“E Olioli Lē e Amiotonu iā Ieova”

UA SILIA i le 80 tausaga o Diana, ma na aafia lana tane i le gasegase e taʻua o le alzheimer. A o leʻi maliu lana tane, na iai o ia i se fale e tausia ai tagata matutua mo ni nai tausaga. Na maliliu foʻi le fanau tama e toʻalua a Diana. E lē gata i lea, sa aafia o ia i le kanesa o le susu. Peitaʻi, o taimi uma e feiloaʻi ai uso ma tuafāfine iā Diana i le Maota mo Sauniga po o le talaʻiga, e latou te mātauina pea ona laufofoga fiafia.

Na avea John o se ovasia femalagaaʻi mo le silia i le 43 tausaga. Na matuā fiafia o ia i lenā vala o le auaunaga. Peitaʻi, e leʻi toe avea o ia o se ovasia talu ai sa manaʻomia ona ia tausia se tasi o ona tauaiga ua maʻi. O le taimi lenei, o loo auauna John i se faapotopotoga i la latou vaipanoa. Pe a feiloaʻi John ma ē sa latou masani i le taimi ua teʻa i se fonotaga po o se tauaofiaga, e latou te maofa ona e lē o suia ona uiga, ma o loo olioli pea.

Aiseā o loo olioli ai pea Diana ma John? E faapefea ona olioli pea se tasi o loo mafatia i le itu tau faalogona ma le itu faaletino? E faapefea i se tagata e lē o toe auauna i se tofiga na fiafia i ai ona maua pea le olioli? Ua faapea mai le Salamo 64:10, “E olioli lē e amiotonu iā Ieova.” E mafai ona tatou manino atili i le uiga o lenā manatu tāua, pe a tatou malamalama i le uiga o le olioli moni.

LE OLIOLI E LĒ TUMAU

E iai mea e mafai ona tatou maua ai le tele o le olioli. O se faataʻitaʻiga, o se alii ma se tamaʻitaʻi o loo tulimata‘ia le aso e faaipoipo ai, le mauaina o se pepe fou, po o le mauaina foʻi o ni faaeaga i le faapotopotoga. O nei mea e maua ai le olioli, auā o vala masani na o le olaga na faatulaga e Ieova. Na ia faavaeina le faaipoipoga, foafoaina le tagata ina ia mafai ona fanafanau, ma tuuina mai foʻi tofiga i le faapotopotoga Kerisiano.​—Kene. 2:18, 22; Sala. 127:3; 1 Timo. 3:1.

Peitaʻi, e iai mea e mafai ona aveesea ai lo tatou olioli. O se faataʻitaʻiga, pe a lē faamaoni se tasi o le paaga pe maliu foʻi. (Eseki. 24:18; Ho. 3:1) E iai fanau e lē usiusitaʻi i o latou mātua ma le Atua, ma atonu e iʻu ai lava ina faateʻaina. E leʻi auauna atalii o Samuelu iā Ieova i le auala e na te taliaina, ma o gaoioiga a Tavita na faapogaia ai puapuaga i totonu o lona aiga. (1 Samu. 8:1-3; 2 Samu. 12:11) O na tulaga e aumaia ai faanoanoaga ma mafatiaga, ae e lē o le olioli.

I se tulaga talitutusa, e mafai foʻi ona lē toe galulue nisi i se faaeaga i le auaunaga ona o le faalētonu o le soifua mālōlōina, tiute tauave i le aiga, po o le suia o faaeaga. O le toʻatele na aafia i na suiga, ua ta‘utino mai lo latou misia o le fiafia sa maua mai i se vala o le auaunaga na galulue ai.

O lea, e iai mea e lē mafai ona aumaia iā i tatou le olioli tumau. Pe e iai la se isi ituaiga o olioli e tumau pea e tusa pe e suia le tulaga o mea? E mautinoa e iai, auā sa tumau pea ona olioli Samuelu, Tavita, ma isi e ui i tulaga faigatā.

LE OLIOLI E TUMAU

O le mea moni, sa olioli Iesu. A o sologa lelei lona soifuaga i le lagi, ‘na fiafia o ia i taimi uma i luma’ o Ieova. (Faata. 8:30) Peitaʻi, ina ua afio mai i le lalolagi, e iai taimi na feagai ai o ia ma faafitauli ogaoga. E ui i lea, sa ia maua pea le fiafia i le faia o le finagalo o lona Tamā. (Ioa. 4:34) Ae e faapefea le taimi ua lata ina maliu ai o ia? Ua faapea mai le Eperu 12:2: “Ona o le olioli sa i ona luma, na tumau ai o ia e ui ina faapuapuagatia i le laau.” Ua talafeagai la ona tatou iloiloina fetalaiga e lua a Iesu e faatatau i le olioli moni.

I se tasi taimi ina ua toe foʻi mai soo e toʻa 70 mai i se talaʻiga faapitoa, na latou olioli ona o galuega mamana sa latou faia, e oo lava i le tutuliesea o temoni. Na fetalai atu Iesu iā i latou: “Aua ne‘i o outou olioli i lenei mea, ina ua usiusita‘i agaga iā te outou. Ae ia olioli ona ua tusia o outou igoa i le lagi.” (Luka 10:1-9, 17, 20) Ioe, e sili atu ona tāua le mauaina o le finagalo malie o Ieova, nai lo o le olioli ona o se faaeaga faapitoa. E manatua pea e Ieova na soo faamaoni, ma o se tasi lea o māfuaaga e matuā olioli ai.

I se isi mea na tupu, na fetalai atu ai Iesu i le motu o tagata. Na faapea mai se fafine Iutaia, e mautinoa le matuā fiafia o le tinā o Iesu ona o le mata‘ina o le aʻoaʻo a lana tama. Ae na faasaʻo o ia e Iesu e ala i le faapea atu: “E leai, Amuia i latou e faalogo i le afioga a le Atua ma tausi i ai!” (Luka 11:27, 28) O se mea matagofie pe a iai se mea e mitamita ai se matua. Peitaʻi, o le iai o se faiā ma Ieova ona o le usiusitaʻi, o se māfuaaga lea e sili atu ona olioli ai.

Ioe, ina ia maua le olioli moni, e mana‘omia ona maua le finagalo malie o Ieova. E ui e lē o se mea e fiafia ai pe a feagai ma faigatā, ae e lē mafai ona aveesea ai lo tatou olioli. Peitaʻi, o lo tatou tutumau faamaoni e ui i na faigatā, o le a tatou manumalo ai ma faatumulia ai o tatou loto i le olioli. (Roma 5:3-5) E foaʻi mai foʻi e Ieova lona agaga i ē e maufaatuatuaina o ia, ma o se tasi o vala o le fua o lona agaga o le olioli. (Kala. 5:22) Ua fesoasoani lenā manatu e tatou te malamalama ai i le faamatalaga a le Salamo 64:10 e faapea: “E olioli lē e amiotonu iā Ieova.”

O le māfuaaga lenā na tumau ai pea le olioli o Diana ma John e ui i tulaga faigatā. Ua faapea mai Diana: “Na ou sulufa‘i atu iā Ieova, e pei ona faia e se tamaitiiti i lona matua.” E faapefea ona ia iloa o loo ia maua le finagalo malie o le Atua? Na taʻua e Diana: “Ua ia faamanuiaina aʻu e ala i le foaʻi mai o le malosi e talaʻi ai pea ma le olioli.” E ui e lē o toe auauna John o se ovasia femalagaaʻi, ae o lana faamatalaga lenei i le mea o loo matuā fesoasoani iā te ia ina ia talaʻi ai pea: “Talu mai le 1998 ina ua tofia aʻu e avea ma faiaʻoga i le Aʻoga mo Toleniga i le Faiva, ua tele atu le taimi ua ou faaalu e faia ai aʻu lava suʻesuʻega.” Ua toe faapea mai o ia e faatatau iā i laʻua ma lana avā: “Na faigofie ona ma talia lenā suiga, ona o le iai pea o se vaaiga saʻo e tusa po o le ā le vala o le auaunaga e ma te auauna ai iā Ieova. E ma te leʻi salamō i le faia o lenā filifiliga.”

Ua tofo foʻi le toʻatele i le moni o upu o loo i le Salamo 64:10. O se faataʻitaʻiga, o se ulugalii sa auauna i le Peteli i le Iunaite Setete mo le silia ma le 30 tausaga. Na tofia i laʻua i le fanua e auauna ai o ni paeonia faapito. Na la ta‘utino mai: “O se faalogona masani le faanoanoa pe a aveese se mea e pele iā te oe. Peitaʻi, e lē tatau ona e faanoanoa ai pea.” Na vave ona la pisi i le faiva faatasi ma le faapotopotoga. Na toe faaauau le la faamatalaga: “E iai ni mea patino na ma tatalo ai. Ina ua ma vaaia le tali mai o Ieova i a ma tatalo, na faalaeiauina ai i ma‘ua ma na maua ai le olioli. E leʻi umi talu ona ma iai i le faapotopotoga, ae amata foʻi ona paeonia isi, ma faamanuiaina i ma‘ua i ni suʻesuʻega faale-Tusi Paia se lua o loo agaʻigaʻi pea i luma faaleagaga.”

“FIAFIA E FAAVAVAU”

O le mea moni, e lē faigofie ona olioli pea i taimi uma, auā e iai taimi e lē sologa lelei ai mea. Peitaʻi, e faalaeiauina i tatou i upu faagaeeina i le Salamo 64:10. E iai taimi e tatou te lagona ai le lotovaivai, ae e tatou te mautinoa o ē e faamaonia i latou lava o ni ‘ē e amiotonu’ e ala i le faamaoni pea e ui ina suia o latou tulaga, o le a ‘olioli iā Ieova.’ E tatou te tulimataʻia foʻi le faataunuuga o le folafolaga a Ieova e faatatau i “le lagi fou ma le lalolagi fou.” O le taimi lenā o le a aveesea atoatoa ai le tulaga lē lelei atoatoa. O le a “olioli ma fiafia e faavavau” tagata uma o le Atua i mea o le a ia faia ma saunia.​—Isa. 65:17, 18.

Seʻi faaāta le taimi o le a tatou maua ai le soifua mālōlōina lelei atoatoa, ma alafa‘i mai i taeao taʻitasi e lagona le malosi. Po o ā lava o tatou mafatiaga tau i faalogona sa iai i le taimi ua mavae, o le a lē toe manatua na mea. E tatou te mautinoa “e lē toe manatua mea sa iai muamua, e lē toe alu a‘e fo‘i i le loto.” I le taimi e toetutū mai ai ē ua maliliu, o le a latou toe feiloaʻi ai ma ē e pele iā i latou. O le a oo i le faitau miliona lagona e pei o lagona o mātua o le teineitiiti e 12 tausaga na toe faatūina mai e Iesu e faapea: “Ona matuā olioli ai lea o i la‘ua.” (Mare. 5:42) Ioe, o le a avea tagata uma o ni ‘ē e amiotonu,’ ma o le a ‘olioli iā Ieova’ e oo i le faavavau.