E Faamāfanafanaina Oe e le Atua

LE MĀFUAAGA E LĒ MAUTONU AI NISI: E mafaufau nisi e manatu faapito le talosaga atu i le Atua e fesoasoani mai pe a fesagaʻi ma se faafitauli, e tusa lava po ua latou matuā manaʻomia. Ua faapea mai se fafine e suafa iā Raquel: “Ou te faatalatū e talosaga atu i le Atua mo se fesoasoani, ona e pei o se meanoa oʻu faafitauli pe a faatusatusa atu i le tugā o faafitauli o le toʻatele o tagata o le lalolagi.”

LE AʻOAʻOGA A LE TUSI PAIA: Ua māeʻa ona saunia e Ieova se auala mataʻina e faamāfanafanaina ai tagata. Ua tuufaasolo mai le agasala i tagata uma, ma ua lē ausia ai tapulaa lelei atoatoa a le Atua. Peitaʻi, ua “alofa mai o ia iā i tatou ma auina mai lona Alo [Iesu Keriso] e fai ma taulaga o le leleiga ma le Atua mo a tatou agasala.” (1 Ioane 4:10) Na faatulaga e le Atua le taulaga togiola a Iesu ina ia faamagaloina ai agasala, ia maua ai se lotofuatiaifo mamā ma le faamoemoe o le ola e faavavau i se lalolagi filemu.a O le taulaga togiola a Iesu e lē gata e mo tagata uma, ae ua faaalia ai foʻi le manatu mamafa mai o le Atua iā i tatou taʻitoʻatasi.

Seʻi mafaufau i le aposetolo o Paulo. O le faagaeetia o ia i le taulaga a Iesu na uunaʻia ai o ia e tusi e faapea: “Ou te ola ai i le faatuatua i le Alo o le Atua, o lē na alofa mai iā te aʻu ma foaʻiina mai lona ola mo aʻu.” (Kalatia 2:20) O le mea moni, na maliu Iesu a o leʻi avea Paulo ma Kerisiano. Peitaʻi, na manatu Paulo i le taulaga togiola o se meaalofa a le Atua e patino mo ia.

O le taulaga togiola a Iesu o se meaalofa patino foʻi a le Atua mo oe. Ua faamaonia mai i lenā meaalofa le tautele o oe i le silafaga a le Atua. E mafai ona e maua ai “faamāfanafanaga e faavavau, ma le faamoemoe matagofie,” lea e ʻfaatumauina ai oe i galuega ma upu lelei uma.’​—2 Tesalonia 2:16, 17.

Ua toetoe lava 2,000 tausaga talu ona ofoina mai le ola o Iesu o se taulaga. Ae o ā ni faamaoniga e iloa ai o loo finagalo le Atua ia iai sa oulua faiā vavalalata i aso nei?