TALIINA FESILI FAALE-TUSI PAIA

Pe e faafofoga le Atua i tatalo uma?

E faafofoga Ieova i tatalo a tagata mai i atunuu uma. (Salamo 145:18, 19) Ua faalaeiauina i tatou e lana Afioga le Tusi Paia, ina ia faailoa atu iā te ia so o se faafitauli o loo tatou popole ai. (Filipi 4:6, 7) Peitaʻi, e iai tatalo e lē faamalieina ai le finagalo o le Atua, e pei o tatalo e aʻo faatauloto.​—Faitau le Mataio 6:7.

E lē gata i lea, e lē talia e le Atua tatalo a i latou e solia ma le loto i ai ana tulafono. (Faataoto 28:9) O se faataʻitaʻiga, i taimi o le Tusi Paia, e leʻi talia e le Atua tatalo a tagata Isaraelu o ē na nofosala i le fasioti tagata. E manino mai la, e iai agavaa e ao ona ausia ina ia faafofogaina ai e le Atua a tatou tatalo.​—Faitau le Isaia 1:15.

O le ā e tatau ona fai ina ia faafofogaina ai a tatou tatalo?

E lē mafai ona tatou faalatalata atu i le Atua i le tatalo pe a leai se faatuatua. (Iakopo 1:5, 6) E tatau ona tatou talitonu o loo soifua o ia, ma o loo manatu mamafa mai iā i tatou. E mafai ona faamalosia lo tatou faatuatua e ala i le suʻesuʻeina o le Tusi Paia, auā o le faatuatua moni e faavae mai i mea moni ma faamautinoaga o loo taʻua i le Afioga a le Atua.​—Faitau le Eperu 11:1, 6.

E tatau ona tatou tatalo atu ma le lotomaulalo ma le faamaoni. E oo lava i le Alo o le Atua, o Iesu, sa tatalo o ia ma le lotomaulalo. (Luka 22:41, 42) O lea la, nai lo o le taʻu atu i le Atua le mea e tatau ona fai, ae e tatau ona tatou taumafai e malamalama i mea o loo ia faafinagaloina, e ala i le faitauina o le Tusi Paia. Ona mafai lea ona tatou tatalo e ōgatusa ma le finagalo o le Atua.​—Faitau le 1 Ioane 5:14.