Pe a Lagona le Faavauvau

E anoanoaʻi fautuaga e faatatau i lenei mataupu. Peitaʻi e lē o fautuaga uma e aogā. O se faaaʻoaʻoga, e ono fautua atu nisi iā te oe e aua e te tagi pe faailoa atu ou faalogona faavauvau. Ae atonu e uunaʻia oe e isi ia tagi ma faailoa uma atu ou faalogona. Peitaʻi e paleni le vaaiga o loo taʻua i le Tusi Paia, ma ua lagolagoina e suʻesuʻega i aso nei.

I nisi aganuu, e manatu e lē o se tamatane se alii pe a tagi. Ae pe e ao ona matamuli se tasi e tagi, e tusa pe o iai nisi tagata? Ua taʻua e tagata atamamai tau i le mafaufau, o le maligi o loimata o se vala masani o le faavauvau. O nisi taimi e ono fesoasoani le faavauvau ina ia e faia pea mea masani o le olaga, e ui e faigatā le maliu o sē e pele. Peitaʻi o le taofiofi o faalogona faavauvau, e ono iai ni ona aafiaga lē lelei iā te oe. E lē o lagolagoina i le Tusi Paia le manatu, e sesē pe e lē tatau i se tane ona tagi. O se faaaʻoaʻoga o Iesu. E ui lava sa iā te ia le mana e toe faatū mai ai sē ua oti, ae sa tagi o ia a o iai isi tagata, ona o le maliu o lana uō pele o Lasalo.—Ioane 11:33-35.

E masani lava o le ita o se isi vaega o le faavauvau, aemaise pe afai e oti faafuaseʻi se tasi. E tele māfuaaga e lagona ai e lē o loo faavauvau le ita, e pei o taimi e faia ai e se tagata maufaatuatuaina se faamatalaga e lē faautauta ma lē moni. Na taʻua e se tamāloa e igoa iā Mike mai i Aferika i Saute, “Na oti loʻu tamā faatoʻā 14 oʻu tausaga. I le sauniga o le maliu, na taʻua e le faifeʻau o le lotu Egelani o loo manaʻomia e le Atua ni tagata lelei, ma e vave ona ia amia i latou.a Sa ou ita tele i lenei faamatalaga ona sa matou matuā manaʻomia lo matou tamā. O lea ua mavae le 63 tausaga ae o loo oʻu tigā pea.”

Ae faapefea lagona nofosala? E ono mafaufau pea le tagata faavauvau, aemaise pe a oti faafuaseʻi se tasi, e faapea: ʻAiloga e tupu lenei mea pe ana faapea ou te faia le mea lea po o le mea lenā.’ Pe atonu foʻi o le taimi mulimuli na lua talanoa ai ma lē ua maliu, na lua misa ai. O nei tulaga e ono atili ai ona e lagona le nofosala.

Pe afai o loo e feagai ma nei lagona ita ma le nofosala, e lelei pe a aua neʻi taofiofia nei faalogona. Nai lo o lea, ia talanoa atu i sau uō o le a faalogo mai ma faamautinoa mai, o na faalogona lē lelei e masani lava ona iai i tagata faavauvau. Ua faamanatu mai i le Tusi Paia: “O le uō moni e alofa i taimi uma, ma o ia o se uso ua fanau mo le taimi o puapuaga.”—Faataoto 17:17.

O le Uō sili a sē o faavauvau, o Lē na faia i tatou, o Ieova le Atua. Ia sasaa atu ou faalogona iā te ia i le tatalo, auā “o loo manatu mamafa mai o ia” iā te oe. (1 Peteru 5:7) Ua ia folafola mai o ē uma e faia faapea, o le a faamāfanafanaina o latou loto ma faalogona “i le filemu mai i le Atua, e silisili i mea uma lava e manatu i ai.” (Filipi 4:6, 7) Ia tuu atu foʻi i le Atua e fesoasoani mai e faaleleia ou faalogona, e ala mai i lana Afioga faamāfanafanaloto le Tusi Paia. Ia tusi i lalo ni mau faamāfanafanaloto. (Tagaʻi i le pusa.) Atonu foʻi e te manaʻo e tauloto nisi o na mau. O le mafaufau i na manatu e fesoasoani iā te oe, aemaise lava i le pō pe afai ua na o oe ma ua lē mafai ona e moe.—Isaia 57:15.

E leʻi leva atu ona maliu le avā pele a se tane e 40 tausaga, o le a tatou faaigoa iā Siaki, ona o le kanesa. Na taʻua e Siaki o nisi taimi e na te matuā lagona le tuua toʻatasi. Peitaʻi ua fesoasoani le tatalo iā te ia. Ua ia faapea mai: “Pe a ou tatalo iā Ieova, ou te lē toe lagona le tuua toʻatasi. E masani ona ou ala i le pō ma lē mafai ona ou toe moe. Pe a uma ona ou faitau ma manatunatu i manatu faamāfanafanaloto mai i le Tusi Paia, ona faailoa atu lea o oʻu faalogona i le Atua e ala i le tatalo. Ou te lagona le toʻafilemu o le mafaufau ma le loto ma mafai loa ona ou toe moe.”

Na maliu le tinā o se tamaʻitaʻi talavou e igoa iā Vanessa ona o se maʻi. Ua tofo foʻi Vanessa i aogā o le tatalo. Ua ia faapea mai: “I taimi e sili ona faigatā, ou te tagi ma valaau atu i le suafa o le Atua. E faafofoga mai Ieova i aʻu tatalo ma e na te aumaia i taimi uma le malosi ou te manaʻomia.”

O nisi tagata faufautua mo ē faavauvau, e latou te fautuaina ē o loo tauivi ma faalogona faavauvau ia galulue e fesoasoani i isi, pe ofo atu lo latou taimi e faia ai galuega fesoasoani mo tagata lautele. O le faia faapea e lagona ai le olioli ma e ono faaitiitia ai le faavauvau. (Galuega 20:35) Ua iloa e le toʻatele o Kerisiano faavauvau, o le fesoasoani i isi, ua matuā faamāfanafanaina ai i latou.—2 Korinito 1:3, 4.