Ia Talisapaia le Aao Mafola o Ieova

O IEOVA o le Atua e aao mafola. (Iako. 1:17) Ua vivii foafoaga uma a Ieova e amata mai i le lagi ua faatumulia i fetu e oo atu i laufanua lafulemu, ona o lona aao mafola.—Sala. 65:12, 13; 147:7, 8; 148:3, 4.

Na matuā talisapaia e le faisalamo Lē na foafoaina o ia, o lea na ia tusia ai se pese e viiviia ai galuega a Ieova. Faitau le Salamo e 104, ma vaai pe tutusa o oulua faalogona ma le faisalamo. Ua ia faapea mai: “Ou te pese iā Ieova i loʻu olaga atoa, ou te fai pesega foʻi i loʻu Atua a o ou ola pea.” (Sala. 104:33) Po o lou faanaunauga foʻi lenā?

FAAAʻOAʻOGA SILISILI O LE AAO MAFOLA

E finagalo Ieova ia tatou mulimuli i lana faaaʻoaʻoga o le aao mafola. Ua ia aumaia māfuaaga e tatau ai ona tatou limafoaʻi. Seʻi mātau le mea na ia faagaeeina le aposetolo o Paulo e tusi: “Ia fai atu faatonuga i ē e mauʻoa i lenei faiga o mea a le lalolagi, ia aua le faamaualuga, ma ia lē faamoemoe i ʻoa e lē tumau, ae i le Atua o lē e foaʻi maia le tele o mea iā i tatou ina ia tatou fiafia ai; ia faia mea lelei, ia tamaoaiga i galuega lelei, ia mataalofa ma nofosauni e tufa atu mea i isi, ia teua oloa mo i latou lava o le faavae lelei mo le lumanaʻi, ina ia latou taofimau i le ola moni.”—1 Timo. 6:17-19.

Ina ua tusia e Paulo lana tusi lona lua i le faapotopotoga i Korinito, na ia faamamafa ai le vaaiga saʻo e tatau ona iai pe a foaʻi atu. Ua faapea mai Paulo: “Ia taʻitoʻatasi ma faia e tusa ma le mea ua filifili i lona loto, aua le faia ma le tigā, aua foʻi le faia faamalosi, auā e alofa le Atua i lē e foaʻi ma le lotofiafia.” (2 Kori. 9:7) Na taʻua e Paulo aogā o le limafoaʻi, e faamalieina ai manaʻoga o ē sa taliaina, ma e faatamaoaigaina ai i faamanuiaga faaleagaga ē na faia foaʻi.—2 Kori. 9:11-14.

Na faaiʻu e Paulo lea vaega e ala i le taʻua o le faamaoniga silisili o le aao mafola o le Atua. Na ia tusi: “E faafetai i le Atua mo lana meaalofa foaʻifua e lē mafaamatalaina.” (2 Kori. 9:15) O le meaalofa a Ieova e aofia ai mea lelei uma ua ia faia mo ona tagata e ala iā Iesu Keriso. E lē mafai e upu ona faamatalaina le tāua o lenā meaalofa.

E faapefea ona tatou faaalia le talisapaia mo mea uma ua faia ma o le a faia e Ieova ma lona Alo mo i tatou? O se tasi o auala, o le foaʻi atu lea o o tatou taimi, malosi ma meafaitino e faaauiluma ai le tapuaʻiga mamā a Ieova e tusa pe tele pe itiiti.—1 Nofo. 22:14; 29:3-5; Luka 21:1-4.

Auala Ua Filifilia E Nisi E Foaʻi Ai Meaalofa Mo Le Galuega I Le Lalolagi Aoao

E pei o aso o le aposetolo o Paulo, e “tuu ese se mea” pe faaagaga e le toʻatele se vaega tupe e lafo i pusa a faapotopotoga o loo faailogaina, “Galuega i le Lalolagi Aoao.” (1 Kori. 16:2) E lafo atu e faapotopotoga i masina taʻitasi nei tupe i le ofisa o le lālā, o loo vaavaaia o latou atunuu. E mafai foʻi ona lafo saʻo lau foaʻi, i se faalapotopotoga faaletulafono o loo faaaogāina e Molimau a Ieova i lou atunuu. Ina ia iloa le faalapotopotoga faaletulafono autū o loo faaaogāina e Molimau a Ieova i lou atunuu, faamolemole faafesootaʻi le ofisa o le lālā o loo vaavaaia le atunuu. E mafai ona maua le tuatusi o le ofisa o le lālā i luga o le www.jw.org. O loo mulimuli mai foaʻi e mafai ona e lafoina tuusaʻo.

O FOAʻI E LEAI NI TUUTUUGA

Foaʻi e ala i faletupe, o debit card, po o credit card. I nisi lālā e faaaogā ai le upega tafaʻilagi o le jw.org po o se isi tuatusi aloaʻia.
Foaʻi tautupe, filifili, tautaliga, taulima, po o isi oloa tāua a le tagata lava ia. E aofia ai ma se tusi e faailoa atu ai, o na mea ua foaʻi atu e aunoa ma ni tuutuuga.

O FOAʻI E IAI TUUTUUGA

Foaʻi tautupe ma le tuutuuga e toe faafoʻi lenā foaʻi i lē e ana le tupe, pe a ia talosagaina.
E aofia ai ma se tusi e faailoa atu ai e iai tuutuuga o le foaʻi.

FUAFUAGA O FOAʻI FAAMEAALOFA

E lē gata i foaʻi tautupe ma isi foaʻi faameaalofa, ae e iai isi auala e faia ai foaʻi mo le galuega o le Malo i le lalolagi aoao. O loo lisiina mai na auala i le pito i lalo. Po o le ā lava le auala e te filifili e faaaogā, faamolemole faafesootaʻi muamua le ofisa o le lālā o loo vaavaaia lo outou atunuu, ina ia iloa ai auala o loo faaaogāina e lou atunuu. E tele ina fesuisuiaʻi tuutuuga faaletulafono ma tulafono o lafoga, e tāua ai ona saʻili le fesoasoani a ni lōia ma tagata faufautua e faatatau i lafoga, a o leʻi filifili po o lē fea le auala sili e faia ai lau foaʻi.

Inisiua: O le inisiua o le ola o se tasi, o tupe e maua pe a litaea po o le penisione, o le a lotomalie se tasi e foaʻi mo le faalapotopotoga o loo faaaogāina e Molimau a Ieova.

Teugātupe i le Faletupe: O teugātupe i le faletupe, pepa e faamaonia ai se teugātupe (certificates of deposit), po o tupe e maua e le tagata pe a litaea, e mafai ona tuu faamavaega pe totogi atu pe a maliu, i se faalapotopotoga o loo faaaogāina e Molimau a Ieova, ma ia faia e tusa ma aiāiga a faletupe o le atunuu.

Tupe Faafaigaluega (Stocks) ma Pepa Faamaonia mo Tupe (Bonds): O nei mea e mafai ona foaʻi faameaalofa tuusaʻo atu i se faalapotopotoga o loo faaaogāina e Molimau a Ieova po o le tuu faamavaega e totogi atu pe a maliu lē o faia le foaʻi.

Fanua ma Fale: E mafai ona foaʻi tuusaʻo ou fanua ma fale, i se faalapotopotoga o loo faaaogā e Molimau a Ieova, pe tuu e nofo ai pea lē e ana le fale seʻia oo ina maliu, ona faatoʻā maua lea e le lālā.

Tupe Faameaalofa e Iai Tuutuuga (Gift Annuity): O nei tupe, o se meaalofa ua faatulaga e avatu i se faalapotopotoga o loo faaaogāina e Molimau a Ieova. Ae e maua e lē e ana le foaʻi po o se tasi ua ia tofia, se tino i tupe i tausaga taʻitasi a o soifua pea o ia. O le a faaitiitia le lafoga e totogi e le tagata na faia le foaʻi, i le tausaga na faamautūina ai lea fuafuaga.

Uili ma Mavaega: E mafai ona foaʻi atu meatotino po o se vaega tupe i se faalapotopotoga o loo faaaogāina e Molimau a Ieova, e ala i se uili ua faia e tusa ai ma le tulafono. Pe mauaina foʻi e lenei faalapotopotoga le taui o se teugātupe ua tuu faamavaega. O le faia faapea, e mafai ona faaitiitia ai lafoga e totogi.

E pei ona faailoa mai i le faaupuga “fuafuaga o foaʻi faameaalofa,” o nei foaʻi, e manaʻomia ona fuafua lelei e lē e ana le foaʻi. Ina ia fesoasoani i ē o loo fia faia ni meaalofa tauofo i le galuega a Molimau a Ieova i le lalolagi aoao, ua saunia ai se polosiua i le faa-Peretania ma le faa-Sepania e taʻua o le Charitable Planning to Benefit Kingdom Service Worldwide. Ua saunia i le polosiua faamatalaga i auala eseese e faia ai foaʻi faameaalofa i le taimi lenei, ma pe a maliu lē e ana le foaʻi. Atonu e lē o faamatalaga uma i le polosiua e aogā i lou tulaga, ona o tulafono o lafoga po o nisi o tulafono i lou atunuu. O lea, pe a uma ona e faitau i le polosiua, ona outou talanoa lea ma lōia po o tagata faufautua e faatatau i lafoga. O nei auala ua mafai ai e le toʻatele ona lagolagoina fuafuaga a Molimau a Ieova i le lalolagi aoao, ma maua ai foʻi le fesoasoani i le faaitiitia o lafoga e totogi. Atonu e mafai ona e talosagaina se kopi o lenei polosiua mai le failautusi o lau faapotopotoga, pe afai e maua i lou atunuu.

Mo nisi faamatalaga, faafesootaʻi le ofisa o le lālā.