MATAUPU AUTŪ | PE E TE FIA SUʻESUʻEINA LE TUSI PAIA?

Se Polokalame O Talanoaga Faale-Tusi Paia mo Tagata Uma

Ua lauiloa Molimau a Ieova i la latou talaʻiga i le lautele. Ae pe e te silafia e matou te faia foʻi se polokalame i le lalolagi aoao, o talanoaga faale-Tusi Paia?

O se tamāloa o loo fai lana talanoaga faale-Tusi Paia i lona fale faigaluega

I le 2014, na faia ai e le silia i le 8,000,000 o Molimau a Ieova i atunuu e 240, ni suʻesuʻega faale-Tusi Paia e pe ā ma le 9,500,000 i masina taʻitasi.a O le mea moni, e pe ā ma le 140 atunuu e lē oo le faitau aofaʻi o o latou tagatānuu, i le aofaʻi o tagata ia o loo faia ni talanoaga faale-Tusi Paia ma i matou.

Ina ia faataunuu lenei galuega tauaʻoaʻoga, ua lomia ai e Molimau a Ieova i tausaga taʻitasi le toetoe tasi ma le ʻafa piliona o Tusi Paia, tusi, mekasini ma isi lomiga e faia ai talanoaga faale-Tusi Paia, i gagana pe ā ma le 700. E lē mafaatusalia lenei taumafaiga, ma ua mafai ai ona suʻesuʻe e tagata le Tusi Paia i gagana e latou te mananaʻo ai.

“Ou te leʻi fiafia e suʻesuʻe a o iai i le aʻoga, ae o loʻu fiafia ia i lenei suʻesuʻega. E ese le faamāfanafanaloto o mea ua ou aʻoaʻoina!”—Katlego, Aferika i Saute.

“O lenei polokalame ua tali ai aʻu fesili uma ma le tele o isi fesili.”—Bertha, Mekisikō.

“Sa faia aʻu suʻesuʻega faale-Tusi Paia i loʻu fale i le taimi e fetaui ma aʻu. E pau lava lenā o le mea na ou manaʻo ai!”—Eziquiel, Pasili.

“O nisi taimi e 15 i le 30 minute le umi o talanoaga, ae o isi taimi ua umi atu, e fua i le mea e fetaui mo aʻu.”—Viniana, Ausetalia.

“Sa faia talanoaga e aunoa ma se totogi, ma e ese le manaia!”—Aimé, Benin.

“E ese le onosaʻi ma le agalelei o loʻu faiaʻoga o le Tusi Paia. Sa māfana la maʻua mafutaga.”—Karen, Aialani i Mātū.

“E toʻatele tagata e suʻesuʻeina le Tusi Paia ae e lē avea ma Molimau.”—Denton, Egelani.

TALI O FESILI E MASANI ONA LĀGĀ E UIGA I LA MATOU POLOKALAME O TALANOAGA FAALE-TUSI PAIA

O le ā le auala e fai ai le talanoaga?

E eseese mataupu o le Tusi Paia e talanoaina, ma e iloilo mau e fesootaʻi i na mataupu. O se faaaʻoaʻoga, e tali i le Tusi Paia fesili e pei o nei: O ai le Atua? E faapeʻī o ia? Pe e iai sona suafa? O fea e afio ai o ia? Pe e mafai ona tatou mafuta vavalalata atu iā te ia? O le luʻi, o le iloaina lea po o ā mau o le Tusi Paia e maua ai tali.

Ina ia fesoasoani i tagata e maua tali, e masani ona matou faaaogā le tusi e 224 itulau, ua faamatuaina O ā Aʻoaʻoga Moni a le Tusi Paia?b O lenei tusi ua saunia faapitoa ina ia fesoasoani i tagata ia malamalama i aʻoaʻoga faavae o le Tusi Paia. O loo iai mataupu e faatatau i le Atua, Iesu Keriso, mafatiaga o tagata, toetū, tatalo, ma le tele o isi mataupu.

O le ā le taimi ma o fea e mafai ona fai ai le talanoaga?

E mafai ona faia i le taimi ma le nofoaga e fetaui ma oe.

O le ā le umi o se talanoaga?

O le toʻatele o tagata e latou te faaavanoa se itula pe sili atu i vaiaso taʻitasi, ina ia faia ai se talanoaga faale-Tusi Paia. Ae e fetuunaʻi lava le umi, e fua i lau faasologa. O nisi talanoaga e faia mo na o le 10 pe 15 minute i vaiaso taʻitasi.

E fia le totogi o le talanoaga?

E lē totogiina le talanoaga ma lomiga e faaaogā. E ōgatusa lea ma le faatonuga a Iesu i ona soo: “Ia outou avatu fua, auā ua outou maua fua.”—Mataio 10:8.

O le ā le umi e fai ai lenei polokalame?

E faalagolago le umi o le suʻesuʻega i le mea e talafeagai ma oe. E 19 mataupu o loo i le tusi O ā Aʻoaʻoga Moni a le Tusi Paia? E mafai ona e talanoaina so o se mataupu po o mataupu uma foʻi i le vave e talafeagai ma oe.

Pe e tatau ona avea aʻu ma Molimau a Ieova pe a uma aʻu talanoaga?

E leai. E matou te iloa ua iai i tagata uma le aiā e filifili ai mea e talitonu ai. Peitaʻi, o tagata ua maua le poto faavae o le Tusi Paia, e mafai ona faia se filifiliga atamai.

O fea ou te maua ai nisi faamatalaga atili?

O loo maua i le Upega tafaʻilagi o le jw.org faamatalaga saʻo e faatatau i talitonuga ma galuega a Molimau a Ieova.

E faapefea ona talosaga saʻu talanoaga faale-Tusi Paia?

E tele auala e mafai e tagata ona talosagaina ai se talanoaga faale-Tusi Paia: e ala i le initaneti, tusi atu se tusi, pe faafesootaʻi se molimau a ieova i lou vaipanoa

Faaoo mai lau talosaga e ala mai i le www.jw.org/sm.
Tusi atu i se tuatusi e latalata ane, o loo i le itulau e lua o lenei mekasini.
Faafesootaʻi Molimau a Ieova e latalata ane i lou vaipanoa.

a E masani ona faia talanoaga faale-Tusi Paia ma tagata taʻitoʻatasi, po o ni vaega toʻaitiiti o tagata.

b Lomia e Molimau a Ieova. E silia i le 230 miliona kopi o lenei tusi ua lomia i gagana e silia ma le 260.

FESOASOANI MO AIGA

“Ina ua suʻesuʻe e laʻu avā le Tusi Paia, e mataʻina suiga na ou mātauina iā te ia. Ua faaleleia le tulaga o mea i lo matou aiga. Talu ai sa ou fia iloa po o ā mea o loo ia aʻoaʻoina, o lea na fai ai foʻi saʻu suʻesuʻega. Ua avea aʻu ma tagata lelei ona o mea na ou aʻoaʻoina, ma ua māfana lo matou aiga ona o le suʻesuʻeina o le Tusi Paia.”—Eziquiel.

“Ina ua ou suʻesuʻeina le Tusi Paia, sa faamuta loa aʻu masaniga o le faaaogāsesēina o vailaau ma fualaau, faapea le ʻava malosi. Ua ou iloa pulea loʻu ita, ma ua sili atu ona mamā loʻu fale. Ua ou matuā lotofaafetai mo loʻu aiga ma fiafia e fai mea e faafiafia ai i latou. Ua sili atu loʻu fiafia.”—Karen.

“Sa faitio nisi tagata iā te aʻu ona o le suʻesuʻeina o le Tusi Paia. Peitaʻi sa lagolagoina e laʻu tane laʻu filifiliga ma faapea mai: ʻOu te lē popole i tala a tagata. O le mea tāua iā te aʻu o le vaai atu i suiga lelei iā te oe. Ia faaauau pea lau suʻesuʻega.’ Ua faaleleia le tulaga o mea i lo matou aiga!”—Viniana.