O le ā le Talanoaga Faale-Tusi Paia o Loo Ofoina e Molimau a Ieova?
Ua ofoina atu e Molimau a Ieova se auala aogā e mafai ona e suʻesuʻeina ai aʻoaʻoga o loo i le Tusi Paia. E mafai ona fesoasoani lenei talanoaga faale-Tusi Paia iā te oe ina ia:
Maua ai se olaga fiafia
Avea ai ma uō a le Atua
Aʻoaʻoina ai folafolaga a le Tusi Paia mo le lumanaʻi
I lenei itulau
Pe a ou talia se suʻesuʻega faale-Tusi Paia, po o le a faamalosia ai aʻu e avea ma Molimau a Ieova?
Pe e iai se auala e mafai ona ou suʻesuʻeina ai le Tusi Paia e aunoa ma se faiaʻoga?
O le ā e faia i se suʻesuʻega faale-Tusi Paia?
O le a fesoasoani se faiaʻoga iā te oe ina ia e malamalama i le Tusi Paia, a o talanoaina mataupu taʻitasi. O lenei talanoaga faale-Tusi Paia e faaaogā ai le tusi Se Olaga Fiafia e Faavavau! o le a fesoasoani iā te oe, ina ia faasolosolo ai ona e aʻoaʻoina le feʻau o loo i le Tusi Paia, ma le auala o le a aogā ai iā te oe. Ina ia aʻoaʻo atili, maimoa i le vitiō lenei.
Pe e manaʻomia ona totogi lenei suʻesuʻega?
Leai. E mulimuli Molimau a Ieova i le faatonuga na avatu e Iesu i ona soo: “Ia outou avatu fua, auā ua outou maua fua.” (Mataio 10:8) E lē gata i lea, e lē faatauina foʻi lomiga e faaaogā i lenei talanoaga, e aofia ai se kopi o le Tusi Paia ma le lomiga Se Olaga Fiafia e Faavavau!
O le ā le umi o le talanoaga?
E 60 lesona o le talanoaga. E pule lava oe i le tele e fai ai lau suʻesuʻega. O nisi tagata e mananaʻo e suʻesuʻe se lesona se tasi pe sili atu i le vaiaso.
E faapefea ona amata?
1. Faatumu le pepa talosaga i le initaneti. O le a matou faaaogāina faamatalaga na e faatumuina, ina ia faatulaga ai se Molimau a Ieova e fesootaʻi atu iā te oe.
2. O le a fesootaʻi atu se tasi e te lua suʻesuʻeina le Tusi Paia. O le a ia faamatala atu mea e fai i le talanoaga faale-Tusi Paia, ma tali so o se fesili e te fia malamalama ai.
3. O le a lua faatulaga loa le suʻesuʻega. E mafai ona faia le suʻesuʻega i so o se nofoaga e talafeagai ma oe, telefoni, tusi po o le imeli. E masani lava e itula le umi o le suʻesuʻega, ae e mafai foʻi ona faapuupuu pe sili atu ma le itula, e fua i lau faasologa.
Pe e mafai ona ou faataʻitaʻi muamua?
Ioe. Ia faatumu le pepa talosaga i le initaneti. Pe a fesootaʻi atu se tasi e te lua suʻesuʻeina le Tusi Paia, faailoa i ai e te manaʻo e faataʻitaʻi muamua le suʻesuʻega, ina ia iloa ai pe e te fiafia i ai. O le a ia faaaogā le polosiua Se Olaga Fiafia e Faavavau! lea e tolu lesona, ina ia faataʻitaʻi ai pe e te fiafia i le suʻesuʻega.
Pe a ou talia se suʻesuʻega faale-Tusi Paia, po o le a faamalosia ai aʻu e avea ma Molimau a Ieova?
E leai. E naunau Molimau a Ieova e aʻoaʻo tagata e faatatau i le Tusi Paia, ae e matou te lē faamalosia se tasi e auai i le matou tapuaʻiga. Nai lo o lea, e matou te faailoa atu ma le faaaloalo manatu o le Tusi Paia, ma amanaʻia le aiā a le tagata e filifili ai le mea e talitonu i ai.—1 Peteru 3:15.
Pe e mafai ona faaaogā laʻu lava Tusi Paia?
Ioe, e mafai ona faaaogā so o se faaliliuga o le Tusi Paia e te manaʻo ai. E matou te fiafia e faaaogā le faaliliuga manino ma saʻo aʻiaʻi O le Tusi Paia—Faaliliuga a le Lalolagi Fou, ae o le toʻatele o tagata e mananaʻo e faaaogā se faaliliuga ua masani ai.
Pe e mafai ona ou valaaulia nisi i le suʻesuʻega?
Ioe. E mafai ona faaaofia ai lou aiga atoa, po o sau uō e te manaʻo e valaaulia.
Pe e mafai ona toe fai saʻu suʻesuʻega, pe afai na ou suʻesuʻeina muamua le Tusi Paia ma Molimau a Ieova?
Ioe. Atonu o le a sili atu ona e fiafia i le suʻesuʻega i le taimi lenei nai lo o le taimi muamua, ona o lea ua toe fetuunaʻi e fua i mea e fiafia i ai tagata i aso nei. Ua tele atu fesoasoani vaaia e faaaogā ma ua faatalanoa le auala e fai ai, nai lo o le taimi muamua.
Pe e iai se auala e mafai ona ou suʻesuʻeina ai le Tusi Paia e aunoa ma se faiaʻoga?
Ioe. O le toʻatele o tagata aʻoga e sili atu ona faigofie pe a suʻesuʻe faatasi ma se faiaʻoga, ae o nisi e sili atu le suʻesuʻe na o i latou lava i le amataga. I le vaega o Meafaigaluega mo Suʻesuʻega Faale-Tusi Paia, o loo maua ai meafaigaluega ma isi mea manaʻomia e fesoasoani i au suʻesuʻega o le Tusi Paia, e aunoa ma se totogi. O nisi nei o meafaigaluega e ono fesoasoani iā te oe:
Vitiō. O nei vitiō pupuu o loo faamatala ai aʻoaʻoga faale-Tusi Paia.
Taliina o Fesili Faale-Tusi Paia. O nei mataupu o loo taliina ai le tele o fesili faale-Tusi Paia.
Uiga o Mau. O loo faamatala ai uiga moni o mau ma faaupuga taatele o le Tusi Paia.