Aiseā e Ao ai Ona Tatou Paia?

1. E faapefea ona fesoasoani le tusi o Levitiko iā i tatou?

E LEAI se isi tusi o le Tusi Paia e tele ina talanoa e faatatau i le paia, nai lo o le tusi o Levitiko. O lenei uiga e tatau ona iai i tagata tapuaʻi faamaoni uma o Ieova. O lea, o le malamalama ma le talisapaia o le tusi o Levitiko, o le a fesoasoani iā i tatou ina ia paia ai.

2. O ā nisi o vala o le tusi o Levitiko?

² O le tusi o Levitiko na tusia e le perofeta o Mose, ma o se vaega o “Tusitusiga Paia uma” lea e aogā e aʻoaʻoina ai i tatou. (2 Timo. 3:16) I se fua faatatau, e pe ā ma le faasefulu ona taʻua le suafa o Ieova i mataupu taʻitasi o le Levitiko. O le malamalama lelei i lenei tusi o le a faamalosia ai i tatou e ʻalofia le faia o se mea e faalumaina ai le suafa o le Atua. (Levi. 22:32) O so o se taimi e taʻua ai i lenei tusi le faaupuga “o aʻu o Ieova,” e tatau ona faamanatu mai ai iā i tatou ia usiusitaʻi i le Atua. I lenei mataupu ma le mataupu e sosoo mai, o le a tatou talanoaina ai nisi o vala tāua o le tusi o Levitiko, lea e fesoasoani ina ia paia ai la tatou tapuaʻiga i le Atua.

SA MANAʻOMIA ONA PAIA

3, 4. O le ā ua faaāta mai i le faamamāina o Arona ma ona atalii? (Tagaʻi i le ata i luga aʻe o le matua.)

³ Faitau le Levitiko 8:5, 6. Sa filifilia e Ieova Arona e auauna o se ositaulaga sili i Isaraelu, ae auauna ona atalii o ni ositaulaga mo le nuu. O Arona ua faaāta mai ai Iesu Keriso, a o atalii o Arona ua faaāta mai ai soo faauuina o Iesu. Po o le faamamāina la o Arona e faaāta mai ai le faamamāina o Iesu? E leai, auā e leʻi agasala Iesu ma e “lē taʻuleagaina.” E leʻi manaʻomia la ona faamamāina o ia. (Epe. 7:26; 9:14) Peitaʻi, o le tulaga mamā o Arona e faasino atu i le tulaga mamā ma le amiotonu o Iesu. O le ā la e faaāta mai ai le faamamāina o atalii o Arona?

⁴ Ua faaāta mai ai le faamamāina o ē ua filifilia e avea ma ositaulaga i le lagi. Pe e fesootaʻi atu le papatisoga o le ʻaufaauuina i le faamamāina o atalii o Arona? E leai. Talu ai e lē mafai e le papatisoga ona aveesea ai agasala. Nai lo o lea, ua faaāta mai ai le tuuina atu atoatoa o se tagata iā Ieova. O le faamamāina o le ʻaufaauuina, e faataunuu “e ala i le upu.” E manaʻomia ai ona latou faatatauina ma le lotoatoa aʻoaʻoga a Keriso i o latou olaga. (Efe. 5:25-27) O lea, ua faapaiaina ma faamamāina ai i latou. Ae faapefea “isi mamoe”?​—Ioa. 10:16.

5. Aiseā e faapea atu ai ua faamamāina isi mamoe e ala i le Afioga a le Atua?

⁵ E lē o faaataina mai e atalii o Arona, le “motu o tagata e toʻatele” o isi mamoe a Iesu. (Faaa. 7:9) Ae po o nei tagata papatiso, ua faapaiaina ma faamamāina foʻi e ala i le Afioga a le Atua? Ioe! Pe a faitau e i latou e faamoemoe e ola i le lalolagi, faamatalaga a le Tusi Paia i le tāua ma le aogā o le toto maligi o Iesu, e latou te faatuatua i na upu ma ofo atu ʻle auaunaga paia i le ao ma le pō.’ (Faaa. 7:13-15) E faamaonia le aogā o le faamamāina pea o le ʻaufaauuina ma isi mamoe, e ala i lo latou “tausisi i le amiolelei.” (1 Pete. 2:12) Maʻeu le faafiafiaina o Ieova a o silasila mai i le mamā ma le autasi o le ʻaufaauuina ma isi mamoe, o ē o loo faalogo atu ma mulimuli ma le faamaoni i lo latou Leoleo Mamoe o Iesu!

6. O le ā le iloiloga tāua e tatau ona fai e le tagata lava ia?

⁶ E iai le uiga o le mamā faaletino o ositaulaga i Isaraelu, mo tagata o Ieova i aso nei. E masani ona mātauina e tagata o loo tatou suʻesuʻe, le mamā o o tatou maota mo le tapuaʻiga, faapea le mamā ma le onomea o o tatou laʻei. E lē gata i lea, o le mamā o ositaulaga, e tatou te iloa ai o so o se tasi e alu aʻe i le mauga o le tapuaʻiga a Ieova, e tatau ona ʻmamā lona loto.’ (Faitau le Salamo 24:3, 4; Isa. 2:2, 3.) E tatau ona ofo atu la tatou auaunaga paia i le Atua ma se mafaufau mamā, loto mamā, ma se tino mamā. O lea e manaʻomia ai ona iloilo pea i tatou lava, ma o nisi atonu e manaʻomia ona faia ni suiga tāua ina ia mafai ai ona paia. (2 Kori. 13:5) O se faataʻitaʻiga, e tatau i se tagata papatiso o loo matamata i ata matagā taufeusuaʻiga, ona fesili ifo iā te ia lava, ʻPo o faamaonia atu o aʻu o sē e paia?’ E tatau ona ia saʻili se fesoasoani ina ia taofia ai lenā masaniga leaga.​—Iako. 5:14.

IA FAAMAONIA ATU E TE PAIA E ALA I LE USITAʻI

7. E tusa ai o le Levitiko 8:22-24, o le ā le faaaʻoaʻoga na faataatia e Iesu?

⁷ Ina ua faavaeina le faiva faaositaulaga i Isaraelu, sa tatau ona tuu le toto o le mamoe poʻa i taliga taumatau, limamatua ma vaematua o le Ositaulaga Sili o Arona ma ona atalii. (Faitau le Levitiko 8:22-24) O lenei auala na faaalia ai o le a usiusitaʻi ositaulaga e faia le mea sili e faatino ai o latou tiute tauave. I se tulaga talitutusa, na faataatia e le Ositaulaga Sili o Iesu le faaaʻoaʻoga sili mo le ʻaufaauuina ma isi mamoe. Sa uaʻi atu ona taliga i le taʻitaʻiga a le Atua, sa faaaogā ona lima e faia ai le finagalo o Ieova, ma e leʻi sē ese ona vae mai i lana auaunaga paia.​—Ioa. 4:31-34.

8. O le ā e tatau ona fai e tagata tapuaʻi uma o Ieova?

⁸ E tatau i Kerisiano faauuina ma isi mamoe a Iesu le Ositaulaga Sili, ona mulimuli i lana faaaʻoaʻoga faamaoni. E tatau i tagata tapuaʻi uma o Ieova ona usiusitaʻi i le taʻitaʻiga o loo i lana Afioga, ma ʻalofia ai le faatigā i lona agaga paia. (Efe. 4:30) E tatau ona ʻfaasaʻo ala mo o latou vae.’​—Epe. 12:13.

9. (a) O le ā na taʻua e ni uso se toʻatolu sa galulue vavalalata ma sui o le Vaega Pule? (e) E faapefea ona fesoasoani a latou faamatalaga iā te oe e faamaonia atu ai pea e te paia?

⁹ Seʻi iloilo faamatalaga a ni uso se toʻatolu o ē e faamoemoe e ola i le lalolagi, ma ua tele tausaga o galulue soosootauʻau ma sui o le Vaega Pule. Na faapea mai le uso muamua: “E moni o lenei tulaga o se faaeaga tāua i le auaunaga, ae a o faagasolo taimi ma galulue vavalalata ma i latou, na iloa ai e lē lelei atoatoa foʻi nei uso e ui ua faauuina i le agaga. E ui i lea, o se tasi o oʻu sini mo le tele o tausaga, ia usitaʻi i ē o loo taʻimua.” Na faapea mai le uso lona lua: “O mau e pei o le 2 Korinito 10:5 e faatatau i le “usiusitaʻi i le Keriso,” ua fesoasoani ou te usitaʻi ai ma lagolagosua i ē o loo taʻimua. O lenei usitaʻi e mai i le loto.” Na faapea mai le uso lona tolu: “O le usitaʻi i le faalapotopotoga a Ieova ma ē o loo ia faaaogā e faaauiluma lona finagalo mo le lalolagi, e faaalia ai e te fiafia i mea e fiafia i ai Ieova, ʻinoʻino i mea e na te inosia, saʻili pea i lana taʻitaʻiga ma fai mea e faamalieina ai o ia.” Na iloa e lenei uso, sa talia e Nathan Knorr, o lē na avea ma sui o le Vaega Pule, manatu na taʻua i le Watch Tower o le 1925 i le mataupu “Ua Fanau Mai le Nuu,” e ui na fesiligia e nisi. Na matuā maofa lenei uso i lenā faaaʻoaʻoga o le usiusitaʻi. O le mafaufau loloto i faamatalaga a nei uso, e fesoasoani iā te oe e faamaonia atu ai e te paia e ala i le usitaʻi.

IA USITAʻI I LE TULAFONO A LE ATUA I LE TOTO

10. Aiseā e tāua ai ona tatou usiusitaʻi i le tulafono a le Atua i le toto?

¹⁰ Faitau le Levitiko 17:10. Na faatonu e Ieova tagata Isaraelu ia aua neʻi ʻaina “so o se toto.” O le faamamao mai i le toto o manu ma tagata, o se faatonuga mo Kerisiano. (Galu. 15:28, 29) E tatou te lē mananaʻo e ʻteena i tatou’ e le Atua ma aveesea mai i lana faapotopotoga. E tatou te alolofa ma mananaʻo e usiusitaʻi iā te ia. E tusa pe e tatou te fetaiaʻi ma se tulaga e lamatia ai o tatou ola, ae ia maumauaʻi e aua neʻi lolo atu i manaʻoga o ē e lē iloa Ieova ma lē usiusitaʻi iā te ia. E tatou te faatalitalia tauemuga pe a faamamao mai le toto, ae e tatou te filifili e usiusitaʻi iā Ieova. (Iuta 17, 18) E faapefea i le iloiloina o lenei mataupu ona faamalosia ai i tatou, e “maumauaʻi” ia aua neʻi ʻaina le toto pe talia se tuigātoto?​—Teu. 12:23.

11. Aiseā e faapea atu ai o le Aso o le Togisala o se aso tāua?

¹¹ O le faaaogāina e ositaulaga sili o Isaraelu o le toto o manu i le Aso o le Togisala, ua tatou malamalama ai i le silafaga a le Atua i le toto. Sa faaaogā le toto i se tulaga faapitoa, ina ia totogi ai agasala a ē na saʻilia le faamagaloga a Ieova. Sa tatau ona sausau le toto o le povi poʻa ma le ʻoti i luma o le ufiufi o le atolaau o le feagaiga. (Levi. 16:14, 15, 19) O lenei faiga na mafai ai ona faamagalo e Ieova agasala a tagata Isaraelu. E lē gata i lea, na poloaʻia e Ieova pe afai e fasi e se tasi se manu mo meaʻai, e ao ona faaalu ese le toto ma tanu i le eleele, “auā o le ola o ituaiga uma o meaola, o lona toto lea.” (Levi. 17:11-14) Pe e tāua nei faiga? Ioe. O le faaaogāina o le toto i le Aso o le Togisala, ma le faatonuga ia sasaa le toto i le eleele, ua ōgatusa ma le faatonuga a Ieova na tuu atu iā Noa ma ē na tupuga mai iā te ia e faatatau i le toto. (Kene. 9:3-6) Sa faasā e Ieova ona ʻaina le toto ina ia faatumau ai le ola. O le ā le uiga o lenei faatonuga mo Kerisiano?

12. E faapefea i le tusi a Paulo i Kerisiano i Eperu, ona iloa ai le fesootaʻiga o le toto ma le faamagaloga?

¹² Ina ua tusi atu Paulo i Kerisiano i Eperu e faatatau i le tāua o le toto e faamamāina ai tagata, na faapea atu o ia: “E toetoe o mea uma lava e faamamāina e le toto e tusa ai ma le Tulafono, ma e lē mafai ona faamagaloina agasala seʻi vaganā ua faamaligiina le toto.” (Epe. 9:22) Na taʻua foʻi e Paulo sa aogā taulaga na faia i manu, ma na faamanatu atu ai i tagata Isaraelu lo latou tulaga agasala. Peitaʻi, sa latou manaʻomia se isi taulaga e sili atu ina ia aveesea atoatoa ai a latou agasala. Sa avea le Tulafono ma “ata o mea lelei i le lumanaʻi ae lē o le tino mai o mea.” (Epe. 10:1-4) E mafai faapefea ona faamagaloina agasala?

13. O ā ni ou faalogona i le ofoina atu e Iesu o le tāua o lona toto iā Ieova?

¹³ Faitau le Efeso 1:7. O le maliu faataulaga o Iesu Keriso, o lē na lotomalie e ʻfoaʻiina mai lona ola mo i tatou,’ e iai sona uiga tāua mo ē uma e alolofa iā te ia ma lona Tamā. (Kala. 2:20) O le mea na faia e Iesu ina ua mavae lona maliu ma lona toetū mai, ua mafai ona faasaʻoloto ai i tatou ma faamagaloina a tatou agasala. Sa faataunuu e Iesu mea na faaāta mai i le Tulafono a Mose i le Aso o le Togisala. I lenā aso, na ave ai e le ositaulaga sili se vaega o le toto o manu na faataulagaina, ma ulu atu i le Mea e Sili ona Paia o le faleʻie paia. Mulimuli ane, na faia foʻi faapea e le ositaulaga sili i le malumalu o Solomona, ona ofo atu lea i le Atua e pei lava o loo iai o ia i luma o le Atua. (Levi. 16:11-15) I se tulaga talitutusa, na afio atu Iesu i le lagi ma ofo atu iā Ieova le tāua o lona toto. (Epe. 9:6, 7, 11-14, 24-28) Maʻeu lo tatou talisapaia o le faamagaloina o a tatou agasala ma maua se lotofuatiaifo mamā, ona o le faaalia o le faatuatua i le toto o Iesu!

14, 15. Aiseā e tāua ai ona malamalama ma usiusitaʻi i le tulafono a Ieova e faatatau i le toto?

¹⁴ Po ua e malamalama i le māfuaaga ua poloaʻi mai ai Ieova ia aua neʻi ʻaina “so o se toto”? (Levi. 17:10) Po ua e iloa le māfuaaga e manatu ai le Atua i le toto o se mea e paia? I le silafaga a le Atua e tutusa le toto ma le ola. (Kene. 9:4) Pe e te ioe e tatau ona tatou vāai i le toto e pei ona silasila i ai le Atua, ma usitaʻia lana faatonuga ia faamamao mai i le toto? E pau le auala e mafai ai e so o se tasi ona maua le filemu ma le Atua, o le faatuatua lea i le taulaga togiola a Iesu, ma malamalama e matuā tāua le toto i Lē na foafoaina i tatou.​—Kolo. 1:19, 20.

¹⁵ E ono faafuaseʻi ona tatou feagai ma se mataupu e aafia ai le toto. Pe e faafuaseʻi foʻi ona feagai se tasi o le aiga po o se uō mamae, ma se filifiliga e talia se tuigātoto pe leai. I nei tulaga faigatā, e manaʻomia ai foʻi ona fai sa tatou faaiʻuga e faatatau i vaega ninii o le toto ma togafitiga faafomaʻi. O lea, e tāua tele ona faia saʻiliʻiliga e uiga i na mataupu ma nofosauni a o leʻi tupu se faalavelave. Pe a faia faatasi ma le tatalo, o le a fesoasoani lenā iā i tatou e maumauaʻi ai ma ʻalofia le faagutugutulua. O le mea moni, e tatou te lē mananaʻo e faatigā le finagalo o Ieova, e ala i le talia o se mea e taʻusalaina i lana Afioga! O le toʻatele o fomaʻi faapitoa ma isi e lagolagoina tuigātoto, e fautua i tagata ia foaʻi o latou toto ina ia faasaoina ai ola o isi tagata. Peitaʻi, e malamalama lelei tagata paia o Ieova, e iai i Lē na foafoaina i tatou le aiā e faailoa mai ai le auala e faaaogā ai le toto. E paia “so o se toto” i lana silafaga. E tatau ona tatou maumauaʻi e usitaʻia lana tulafono i le toto. E faailoa atu iā Ieova e ala i a tatou amioga paia, e tatou te matuā talisapaia le tāua o le toto o Iesu e faasaoina ai i tatou. E na o le pau lenā o le toto ua mafai ai ona faamagaloina agasala ma maua le ola e faavavau.​—Ioa. 3:16.

E FAATALITALIA E IEOVA I TATOU IA PAIA

16. Aiseā e tatau ai ona paia tagata o Ieova?

¹⁶ Ina ua laveaʻiina e le Atua tagata Isaraelu mai i le nofo pologa i Aikupito, na ia faapea atu: “O aʻu o Ieova o lē na aumaia outou mai i le atunuu o Aikupito, e faailoa ai iā te outou o aʻu o le Atua; ma e ao ona paia outou, auā e paia lava aʻu.” (Levi. 11:45) Sa faatalitalia tagata Isaraelu ia paia, auā o Ieova e paia. I le avea ai ma Molimau a Ieova, e tatau foʻi ona tatou paia. O loo taʻua manino mai i le tusi o Levitiko lenā tulaga.

17. O ā ni ou faalogona e faatatau i le tusi o Levitiko?

¹⁷ E mautinoa ua e maua aogā mai i le iloiloina o nisi o vala o le tusi o Levitiko. O lenei suʻesuʻega ua mafai ona faaloloto ai lou talisapaia o lenei tusi faagaeeina o le Tusi Paia. O le mafaufau loloto i nisi o faamatalaga tāua o loo i lenei tusi, e mautinoa ua atili ai ona e malamalama i māfuaaga e tatau ai ona tatou paia. Peitaʻi, o ā nisi manatu tāua faaleagaga o loo taʻua i lenei tusi? O ā nisi mea e tatou te aʻoaʻoina mai i lenei tusi e tusa ai o le auala e avatu ai le auaunaga paia iā Ieova? O le a tatou iloiloina na fesili i le mataupu o sosoo mai.