Fesili Mai le ʻAufaitau
O le ā le manatu o le Tusi Paia e faatatau i le faia o se tautoga?
O le tautoga e uiga atu i le faia o se “folafolaga aloaʻia i le faataunuuina o se mea na e folafolaina atu, ma e masani ona taʻua ai le Atua o se molimau.” E mafai ona tuugutu pe tusia se tautoga.
E manatu nisi e sesē le faia o se tautoga ona na fetalai mai Iesu: “Aua e te tautō . . . A ia avea la outou upu o le Ioe, ia Ioe; ma le Leai, ia Leai; o ni upu e sili i na upu e mai i lē o leaga.” (Mata. 5:33-37) Na silafia e Iesu na manaʻomia ona fai ni tautoga i le Tulafono a Mose, ma na faia foʻi e auauna faamaoni a le Atua tautoga. (Kene. 14:22, 23; Eso. 22:10, 11) Na ia silafia foʻi na faia e Ieova ni tautoga. (Epe. 6:13-17) O lea la e leʻi uiga atu Iesu e lē tatau ona tatou faia se tautoga. Ae na ia lapataʻia le faia o ni tautoga i mea e leai se tāua ma e leai se uiga. E tatau ona tatou vaai i le tausia o a tatou upu o se tiute tauave paia. E tatau ona tatou faataunuuina a tatou folafolaga.
O le ā e tatau ona tatou faia pe a faatonuina i tatou e faia se tautoga? Muamua, ia faamautinoa e mafai ona e faia mea e te tautō ai. Pe a e lē mautinoa, e sili ai le lē faia o se tautoga. Ua lapataʻi mai le Afioga a le Atua: “E sili ona lelei ona e lē tautō nai lo o lou tautō ae e lē avatua.” (Fai. 5:5) Lona lua, iloilo mataupu silisili o le Tusi Paia e fesootaʻi atu i lenā tautoga, ma gaoioi e tusa ai ma lou lotofuatiaifo ua aʻoaʻoina. O ā nisi o na mataupu silisili faale-Tusi Paia?
O nisi tautoga e talafeagai ma le finagalo o le Atua. O se faataʻitaʻiga, e faia e Molimau a Ieova ni tautoga pe a faaipoipo. E tautō le tama ma le teine faaipoipo i luma o le Atua ma i latou e molimauina le faaipoipoga, o le a la alolofa, tausia, ma faaaloalo le tasi i le isi ma e la te faia faapea “po o le ā lava le umi e ola ai.” (O nisi ulugalii atonu e la te lē tautō i upu o loo taʻua i luga, ae e la te faia lava se tautoga i luma o le Atua.) Pe a māeʻa ona la faia le tautoga, ona faasilasila loa lea ua avea nei i laʻua ma tane ma avā ma ua fusia i laʻua i le liʻo o le faaipoipoga i o la olaga atoa. (Kene. 2:24; 1 Kori. 7:39) E talafeagai lenei faatulagaga ma le finagalo o le Atua.
O nisi tautoga e feteenaʻi ma le finagalo o le Atua. E lē faia e se Kerisiano moni se tautoga ina ia tau mo lona atunuu, pe faafitia lona faatuatua i le Atua. O na tautoga e solia ai tulafono a le Atua. “E lē o ni tagata o le lalolagi” Kerisiano, o lea e lē tatau ona aafia i fefinauaʻiga ma taua a le lalolagi.—Ioa. 15:19; Isa. 2:4; Iako. 1:27.
O nisi tautoga e fua i o tatou lotofuatiaifo. E i ai taimi e manaʻomia ona tatou faaaogā ai le mataupu silisili na taʻua e Iesu, “ia totogi atu mea a Kaisara iā Kaisara, a o mea a le Atua ia avatu i le Atua” e iloilo lelei ai se tautoga.—Luka 20:25.
Seʻi faapea ua talosaga se Kerisiano mo se tusi folau pe avea ma sitiseni o se atunuu, ma e manaʻomia ona ia faia se tautoga o le faamaoni i lenā atunuu. Pe afai o lenā tautoga e manaʻomia ona faia ai e se Kerisiano se gaoioiga e solia ai tulafono a le Atua, e lē faatagaina la o ia e lona lotofuatiaifo ua aʻoaʻoina e le Tusi Paia e faia lenā tautoga. Atonu e faataga e le malo lenā Kerisiano e suia upu o le tautoga, ina ia ōgatusa ma lona lotofuatiaifo.
O le faia o se tautoga o le faamaoni ua uma ona toe fetuunaʻi faaupuga, e ono talafeagai ma le mataupu silisili o loo i le Roma 13:1, ua faapea mai: “Ia gauaʻi tagata uma i faipule silisili.” O lea la e ono filifili se Kerisiano, e lē sesē le tautō e fai se mea ua uma ona faatagaina i tatou e le Atua e fai.
E tāua foʻi lo tatou usiusitaʻi i o tatou lotofuatiaifo ua uma ona aʻoaʻoina, pe a faatonuina i tatou e faaaogā se mea po o le faia o se gaoioiga a o faia se tautoga. Na tautō tagata Roma anamua ma tagata Sekutia i a latou pelu, e talosagaina ai le malosi o se atua o taua, ina ia faamautinoa e maufaatuatuaina se tagata. E sii e tagata Eleni o latou lima i le lagi pe a fai a latou tautoga. O le faia faapea ua latou faaalia ai, e iai se atua malosi o loo ia mātauina tala ma gaoioiga o loo faia ma e tali atu tagata iā te ia.
O le mea moni e lē tautō se auauna a Ieova i se tagāvai a so o se atunuu e fesootaʻi atu i tapuaʻiga sesē. Ae faapefea pe a talosagaina oe e se fale faamasino e tuu lou lima i luga o se Tusi Paia, ma tautō o le a e taʻuina atu le mea moni? I lenā tulaga atonu e te filifili e faia faapea, talu ai o loo taʻua i le Tusi Paia auauna faamaoni a Ieova na faia se tautoga a o faia se gaoioiga. (Kene. 24:2, 3, 9; 47:29-31) E tāua lou manatuaina pe a e faia se tautoga faapena, ua e tautō ai i luma o le Atua e taʻu atu le mea moni. E manaʻomia ona e sauniuni e avatu ni tali moni i so o se fesili e ono fesiligia ai oe.
Talu ai e tāua iā i tatou la tatou faiā ma Ieova, e tatau la ona tatou tatalo ma iloilo lelei so o se tautoga e talosagaina i tatou e fai. Ia faamautinoa o le a lē faaleagaina ai o tatou lotofuatiaifo, pe solia ai mataupu silisili o le Tusi Paia. Pe a e filifili e faia se tautoga, e tatau ona faamautinoa e te faataunuuina.—1 Pete. 2:12.