Pe e Sesē le Faavauvau?

Pe na e maʻi tigāina mo sina taimi? Atonu na vave ona e toe malosi ma e te lē o manatua ou tigā i lenā taimi. Peitaʻi, e lē faapena le faavauvau. Na taʻua e Dr. Alan Wolfelt i lana tusi Healing a Spouse’s Grieving Heart: “E leai se mea e taʻu o le ʻmou atu’ le faavauvau.” Ae na ia taʻua atili: “A o faagasolo taimi ma le lagolagosua a isi, o le a faaitiitia ai lou faavauvau.”

O se faaaʻoaʻoga, seʻi manatu i faalogona o le augātamā o Aperaamo ina ua maliu lana avā. Ua taʻua i le Tusi Paia “ua amata ona faavauvau ma tagiauē Aperaamo ona o Sara.” (Kenese 23:2, NWT) O le faaupuga “ua amata,” e taʻu mai ai sa umi se taimi o faavauvau Aperaamo ona o le maliu o lana avā.a O le isi faaaʻoaʻoga o Iakopo, o lē na faasesēina ua fasiotia lona atalii o Iosefa e se manu feʻai. Sa faavauvau o ia “i le tele o aso” ma na lē mafai e lona aiga ona faamāfanafanaina o ia. I le tele o tausaga mulimuli ane, sa mafatia pea o ia i le maliu o Iosefa.—Kenese 37:34, 35; 42:36; 45:28.

E faapena foʻi le toʻatele i aso nei o loo faavauvau i le maliliu o ē e pele iā i latou. Seʻi manatu i faaaʻoaʻoga e lua o loo mulimuli mai.

• “Na maliu si aʻu tane o Robert iā Iulai 9, 2008. E leai se eseesega o le taeao na tupu ai le faalavelave mai i isi aso. E pei ona ma masani ai a o leʻi alu e faigaluega, e inu le ma ti, sogi atu le tasi i le isi, opo atu ma fai atu, ʻOu te alofa iā te oe.’ O lea ua mavae le ono tausaga ae o loo oʻu mafatia pea. Ailoga a teʻa loʻu faavauvau ona o le maliu o Rob.”—Gail, ua 60 ona tausaga.

• “E ui lava ua silia i le 18 tausaga talu ona maliu si aʻu avā pele, ae o loo ou faavauvau ma misia pea o ia. O so o se taimi lava ou te vaai ai i se mea matagofie i le siʻosiʻomaga, ou te mafaufau ma taumānatu, ai sona fiafia pe a vaai foʻi i mea ia ou te vaai i ai.”—Etienne, ua 84 ona tausaga.

Ua manino mai, o se tulaga masani le iai pea o faalogona tigā. E eseese uma auala e faavauvau ai tagata, ma e lē o se mea atamai le faamasino o le auala e tali atu ai isi i tulaga mafatia. Atonu foʻi e manaʻomia ona ʻalofia le taʻusalaina o i tatou lava pe afai ua tatou soona faavauvau. E faapefea ona tatou onosaia faalogona faavauvau?