E ō mai foʻi tuaoi ma isi ma faamāfanafana i le aiga o loo mafatia.—Mareko 5:38, 39.
Pe na tanuina Iesu i le auala lea na masani ai tagata Iutaia?
O le tele o aiga Iutaia e tanu o latou tagata i totonu o ni ana po o se papa ua uma ona vaneina. O le auala foʻi lea sa tanuina ai Aperaamo, Sara, Iakopo, Isaako, ma isi i le ana o Makapelu, e lata i Heperona.—Kenese 23:19; 25:8, 9; 49:29-31; 50:13.
Na tuuina le tino maliu o Iesu i se tuugamau e vaneina mai i le papa. (Mareko 15:46) O na tuugamau e vaiti faitotoʻa, ma e vaneina totonu ina ia faia ai ni fata e tuu ai tino maliu o tagata o le aiga. O se tū masani i aso o Iesu, pe a pala le tino maliu, ona tuu lea o ponaivi i se pusa ponaivi, ae faaavanoa le fata mo isi tagata o le aiga pe a maliliu.
Sa lē faatagaina i le Tulafono a Mose ona tanuina ni maliu i le Aso Sapati. O lea, sa tanuina e Iosefa o Arimataia le tino o Iesu a o leʻi uma ona sauniunia lelei, ona sa maliu o ia ae ua toeitiiti amata le Sapati. (Luka 23:50-56) O le māfuaaga lea sa ō atu ai nisi o uō a Iesu ma ni mea manogi, ina ia faauma ona sauniunia lona tino i le māeʻa ai o le Sapati.—Mareko 16:1; Luka 24:1.