E Faapefea Ona Fesoasoani i Uso ma Tuafāfine ua Tatala a Latou Faaipoipoga?

O se tuafafine o loo faamāfanafana atu i se tuafafine Kerisiano ua tatala lana faaipoipoga

Atonu e te silafia se tasi ua tatala lana faaipoipoga, ona ua taatele lenā tulaga i aso nei. O se faataʻitaʻiga, ua faaalia i suʻesuʻega na faia i Polani, o le toʻatele o ē ua tatala a latou faaipoipoga, o i latou ia e taʻi 30 tausaga ma ua tolu i le ono tausaga talu ona faaipoipo. Ae e lē na o ē e taʻi 30 tausaga e tatala a latou faaipoipoga.

Na taʻua i se lipoti mai i le faalapotopotoga o le Institute for Family Policy i Sepania e faapea: “Ua faaalia i faamaumauga o fuainumera, o le ʻafa o i latou ua faaipoipo [i Europa], ua toe tatala a latou faaipoipoga.” E faapena foʻi le tulaga o loo tupu i atunuu e tele le tamaoaiga.

VAVE MAPUNA AʻE FAALOGONA LĒ MAUTONU

O le ā e aofia ai i lenei tulaga taatele? Na faapea mai se faufautua ua iai le poto masani i faaipoipoga i Europa i Sasaʻe: “O le tatalaina o le faaipoipoga, e faailoa aloaʻia ai le faamutaina o se faiā, ma o le a aliaʻe mai ai faalogona ootia. E masani foʻi ona matuā lutia ai i faalogona ita, salamō, faanoanoa, leai se faamoemoe ma le māsiasi.” O nisi taimi e oo ai ina mafaufau se tasi e pule i lona ola. Na taʻua atili e le faufautua: “Pe a sainia i le faamasinoga se ioega ua aloaʻia le tatalaina o se faaipoipoga, ona amata loa lea ona fesagaʻia se isi tulaga fou. O le a lofitūina i faalogona o le lē toe aogā ma le tuua toʻatasi, ma atonu e taumānatu ai lē ua tatala lana faaipoipoga: ʻO le ā le ituaiga o tagata ua ou iai nei? O le ā le aogā ou te ola ai?’”

Na taʻua e Ewa ona faalogona sa iai i nai tausaga ua mavae: ʻSa ou matuā māsiasi ina ua tatala aloaʻia laʻu faaipoipoga. Sa ulagia ma tauemua aʻu e oʻu tuaoi ma tagata na matou faigaluega faatasi, ona ua tatala laʻu faaipoipoga. Sa tumu aʻu i le ita. Sa manaʻomia ona avea aʻu o se tinā ma se tamā i laʻu fanau lāiti e toʻalua.’a Na faapea mai Atamu, o sē na avea ma toeaina lelei mo le 12 tausaga: “Na mou atu loʻu uiga mautinoa iā te aʻu lava. O nisi taimi na ou matuā ita ma manaʻo e faaesea aʻu mai i isi tagata.”

TAUIVI IA TOE MAUA LE VAAIGA PALENI

Ona o le popole e faatatau i lo latou lumanaʻi, ua faigatā ai i nisi ona toe maua se vaaiga paleni e ui ua tele tausaga talu ona tatala a latou faaipoipoga. E latou te ono manatu e lē o toe naunau atu isi iā i latou. Ua faapea mai se tusitala e suʻesuʻeina mataupu tau i talagā faaipoipoga, e manaʻomia e tagata ua tatala a latou faaipoipoga, “ona suia a latou masaniga ma taulima o latou lava faafitauli.”

Ua faapea mai Stanisław: “Ina ua tatala le ma faaipoipoga, na faasā aʻu e laʻu avā sa iai ona ou toe vaai i laʻu fanau teine lāiti e toʻalua. Sa ou manatu ua lē toe amanaʻia aʻu e se tasi, ma ua tuulafoaʻia aʻu e Ieova. Na ou lagona ua leai se aogā ou te toe ola ai. Mulimuli ane, na ou iloa le sesē o oʻu mafaufauga.” Na popole foʻi Wanda o sē ua tatala lana faaipoipoga, e faatatau i lona lumanaʻi. Na ia taʻua: “Sa ou manatu pe a mavae sina taimi, e lē toe ano mai tagata iā te aʻu ma laʻu fanau, e oo lava i uso ma tuafāfine. Peitaʻi, ua ou iloa nei le matuā lagolagosua o uso iā i matou, ma fesoasoani mai iā te aʻu a o faaauau ona ou fesoasoani i laʻu fanau, e avea o ni ē e tapuaʻi iā Ieova.”

Pe a fua i faamatalaga na taʻua muamua, ua tatou iloa mai ai e lofitūina nisi i faalogona lē saʻo pe a uma ona tatala le faaipoipoga. Atonu o le a iā i latou se vaaiga sesē e faapea e leai so latou aogā. E latou te ono faitioina isi. O le iʻuga, e latou te ono manatu ai e lē alolofa le faapotopotoga. Peitaʻi, o mea na tutupu iā Stanisław ma Wanda, ua faaalia ai e faatoʻā iloa mulimuli ane e ē ua tatala a latou faaipoipoga, e manatu mamafa moni lava uso ma tuafāfine iā i latou. O le mea moni, e saunia e uso Kerisiano le fesoasoani e tusa pe e lē o mātauina mai la latou fesoasoani.

PE A IAI FAALOGONA TUUA TOʻATASI MA TUULAFOAʻIA

Ia mātau, e ui e tatou te taumafai malosi e fesoasoani atu, ae e iai taimi atonu e oo ai faalogona tuua toʻatasi i uso ma tuafāfine ua tatala a latou faaipoipoga. Aemaise lava i tuafāfine ua tatala faaipoipoga, atonu e latou te manatu e toʻaitiiti e amanaʻia i latou. Na taʻutino mai Alisa: “Ua mavae le valu tausaga talu ona tatala laʻu faaipoipoga. Peitaʻi, e iai lava taimi ou te manatu ai e leai soʻu aogā. I taimi faapena, e masani ona ou faaesea aʻu lava, ou te tagi ma faanoanoa i loʻu tulaga.”

E ui o faalogona na taʻua ua masani ai nisi ua tatala a latou faaipoipoga, ae ua fautua mai le Tusi Paia e lē tatau i se tasi ona faaesea o ia lava. O le lē utagia o lenei fautuaga, e iʻu ai i le teena o le “atamai aogā uma.” (Faata. 18:1) E tatau i lē ua lagona le tuua toʻatasi ona malamalama, e faamaonia o loo iā te ia le atamai aogā, pe afai e na te ʻalofia le saʻilia i taimi uma o fautuaga po o faamāfanafanaga mai i se tasi o le isi itupā. O le faia faapea, e mafai ona ʻalofia ai le atiaʻe o ni faalogona fetosinaaʻi e lē talafeagai.

E ono lutia o tatou uso ma tuafāfine ua tatala a latou faaipoipoga, i faalogona ootia e aofia ai le popole i lo latou lumanaʻi, faapea faalogona o le tuua toʻatasi po o le tuulafoaʻia. Pe a tatou iloa ua faatupulaʻia na faalogona i o tatou uso ma tuafāfine ma ua faigatā ona latou faafetaiaʻia, e tatau ona tatou faaaʻoaʻo iā Ieova e ala i le lagolagoina o i latou. (Sala. 55:22; 1 Pete. 5:6, 7) E mautinoa e latou te matuā talisapaia so o se fesoasoani e tatou te tuuina atu. O le mea moni, e mafai ona latou maua le fesoasoani mai i uō moni i totonu o le faapotopotoga.—Faata. 17:17; 18:24.

a Ua suia nisi igoa.

Se Vaaiga Paleni i Talagā Faaipoipoga

E matuā faatāua e auauna a Ieova le faaipoipoga, auā e faavae o tatou manatu i mataupu silisili o le Tusi Paia. O se faataʻitaʻiga, o loo taʻua i le Tusi Paia e inosia e Ieova le tatala o le faaipoipoga. (Mala. 2:16) E pau le faavae faale-Tusi Paia mo talagā faaipoipoga, pe afai ua faia e se tasi o le paaga feusuaʻiga lē mamā i fafo atu o le liʻo o le faaipoipoga. O lea, e matuā sesē lava pe afai e manatu se tasi e tatala lana faaipoipoga, e lē ona o se māfuaaga faale-Tusi Paia, ae atonu ua fuafua e faaipoipo atu i se isi tagata.—Kene. 2:22-24; Teu. 5:21; Mata. 19:4-6, 9.

Ae pe a tatala se faaipoipoga ona o se tulaga e pei o le lē faamaoni o le paaga a se Kerisiano, o le a lagolagosua mai uso ma tuafāfine o le faapotopotoga. E latou te faaaʻoaʻo iā Ieova e ala i le faia o le mea sili e latou te mafaia, ina ia fesoasoani i ē amiotonu o loo “loto nutimomoia” mo se taimi lē tumau.—Sala. 34:15, 18; Isa. 41:10.

E FAAPEFEA ONA E FESOASOANI ATU?

Pe e mafai ona avea oe ma puna o le fesoasoani o loo matuā manaʻomia moni lava? O le ā e mafai ona e faia ina ia fesoasoani i se tasi ua iai faalogona, e pei ona taʻua i le amataga o lenei mataupu? Iloilo faamatalaga o le Tusi Paia, ma mātau pe na faapefea ona ofo atu e Kerisiano faamaoni le fesoasoani aogā.

Ia faalogologo ma le faautauta. (Faata. 16:20, 23)

Ua tatou iloa lelei pe a māeʻa se talagā faaipoipoga, e lē manaʻo se tasi e talanoa e faatatau i māfuaaga ua tatala ai lana faaipoipoga. O le mea moni, o le faailoa uma atu o faalogona lē mautonu o se tasi, atonu e lē aogā ma e ono lē aveesea ai ni atugaluga. (Faata. 12:25; Roma 12:15) Na ofo atu e Michał le tele o le lagolagosua iā Atamu lea na taʻua muamua. E ioe Michał e faapea, e mafai ona avea oe ma sē e faalogologo ma le faautauta, e aunoa ma le fia iloa o faamatalaga uma. “Sa ou taumafai e fesoasoani iā Atamu ia iloa, pe a lofitūina o ia i faalogona mafatia, e na te ono faailoa mai se mea e na te leʻi mafaufauina e taʻu mai, ma toe salamō mulimuli ane ai.” O lea, na faailoa manino atu ai e Michał e na te lē o fia iloa mea uma na tutupu. Peitaʻi, sa faalogologo atu o ia o se uō moni. E tatou te ono maua ni iʻuga lelei pe fai atu sina faamatalaga puupuu a o leʻi amata pe ua māeʻa foʻi le sauniga, e faapea: “O ā mai oe? Ou te malamalama o loo e iai i se taimi e sili ona faigatā. Ae e mafai ona ou fesoasoani atu iā te oe.”

Ia faaalia le naunau. (Fili. 2:4)

Na faapea mai Mirosław: “Na ma faatulaga ma laʻu avā se taimi e fesoasoani ai i se tuafafine ua tatala lana faaipoipoga. O se faataʻitaʻiga, na ma toe faaleleia le loka o le faitotoʻa o lona fale ma ave o ia e vaai le fomaʻi.” Atonu o ni gaoioiga lāiti, ae sa aogā ma fesoasoani iā te ia. Na mafai ona toe maua e lenei tuafafine le paleni faaleagaga. E lē gata i lea, na mafai ona avea o ia ma paeonia, ma na papatiso lana tama teine i le 11 o ona tausaga.

Ia faamautinoa atu i lē ua tatala lana faaipoipoga, e silafia lelei e Ieova lona tulaga.

Pe a mafatia se tasi ona o faalogona e leai sona aogā, e mafai ona e faamautinoa atu i ai e pele i le Atua ana auauna taʻitoʻatasi. E ʻsili atu ona tāua i tatou nai lo o tamaʻi manulele e tele.’ (Mata. 10:29-31) “O Ieova e na te suʻesuʻeina loto,” o lea e na te silafia lelei ai tulaga o ē ua tatala a latou faaipoipoga. O le a ia lē tuulafoaʻia so o se tasi o ana auauna faamaoni. (Faata. 17:3; Sala. 145:18; Epe. 13:5) A o faaalia atu lou manatu mamafa, ia faamautinoa atu i le tagata e talisapaia e le Atua lona naunau i le upu moni, faapea ana taumafaiga ina ia lagolagoina le tapuaʻiga moni.—Fili. 2:29.

Ia faalaeiau lē ua tatala lana faaipoipoga ia piiama atu pea i le faapotopotoga.

Pe a lofitūina i faalogona lē mautonu, e faigatā i nisi ona auai i sauniga. Peitaʻi, o le fuafuaga mo nei faatasiga, ina ia “atiaʻe ai” ma mafai ona faamalosia ma faalaeiauina ai. (1 Kori. 14:26; Sala. 122:1) O lea, e tāua tele ai ona tausolomua toeaina i lenei vala. Na faapea mai Wanda lea na taʻua muamua: “E lē mafai ona galo iā i matou la latou tausiga alofa.”

Ia faalaeiau lē ua tatala lana faaipoipoga ia faamalosia lana faiā ma le Atua, e ala i le tatalo, fai ana lava suʻesuʻega ma manatunatu loloto i ai. (Iako. 4:8)

E ui o Ieova e ou le malosi uma lava ma e afio i le lagi, ae e silasila mai o ia i lē “ua mafatia ma nutimomomo lona agaga, ma ua gatete i [Lana] upu.” Ia faamautinoa atu lenā manatu i lē ua tatala lana faaipoipoga. Ia faamatilatila atu foʻi e faapea, e mafai e i tatou taʻitoʻatasi ona maua le fesoasoani, e ala i le matuā vavalalata atu i le Atua i le tatalo ma suʻesuʻega a le tagata lava ia.—Isa. 66:2.

Ia talosaga atu e galulue faatasi i le faiva, pe sauniuni faatasi mataupu mo sauniga.

O le a fesoasoani lenā i se Kerisiano ua tatala lana faaipoipoga, ina ia maua atili se vaaiga mautinoa a o ia laasia se isi laasaga o lona olaga. Na faapea mai Marta, o lē sa lagolagosua i se tuafafine maelega na matuā mafatia ina ua tatala lana faaipoipoga: “E masani ona ma auai faatasi i le talaʻiga. O se fiafiaga iā i maʻua le iloaina ua ma ausia o ma sini faaleagaga na faatutū. E iai taimi e ma te suʻesuʻe faatasi ai mataupu mo sauniga, ma atonu e kuka se meaʻai manaia pe a uma.”