TALIINA FESILI FAALE-TUSI PAIA
Po o lotu uma e mai i le Atua?
Pe a faalogo i tala o mea e tutupu i le lalolagi, atonu o le a e mātauina ai le aafia o lotu i nisi o taimi i le faia o gaoioiga leaga. E lē o lotu uma e mai i le Atua moni. (Mataio 7:15) O le mea moni ua faasesēina ai le toʻatele o le fanau a tagata.—Faitau le 1 Ioane 5:19.
E ui i lea, o loo silafia e le Atua tagata faamaoni e fiafia e fai le mea saʻo. (Ioane 4:23) Ua valaaulia e le Atua na tagata e aʻoaʻoina le upu moni mai lana Afioga, le Tusi Paia.—Faitau le 1 Timoteo 2:3-5.
E faapefea ona e iloa le lotu moni?
Ua autasia e Ieova le Atua le toʻatele o tagata sa iai i tapuaʻiga eseese e ala i le aʻoaʻoina i le upu moni ma ia alofa le tasi i le isi. (Mika 4:2, 3) O lea, e te iloa le lotu moni pe a alofa le tasi i le isi.—Faitau le Ioane 13:35.
Ua autasia e Ieova le Atua ituaiga uma o tagata e ala i le tapuaʻiga moni.—Salamo 133:1
O le Tusi Paia, e faavae aʻe ai talitonuga ma le auala e ola ai tagata o le tapuaʻiga moni. (2 Timoteo 3:16) E latou te faamamaluina le suafa o le Atua. (Salamo 83:18) E latou te faaaʻoaʻo iā Iesu e ala i le ʻfaasusulu atu o lo latou malamalama,’ i le faia o mea lelei i o latou tuaoi. (Mataio 5:16) O loo latou faaauiluma foʻi le Malo o le Atua e na o le pau lea o le faamoemoe mo le fanau a tagata. (Tanielu 2:44) O lea, e mafai ona e mātauina Kerisiano moni i lo latou talaʻi atu mai lea fale i lea fale, e folafola atu le tala lelei o le Malo o le Atua.—Faitau le Mataio 24:14; Galuega 5:42; 20:20.