FESILI MAI LE ʻAUFAITAU

Pe na faasalaina i le oti e tagata Isaraelu ē solitulafono e ala i le faatautau i laau?

I aso anamua, e tele nuu na faasalaina i le oti ē solitulafono e ala i le faatautau i se laau. Na saisai pe tutuʻi e tagata Roma na tagata i se laau, lea atonu sa mafai ona ola ai pea i ni nai aso. Na faaauau seʻia oo ina lē mafai ona onosaia le tigā, galala i le fia ʻai ma le fia inu, le timuia ma le lāina. Na manatu tagata Roma e matagā lea ituaiga o faasalaga na faia i tagata solitulafono matuiā.

Ae faapefea le nuu o Isaraelu? Pe na faasalaina i le oti e tagata Isaraelu ē solitulafono e ala i le faatautau i laau? Na faatonuina e le Tulafono a Mose: “Afai e faia e se tamāloa se agasala ua tatau i ai le oti, ma ua fasiotia o ia, ua e faatautau foʻi o ia i luga o le laau, aua neʻi tuua lona tino oti i luga o la laau i le pō atoa; ae ia e tanu lava o ia i lenā aso.” (Teu. 21:22, 23) O lea, a o faagasolo taimi o Tusitusiga Eperu, sa fasioti muamua le tagata ona faatautau lea i se laau.

Ua taʻua i le Levitiko 20:2: “O so o se tasi o le fanauga a Isaraelu, ma so o se tagata ese o lē e aumau i Isaraelu, e avatu se tasi o lana fanau iā Moloka, ia fasiotia lava o ia. E ao i tagata o le atunuu ona fetogi o ia i maa ia oti ai.” E oo foʻi i ē na iai “le mana faataulāitu, po o le mana e faia ai valovaloga,” na faaoo foʻi i ai le oti. E faapefea? E ala i le ʻfetogia o i latou i maa.’​—Levi. 20:27.

Ua taʻua i le Teuteronome 22:23, 24: “Afai e iai se teine muli ua faamau ma se tane, ae ua maua e se isi tamāloa o ia i le aai ma ua momoe ma ia, ia outou aumaia foʻi i laʻua uma i le faitotoʻa o lenā aai ma fetogia i laʻua i maa ina ia feoti ai, o le teine ina ua lē ʻeʻē i le aai, a o le tamāloa i lona faalumaina o le avā a lona tuaoi. O lea, e ao ona e aveesea le mea leaga mai iā te oe.” I Isaraelu anamua, sa avea ai le fetogia i maa ma auala autū e faasalaina ai tagata solitulafono matuiā.a

Ua taʻua i le Teuteronome 21:23, “ua faamalaia e le Atua lē ua faatautauina i se laau.” E mautinoa sa iai se aafiaga o le faalialia i le lautele o le tino oti o se tagata solitulafono e faapea, “ua faamalaia e le Atua.” Sa avea o se lapataʻiga i isi le faatautauina o tino oti o na tagata solitulafono.