Pe e te Manaʻo e Faatusatusa Ou Talitonuga ma le Tusi Paia?

PE E te faapea mai o oe o se Kerisiano? Afai o lea, o oe la o se tasi o le silia i le lua piliona o tagata i le lalolagi ua faapea mai o soo o Keriso. I aso nei e faitau afe lotu ua faapea mai o Kerisiano, peitaʻi e fevaevaeaʻi o latou talitonuga ma eseese o latou manatu. O lea, atonu e ese mamao ou talitonuga mai i isi o loo faapea mai foʻi o Kerisiano. Pe e tāua mea e te talitonu i ai? Ioe, pe afai e te fia ola e ōgatusa ma le faa-Kerisiano o loo aʻoaʻo i le Tusi Paia.

Na taʻua uluaʻi soo o Iesu Keriso o “Kerisiano.” (Galuega 11:26) E leʻi tau manaʻomia se isi igoa e iloa ai i latou ona e tasi le faatuatuaga Kerisiano na iai. Sa mulimuli ma le autasi Kerisano uma i aʻoaʻoga ma faatonuga a Lē na faavaeina le faa-Kerisiano, o Iesu Keriso. Ae ā lau tapuaʻiga? Pe e te manatu o loo aʻoaʻoina ai mea na aʻoaʻo e Keriso ma talitonu ai ona uluaʻi soo? E faapefea ona e faamautinoa? E pau le auala o le faaaogā lea o le Tusi Paia e faatusatusa ai.

Seʻi iloilo le vala lenei: Sa matuā faatāua e Iesu Keriso Tusitusiga Paia o le Afioga a le Atua. E na te leʻi taliaina i latou na suia aʻoaʻoga a le Tusi Paia e ala i le faamuamua o tū faale-faatagata. (Mareko 7:9-13) E mafai la ona tatou faapea atu o soo moni o Iesu e faavae a latou aʻoaʻoga i le Tusi Paia. Ia fesili ifo le Kerisiano iā te ia lava, “Po o tutusa aʻoaʻoga a laʻu lotu ma le Tusi Paia?” Ina ia tali lenā fesili, ia faatusatusa mea o loo aʻoaʻoina e lau lotu i mea o loo taʻua i le Tusi Paia.

Na fetalai Iesu e tatau ona faavae la tatou tapuaʻiga i le Atua i le upu moni, ma o lenā upu moni o loo i le Tusi Paia. (Ioane 4:24; 17:17) Na taʻua foʻi e le aposetolo o Paulo e faalagolago lo tatou faaolataga i le mauaina o le “poto saʻo i le upu moni.” (1 Timoteo 2:4) O lea e tāua tele ona faavae mai o tatou talitonuga i le poto saʻo o le Tusi Paia, auā e faalagolago i ai lo tatou faaolataga.

AUALA E FAATUSATUSA AI O TATOU TALITONUGA I LE TUSI PAIA

E matou te faalaeiau oe ia faitau fesili e ono o loo i lenei mataupu, ma mātau tali o na fesili mai i le Tusi Paia. Suʻe mau o le Tusi Paia o loo sii mai ma manatunatu i tali o loo iai, ona e fesili ifo lea, ʻE faapefea ona faatusatusa aʻoaʻoga a laʻu lotu i mea o loo taʻua i le Tusi Paia?’

O lenei iloiloga puupuu e ono fesoasoani iā te oe e faia ai se faatusatusaga e sili ona aogā. Pe e te manaʻo e faatusatusa nisi aʻoaʻoga a lau lotu i mea o loo taʻua i le Tusi Paia? E fiafia Molimau a Ieova e fesoasoani atu iā te oe e iloilo aʻoaʻoga moni a le Tusi Paia. E mafai ona e talosaga atu i se Molimau a Ieova mo se suʻesuʻega faale-Tusi Paia e aunoa ma se totogi, pe tagaʻi i la matou Upega tafaʻilagi o le jw.org/sm.

1 FESILI: O ai le Atua?

TALI: O Ieova, o le Tamā o Iesu, o le Atua e faavavau, ma o Lē e ona le malosi uma lava na foafoaina mea uma.

LE MANATU O LE TUSI PAIA:

• “Matou te faafetai e lē aunoa i le Atua le Tamā o lo tatou Alii o Iesu Keriso, pe a matou tatalo mo outou.”—Kolose 1:3.

• “Ieova e, lo matou Atua, ua tatau lava oe ona e mauaina le viiga, ma le mamalu, ma le mana, auā na e foafoaina mea uma lava.”—Faaaliga 4:11.

• Tagaʻi foʻi i le Roma 10:13; 1 Timoteo 1:17.

2 FESILI: O ai Iesu Keriso?

TALI: O le Atalii ulumatua o le Atua. Na foafoaina Iesu ma e iai lona amataga. E gauaʻi atu Iesu i le Atua ma usitaʻi e faia Lona finagalo.

LE MANATU O LE TUSI PAIA:

• “E sili le Tamā iā te aʻu.”—Ioane 14:28.

• “O [Iesu] ua foliga i le Atua e lē vaaia, o le ulumatua o foafoaga uma.”—Kolose 1:15.

• Tagaʻi foʻi i le Mataio 26:39; 1 Korinito 15:28.

3 FESILI: O le ā le agaga paia?

TALI: O le agaga paia e lē o se tagata ae o le mana galue e faaaogā e le Atua e faataunuu ai lona finagalo. E mafai ona faatumuina ma faamalosia tagata i le agaga paia.

LE MANATU O LE TUSI PAIA:

• “Ina ua faalogo mai Elisapeta i le leo o Maria, ona osooso ai lea o le pepe o loo i lona manava; ma ua faatumuina Elisapeta i le agaga paia.”—Luka 1:41.

• “E maua e outou le mana, pe a oo ifo iā te outou le agaga paia.”—Galuega 1:8.

• Tagaʻi foʻi i le Kenese 1:2; Galuega 2:1-4; 10:38.

4 FESILI: O le ā le Malo o le Atua?

TALI: O le Malo o le Atua o se pulega faalelagi. O Iesu o le Tupu o le Malo o le Atua. Ua toeitiiti ona faia lea o le finagalo o le Atua i le lalolagi atoa e ala i lenā Malo.

LE MANATU O LE TUSI PAIA:

• “Ona ʻili lea e le agelu lona fitu o lana pū. Ona iai lea i le lagi o leotetele ua faapea mai: ʻUa avea lo tatou Alii ma lona Keriso ma pule o le lalolagi, e pule foʻi o ia o se tupu e faavavau, faavavau lava.’”—Faaaliga 11:15.

• Tagaʻi foʻi i le Tanielu 2:44; Mataio 6:9, 10.

5 FESILI: Po o tagata lelei uma e ō i le lagi?

TALI: E leai. E na o se vaega itiiti o tagata faamaoni ua taʻua o le “lafu mamoe itiiti,” ua filifilia e le Atua e ō i le lagi. O le a latou pule mai o ni tupu faatasi ma Iesu i tagata.

LE MANATU O LE TUSI PAIA:

• “Aua le fefefe le lafu mamoe itiiti e, auā ua finagalo malie lo outou Tamā e tuuina atu le malo iā te outou.”—Luka 12:32.

• “E fai i latou ma ositaulaga a le Atua ma le Keriso, e pule i latou o ni tupu faatasi ma ia.”—Faaaliga 20:6.

• Tagaʻi foʻi Faaaliga 14:1, 3.

6 FESILI: O le ā le finagalo o le Atua mo le lalolagi ma tagata?

TALI: I le pulega o le Malo o le Atua, o le a avea ai le lalolagi ma parataiso ma maua ai e tagata faamaoni se soifua mālōlōina lelei atoatoa, le filemu tumau ma le ola e faavavau.

LE MANATU O LE TUSI PAIA:

• “O ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu.”—Salamo 37:10, 11.

• “E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.”—Faaaliga 21:3, 4.

• Tagaʻi foʻi i le Salamo 37:29; 2 Peteru 3:13.