TALIINA FESILI FAALE-TUSI PAIA
Po o le a iai se taimi e na o le tasi ai lava le malo e pulea le lalolagi atoa?
E faapefea i se malo e pulea le lalolagi ona autasia tagata o atunuu uma? Isaia 32:1, 17; 54:13
Seʻi faaāta i le mafaufau aogā e maua e tagata mai i se malo e pulea le lalolagi. E toʻatele tagata o loo mafatia i aso nei ona o le matitiva, ae o loo matuā tamaoaiga isi. Peitaʻi, o se malo e malamalama i manaʻoga o ona tagata uma, e faamautinoa e maua e tagata mea e manaʻomia. Pe e te manatu e mafai e tagata ona faavaeina se malo faapena?—Faitau le Ieremia 10:23.
Ua tele tausaga e lē o taulau faigāmalo i le tele o auala ina ia tausia ai o latou tagatānuu, aemaise lava i ē matitiva. O nisi faigāmalo e lē alolofa. (Failauga 4:1; 8:9) Peitaʻi, ua folafola mai e le Atua o Lē e ona le malosi uma lava, se malo o le a suia malo uma lava. E manatu mamafa le Tupu o lenā malo i tagata.—Faitau le Isaia 11:4; Tanielu 2:44.
O ā mea o le a faia e le Malo o le Atua?
Ua filifilia e Ieova le Atua lona Alo o Iesu, o sē ua agavaa e avea ma Tupu e pulea le lalolagi. (Luka 1:31-33) A o iai Iesu i le lalolagi, sa fiafia e fesoasoani i tagata. I le avea ai ma Tupu, o le a ia autasia tagata o atunuu uma ma aveesea o latou puapuaga uma.—Faitau le Salamo 72:8, 12-14.
Po o tagata uma lava o le a latou talia Iesu o le Tupu? E leai. Peitaʻi, o loo onosaʻi mai pea Ieova. (2 Peteru 3:9) Ua ia tuu mai le avanoa i tagata e talia ai Iesu e avea ma Tupu. Ua lē o toe umi ona tafiesea lea e Iesu tagata leaga mai i le lalolagi, ae aumaia le filemu ma le saogalemu i le lalolagi aoao.—Faitau le Mika 4:3, 4.