TALIINA FESILI FAALE-TUSI PAIA

E faapefea ona maua se faaipoipoga fiafia?

Ua iloa le aogā o fautuaga a le Tusi Paia e faatatau i le auala e maua ai se faaipoipoga fiafia, auā e mai i Lē na faavaeina faaipoipoga, o Ieova le Atua. Ua tatou aʻoaʻoina ai le auala e atiaʻe ai uiga totino lea e mafai ona maua ai le fiafia i se faaipoipoga, faapea lapataʻiga i amioga e talepeina ai se faaipoipoga. Ua aʻoaʻoina ai foʻi i tatou i le auala e fesootaʻi ai, lea e mafai ona faateleina ai le fiafia i se faaipoipoga.​—Faitau le Kolose 3:8-10, 12-14.

E tatau i tane ma avā ona faamamalu ma faaaloalo le tasi i le isi. E mafai ona latou maua le fiafia, pe afai e latou te taliaina a latou matafaioi mai i le Atua.​—Faitau le Kolose 3:18, 19.

O le ā le auala e faatumauina ai se faaipoipoga?

E mafai ona tumau se ulugalii faaipoipo pe afai e alofa le tasi i le isi. Ua aʻoaʻoina i tatou e le Atua i le auala e faaalia ai le alofa. Ua avea o ia ma lona Alo o Iesu, ma faaaʻoaʻoga sili o le faaalia o le alofa faataulagaina.​—Faitau le 1 Ioane 4:7, 8, 19.

E mafai ona tumau le tane ma le avā pe afai e la te faaalia le faaaloalo i le faaipoipoga, ma vaai i ai o se faatulagaga mai le Atua. Na faia e le Atua le faaipoipoga e avea ma faatasiga tumau i le va o le tane ma le avā, ina ia mafai ai ona saogalemu aiga. E mafai ona tumau se faaipoipoga, ona na foafoaina e le Atua le tamāloa ma le fafine ma le tomai e fesoasoani ai le tasi i le isi i le itu faaletino ma faalogona. Na ia foafoaina foʻi i laʻua i lona faatusa, ma le tomai e faaaʻoaʻo ai i lona alofa.​—Faitau le Kenese 1:27; 2:18, 24.