TALIINA FESILI FAALE-TUSI PAIA
E faapefea ona aʻoaʻo fanau ina ia alolofa i le Atua?
Ia faaaogā mea e aʻoaʻoina mai i le foafoaga, e fesoasoani ai i lau fanau ia iloa ma alolofa i le Atua
E faatoʻā mafai ona alolofa lau fanau i le Atua, pe a latou iloa ni faamaoniga o loo soifua moni o ia, ma e alofa mai iā i latou. Ina ia alolofa i le Atua, e tatau ona latou iloa o ia. (1 Ioane 4:8) O se faataʻitaʻiga, e ao ona latou iloa tali o fesili nei: Aiseā na faia ai e le Atua le tagata? Aiseā ua lē taofia ai e le Atua mafatiaga? O le ā o le a faia e le Atua mo tagata i le lumanaʻi?—Faitau le Filipi 1:9.
Ina ia fesoasoani i lau fanau e alolofa i le Atua, e tatau ona e faaalia atu iā i latou e te alofa i le Atua. Pe a latou mātauina lenā tulaga, o le a latou mulimuli foʻi i lau faaaʻoaʻoga.—Faitau le Teuteronome 6:5-7; Faataoto 22:6.
E faapefea ona e pāʻia loto o lau fanau?
E matuā malosi le Afioga a le Atua. (Eperu 4:12) O lea, ia aʻoaʻo lau fanau i aʻoaʻoga faavae o le Tusi Paia. Ina ia pāʻia e Iesu loto o tagata, sa ia fai atu ni fesili, faalogologo lelei, ma faamatala atu Tusitusiga Paia. E mafai foʻi ona e faaaʻoaʻo i le auala na faia e Iesu, pe afai e te manaʻo e pāʻia loto o lau fanau.—Faitau le Luka 24:15-19, 27, 32.
E lē gata i lea, o loo iai tala i le Tusi Paia i le auala na feutagaʻi ai le Atua ma tagata, ma e mafai ona fesoasoani i lau fanau e iloa ai le Atua ma alolofa iā te ia. O loo maua lomiga e fesoasoani i lau fanau i le Initaneti i le www.jw.org/sm.—Faitau le 2 Timoteo 3:16.