E Matuā Faamanuia e Ieova le Agaga Faataulaga

UA TUUINA mai e le Atua i tagata le meaalofa tāua o le filifiliga saʻoloto. Ua ia matuā faamanuia foʻi i ē o loo faaaogā le filifiliga saʻoloto e faaauiluma ai le tapuaʻiga moni, ma faamamaluina lona suafa paia ma lagolagoina lona finagalo. E lē finagalo Ieova e tatou te usiusitaʻi ona o se mea e tau ina fai, po ona ua faamalosia foʻi i tatou e faia faapea. Nai lo o lea, e tāua tele iā te ia le tuutoina atu ma le lotomalie, lea e uunaʻia i le alofa moni ma le lototalisapaia.

O se faaaʻoaʻoga, a o iai Isaraelu i le toafa o Sinai, sa faatonu i latou e Ieova e fausia se nofoaga mo le tapuaʻiga. Na fetalai Ieova: “Ia outou faia se foaʻi mo Ieova. Ia taʻitasi ma fai lana foaʻi mo Ieova e tusa ma lona lotomalie.” (Eso. 35:5) Sa mafai e tagata Isaraelu taʻitoʻatasi ona foaʻi so o se mea na gafatia ma faia foaʻi tauofo, e tusa po o le ā lenā mea ma po o le ā foʻi le tele. Sa mafai ona faaaogā na foaʻi i se auala talafeagai ina ia faataunuu ai le finagalo o le Atua. O le ā le tali mai a tagata?

ʻO i latou ua taʻitasi ma uunaʻia e lona loto,’ ma ʻi latou ua taʻitasi ma matuā naunau i ai,’ sa latou faia se taulaga tauofo ma le “lotomalilie.” Sa foaʻi ma le lotomalilie e tane ma fafine se mea mo le galuega a Ieova, e aofia ai pine teuteu, tautaliga, mama, auro, siliva, ʻapamemea, filo lanu moana, fulufulu o mamoe ua vali lanu violē, o mea ua vali mūmū sesega, o ʻie lino lelei, o fulufulu ʻoti, o paʻu mamoe poʻa ua vali mūmū, paʻu takesa, laau o le setima, maa tāua, suāuu pasama, ma le suāuu. Mulimuli ane, sa “lava ma totoe mea ua saunia mo le galuega.”—Eso. 35:21-24, 27-29; 36:7.

Sa sili ona fiafia le finagalo o Ieova, e lē ona o mea faaletino na foaʻi atu, ae ona o le agaga faataulaga o ē na lagolagoina le tapuaʻiga moni. Sa uunaʻia foʻi i latou e ofo atu lo latou taimi ma le malosi. Ua taʻua i le tala “o fafine uma e atamamai ua latou milo filo,” ma “o fafine uma foʻi ua uunaʻia o latou loto i le atamai ua latou milo filo mai i fulufulu ʻoti.” Sa avatu foʻi e Ieova iā Pesaleli “le atamai, ma le malamalama ma le poto, ina ia agavaa ai o ia e fai galuega eseese uma.” Sa faatumulia e Ieova Pesaleli ma Oliavu i le tomai na manaʻomia ina ia faia ai galuega uma na poloaʻia e fai.—Eso. 35:25, 26, 30-35.

Ina ua valaaulia e Ieova tagata Isaraelu e fai se foaʻi, sa ia mautinoa o le a lagolagoina e “tagata uma e lotomalilie” le tapuaʻiga moni. O le iʻuga, sa ia faamanuia i ē sa faaalia le agaga faataulaga, e ala i le taʻitaʻia o i latou ma maua ai le olioli. Sa faailoa mai e Ieova, pe a ia faamanuia i le agaga faataulaga o ana auauna, e na te faamautinoa e lava ma totoe mea e manaʻomia, faapea tagata tomai e faataunuu lona finagalo. (Sala. 34:9) Ua faamautinoa mai e Ieova o le a ia faamanuia i lou agaga faataulaga, a o e auauna atu ma le lotomalie iā te ia.

AUALA UA FILIFILIA E NISI E FOAʻI AI MEAALOFA MO LE GALUEGA I LE LALOLAGI AOAO

E pei o aso o Paulo, e ʻtuuesea’ pe faaagaga e le toʻatele se vaega tupe e lafo i pusa a faapotopotoga o loo faailogaina, “Galuega i le Lalolagi Aoao.” (1 Kori. 16:2) E lafo atu e faapotopotoga i masina taʻitasi nei tupe i le ofisa o le lālā, o loo vaavaaia o latou atunuu. E mafai foʻi ona lafo saʻo lau foaʻi, i se faalapotopotoga faaletulafono o loo faaaogāina e Molimau a Ieova i lou atunuu. Ina ia iloa le faalapotopotoga faaletulafono autū o loo faaaogāina e Molimau a Ieova i lou atunuu, faamolemole faafesootaʻi le ofisa o le lālā o loo vaavaaia le atunuu. E mafai ona maua le tuatusi o le ofisa o le lālā i luga o le www.jw.org. O loo mulimuli mai foaʻi e mafai ona e lafoina tuusaʻo:

O FOAʻI E LEAI NI TUUTUUGA

Foaʻi tautupe, filifili, tautaliga, taulima, po o isi oloa tāua a le tagata lava ia.
E aofia ai ma se tusi e faailoa atu ai, o na mea ua foaʻi atu e aunoa ma ni tuutuuga.

FUAFUAGA O FOAʻI FAAMEAALOFA

E mafai ona faia se foaʻi tautupe i lalo o se maliega faapitoa. Pe a tulaʻi mai se manaʻoga faapitoa i lē na faia le foaʻi, e mafai ona toe iloilo le maliega na faia. Mo nisi faamatalaga, faamolemole faafesootaʻi le Matagaluega o Tupe, i le tusi atu i le tuatusi o lo o taʻua i lalo.

FUAFUAINA O FOAʻI

E lē gata i foaʻi tautupe ma isi foaʻi faameaalofa, ae e iai isi auala e faia ai foaʻi mo le galuega o le Malo i le lalolagi aoao. O loo lisiina mai na auala i le pito i lalo. Po o le ā lava le auala e te filifili e faaaogāina, faamolemole faafesootaʻi muamua le ofisa o le lālā o loo vaavaaia lo outou atunuu, ina ia iloa ai auala o loo faaaogāina e lou atunuu. E tele ina fesuisuiaʻi tuutuuga faaletulafono ma tulafono o lafoga, e tāua ai ona saʻili le fesoasoani a ni lōia ma tagata faufautua e faatatau i lafoga, a o leʻi filifili po o lē fea le auala sili e faia ai lau foaʻi.

Inisiua: O le inisiua o le ola o se tasi, o tupe e maua pe a litaea po o le penisione, o le a lotomalie se tasi e foaʻi mo le faalapotopotoga o loo faaaogāina e Molimau a Ieova.

Tupe Faafaigaluega (Stocks) ma Pepa Faamaonia mo Tupe (Bonds): O nei mea e mafai ona foaʻi faameaalofa tuusaʻo atu i se faalapotopotoga o loo faaaogāina e Molimau a Ieova.

Fanua ma Fale: E mafai ona foaʻi tuusaʻo ou fanua ma fale, i se faalapotopotoga o loo faaaogā e Molimau a Ieova, pe tuu e nofo ai pea lē e ana le fale seʻia oo ina maliu, ona faatoʻā maua lea e le lālā.

Uili ma Mavaega: E mafai ona foaʻi atu meatotino po o se vaegātupe i se faalapotopotoga o loo faaaogāina e Molimau a Ieova, e ala i se uili ua faia e tusa ai ma le tulafono. Pe mauaina foʻi e lenei faalapotopotoga le taui o se teugātupe, fanua po o nisi meatotino ua tuu faamavaega.

Mo nisi faamatalaga, faafesootaʻi le ofisa o le lālā o Molimau a Ieova o loo vaavaaia lou atunuu.