E te Silafia?

O le ā le masaniga a tagata Iutaia na māfua ai ona taʻusala e Iesu le tautō i se mea?

E TUSA ai ma le Tulafono a Mose, na mafai ona tautō tagata Isaraelu i se mea. Peitaʻi, na matuā taatele i le vaitaimi o Iesu le tautō o tagata i aso uma ina ia faamaonia ai le toetoe o so o se faamatalaga na latou faia. Na latou faia lenei masaniga lē lelei ina ia faatalitonu ai isi i a latou tala. Peitaʻi, na faalua ona taʻusalaina e Iesu lenei faiga. Na fetalai o ia: “A ia avea la outou upu o le Ioe, ia Ioe; ma le Leai, ia Leai.”​—Mata. 5:33-37; 23:16-22.

O loo taʻua i le tusi Theological Dictionary of the New Testament e faapea, na matuā malosi le “faanaunauga o tagata Iutaia ina ia faamaonia a latou faamatalaga uma e ala i le tautō i se mea.” E lagolagoina lenā manatu i se Tusi Tulafono a Iutaia e taʻua o le Talmud, lea o loo matuā auʻiliʻili mai ai mea e tautō ai e tatau ona tausia, ma mea e tautō ai e lē manaʻomia ona tausia.

E lē na o Iesu na taʻusalaina lenei masaniga lē lelei. O se faaaʻoaʻoga, na taʻua e Flavius Josephus, o se tusitala o le talafaasolopito a Iutaia e faatatau i le lotu Iutaia: “Na manatu tagata i le lotu Iutaia o le tautō i se mea, e sili atu ona leaga nai lo o le pepelo. O lo latou manatu afai e tatau ona tautō se tasi ina ia faatalitonu ai isi i ana tala, o lona uiga la e pepelo lenā tagata.” Ua faapea mai foʻi le tusi faa-Iutaia e taʻua o le Wisdom of Sirach: “E matuā solitulafono se tagata e tautō i se mea.” O lea, na taʻusalaina e Iesu le manatu māmā i le tautō i se mea. Pe afai e tatou te faamaoni i taimi uma i a tatou faamatalaga, e lē manaʻomia fua la ona tatou tautō i se mea ina ia faatalitonu ai tagata.