Aiseā ua Tele ai TUSI PAIA?

Aiseā ua tele ai ituaiga po o faaliliuga eseese o le Tusi Paia i aso nei? Pe e te manatu i na ituaiga fou o se fesoasoani, po ua faafaigatā ai ona e malamalama i le Tusi Paia? O le malamalama e faatatau i ē na faaliliuina nei faaliliuga eseese o le Tusi Paia ma le māfuaaga na faia ai, e mafai ona fesoasoani ai iā te oe e filifili ma le atamai se faaliliuga.

Ae muamua, o ai na tusia le Tusi Paia, ma o anafea?

ULUAʻI TUSITUSIGA O LE TUSI PAIA

Ua vaevaeina le Tusi Paia i ni vaega se lua. O le vaega muamua e 39 tusi lea o loo iai “afioga paia a le Atua.” (Roma 3:2) Na faagaeeina e le Atua ni tane faamaoni e tusia nei tusi i se vaitaimi umi, lea e pe ā ma le 1,100 tausaga e amata mai i le 1513 T.L.M., seʻia oo i se vaitaimi ina ua mavae le 443 T.L.M. O le tele o nei tusi na tusia i le gagana Eperu, o lea ua taʻua ai lenei vaega, o Tusitusiga Paia Eperu po o le Feagaiga Tuai.

O le vaega lona lua e 27 tusi ʻo le afioga foʻi lea a le Atua.’ (1 Tesalonia 2:13) Na faagaeeina e le Atua soo faamaoni o Iesu Keriso e tusia nei tusi i se vaitaimi puupuu, lea e pe ā ma le 60 tausaga e amata mai i le pe tusa o le 41 T.A. e oo i le 98 T.A. O le tele o nei tusi na tusia i le gagana Eleni, o lea ua taʻua ai lenei vaega, o Tusitusiga Paia Eleni po o le Feagaiga Fou.

Pe a tuufaatasi nei tusi e 66 ua faagaeeina e le Atua, ona maua ai lea o le Tusi Paia atoa po o le feʻau a le Atua mo tagata. Ae aiseā na toe faia ai isi faaliliuga o le Tusi Paia? O nisi nei o māfuaaga autū e tolu.

Ina ia mafai ai e tagata ona faitau le Tusi Paia i la latou lava gagana.
Ina ia aveese mea sesē na faia e i latou na toe tusia le Tusi Paia, ma toe faafoʻisia ai uluaʻi tusitusiga o le Tusi Paia.
Ina ia toe faafou le gagana maotua o loo iai i le Tusi Paia, i le gagana o loo faaaogā i aso nei.

Seʻi mātau po o le ā le aafiaga o na vala i ni uluaʻi faaliliuga se lua o le Tusi Paia.

LE FAALILIUGA ELENI E TAʻUA O LE SEPTUAGINT

Pe tusa ma le 300 tausaga a o leʻi oo i aso o Iesu, na amata ai ona faaliliu e faitofā Iutaia Tusitusiga Paia Eperu i le gagana Eleni. Na taʻua lenā faaliliuga faa-Eleni o le Septuagint. Aiseā na faia ai lenā faaliliuga? O le toʻatele o tagata Iutaia i lenā taimi sa tautatala i le gagana Eleni nai lo o le gagana Eperu. O le faia la o lenā faaliliuga, na fesoasoani ai iā i latou e malamalama pea i a latou “tusitusiga paia.”—2 Timoteo 3:15.

Na fesoasoani foʻi le Septuagint i le faitau miliona o tagata e lē o ni Iutaia e tautatala i le gagana Eleni, ina ia iloa mea o loo aʻoaʻoina i le Tusi Paia. I le ā le itu? Ua faapea mai le polofesa o W. F. Howard, e toetoe 2,000 tausaga ua mavae “na avea ai lenā faaliliuga ma Tusi Paia a Lotu Kerisiano, na ō atu mai i lea sunako i lea sunako a latou misionare ma ʻfaamaonia mai i tusitusiga paia o Iesu le Mesia.’” (Galuega 17:3, 4; 20:20) O se tasi lenā o māfuaaga na ʻlē toe naunau ai le toʻatele o tagata Iutaia i le Septuagint,’ pe a fua i le faamatalaga a se faitofā o le Tusi Paia o F. F. Bruce.

A o faasolosolo ona maua e soo o Iesu tusi taʻitasi o le Tusitusiga Paia Eleni, na latou tuufaatasia ma le faaliliuga Eleni (Septuagint) o le Tusitusiga Paia Eperu, ma o lea la ua maua ai le Tusi Paia atoa o loo iai i aso nei.

LE FAALILIUGA FAA-LATINA E TAʻUA O LE VULGATE

Pe ā ma le 300 tausaga talu ona māeʻa le tusiaina o le Tusi Paia, na faia ai e se faitofā i mataupu faalelotu e igoa iā Jerome se faaliliuga faa-Latina o le Tusi Paia, lea na mulimuli ane taʻua o le faaliliuga faa-Latina o le Vulgate. Ua leva ona iai faaliliuga faa-Latina o le Tusi Paia. Ae aiseā la na toe manaʻomia ai se isi faaliliuga fou? Ua taʻua i le The International Standard Bible Encyclopedia, na manaʻo Jerome e faasaʻo “faaliliuga sesē na iai, ni mea sesē na faigofie na iloa, ma mea e leʻi manaʻomia ona faaopoopo ma aveese mai.”

Na faasaʻo e Jerome le tele o na mea sesē. Ae e leʻi umi ae faia e taʻitaʻi lotu se gaoioiga matuā sesē lava. Na latou faapea mai e na o le faaliliuga faa-Latina o le Vulgate le faaliliuga ua taliaina, ma na faaauau ona latou faia lenei mea mo le tele o senituri. Na faafaigatā e le faaliliuga o le Vulgate ona malamalama ai tagata lautele i le Tusi Paia, ona na faasolosolo ina lē toe malamalama tagata i le gagana Latina.

UA FAATELEINA FAALILIUGA FOU

O le taimi lava lea na faaauau pea ona faia e tagata isi faaliliuga o le Tusi Paia, e pei o le faaliliuga lauiloa i le gagana Syriac o le Peshitta i le pe tusa ma le 1,600 tausaga ua mavae. Ae ina ua oo i le pe ā ma le 600 tausaga ua mavae na toe faia ai isi taumafaiga e faaliliuina le Tusi Paia, i le gagana e malamalama ai le toʻatele o tagata.

I Egelani i le taufaaiʻuiʻuga o le senituri lona 14, na amata ai ona faia e John Wycliffe se gaoioiga ina ia malamalama ai tagata i le Tusi Paia, e ala i le faaliliu o le Tusi Paia i le gagana Peretania lea e malamalama ai tagata i lona atunuu. E leʻi umi, ae faia e Johannes Gutenberg le uluaʻi masini lomitusi. O lenā auala na mafai ai e faitofā o le Tusi Paia ona lomia ma tufatufa atu faaliliuga fou o le Tusi Paia, i le tele o gagana eseese i le atu Europa.

Ina ua faateleina faaliliuga i le gagana Peretania, na fesiligia ai e tagata faitio le māfuaaga ua faia ai faaliliuga eseese o le Tusi Paia i le gagana lava e tasi. Na tusi John Lewis o se faifeʻau Peretania i le pe tusa ma le 300 tausaga ua mavae: “E faasolosolo lava ina mou atu le gagana ma faigatā ona malamalama i ai, o lea e manaʻomia ai ona toe tilofaʻia Faaliliuga tuai, ina ia mafai ona faaaogā se Gagana e faigofie ona malamalama ai augātupulaga i aso nei.”

I aso nei ua iai i le ʻaufaitofā o le Tusi Paia le tele o le tomai e toe tilofaʻia ai faaliliuga tuai o le Tusi Paia. Ua tele lo latou malamalama i gagana anamua na tusia ai le Tusi Paia, ma o loo iā i latou foʻi manusikulipi tāua anamua o le Tusi Paia lea na maua i tausaga lata mai. O na mea e fesoasoani iā i latou e iloa ai uluaʻi tusitusiga o le Tusi Paia.

O lea e matuā tāua le iai o faaliliuga fou o le Tusi Paia. Peitaʻi e manaʻomia ona faaeteete i nisi o na faaliliuga.a Ae afai na uunaʻia i latou na toe teuteuina le Tusi Paia i le alofa moni i le Atua, e mautinoa la e matuā aogā la latou galuega mo i tatou.

Ina ia faitau i le initaneti i le Tusi Paia i lau gagana po o se masini faaonapōnei, tagaʻi i le www.jw.org/sm. Tagaʻi i le LOMIGA > TUSI PAIA, pe faaaogā le code lenei

a Tagaʻi i le mataupu “E Faapefea Ona E Filifilia se Faaliliuga Lelei o le Tusi Paia?” i le lomiga o Me 1, 2008, o lenei mekasini.

Le Suafa Paia O Le Atua I Le Tusi Paia

O se vaega o se manusikulipi o le Septuagint mai i vaitaimi o Iesu, o loo iai le suafa o le Atua

O loo faaaogā i le O le Tusi Paia—O le Faaliliuga a le Lalolagi Fou le suafa paia o le Atua o Ieova, lea o loo iai i Tusitusiga Paia Eperu ma Tusitusiga Paia Eleni. Peitaʻi o le tele o Tusi Paia faa-Peretania i aso nei e lē o faaaogāina lenā suafa. Ae o loo faaaogāina ai le upu “Alii.” O se tasi o māfuaaga, ua faapea mai nisi o tagata faaliliu o le Tusi Paia, e leʻi aliaʻe mai lava le suafa totino o le Atua lea o loo tusia i le Tetakalamatone (YHWH), i le faaliliuga Eleni (Septuagint) o Tusitusiga Paia Eperu. Ae pe e moni lenā manatu?

Na maua i vaitausaga o le 1940 ma le 1950, nisi o vaega ua matuā leva o le faaliliuga e taʻua o le Septuagint mai i vaitaimi o Iesu. Sa iai i lenā faaliliuga le suafa paia o le Atua lea na tusia i mataʻitusi Eperu. E foliga mai i se taimi mulimuli ane, na aveesea ai e i latou na toe tusia le Tusi Paia le suafa o le Atua ae tuu i ai le upu Eleni mo le “Alii,” o le Kyʹri·os. Ua toe faafoʻisia e le Faaliliuga a le Lalolagi Fou le suafa o le Atua i tulaga e tatau ona iai i Tusitusiga Paia.

PO UA SUIA LE FEʻAU O LE TUSI PAIA?

O se tusi tāʻai o le tusi o Isaia ua 2,000 tausaga talu ona iai, na maua i le Sami Mate. E toeitiiti tutusa tusitusiga o loo tusia ai ma le Tusi Paia i aso nei

O le mea moni na faia foʻi e i latou na toe tusia le Tusi Paia mea sesē. Ae e leʻi suia ai le feʻau o le Tusi Paia. “E leai se aʻoaʻoga faavae o le faa-Kerisiano e faalagolago i tusitusiga e lē maufaatuatuaina.”—Our Bible and the Ancient Manuscripts.

E lāiti mea sesē na faia e tagata Iutaia na toe tusia le Tusi Paia. “Na tusia ma toe tusia ma le saʻo aʻiaʻi e le ʻautusiupu Iutaia i senituri anamua o le faa-Kerisiano, tusitusiga o le Tusi Paia Eperu.”—Second Thoughts on the Dead Sea Scrolls.

O se faataʻitaʻiga, na maua se tusi tāʻai o le tusi o Isaia i Tusi Tāʻai o le Sami Mate, ma e 1,000 tausaga e umi atu ai lenā tusi tāʻai i lo o tusitusiga na maua i se taimi muamua atu. E faapefea ona faatusatusa mai i tusitusiga o loo iai i aso nei? “E seāseā iai se upu e faaopoopo pe aveese.”—The Book. A History of the Bible.

Ua faigofie ona iloa ma toe faasaʻo mea sesē na faia e i latou e leʻi faaeteete i le auala na toe tusia ai le Tusi Paia. O na mea sesē e aofia ai le toe faatulaga o mataʻitusi, upu, po o faaupuga. “E leai se tuufaatasiga o tusitusiga anamua o loo maua ai le tele o faamaoniga ua tusitusia nai lo o le Feagaiga Fou.”—The Books and the Parchments.

“O se matuā faamautinoaga mo i latou e iai masalosaloga i le Tusi Paia, le toeitiiti tutusa lelei o tusitusiga anamua o le Tusi Paia mai i Aikupito, ma tusitusiga ua tele taimi na kopiina ma lomia ai i Europa.”—The Book. A History of the Bible.

Po ua suia la le feʻau o le Tusi Paia? O le mea moni, e leai.