O ā Mea o le a Faia e le Atua?

Pe a e feagai ma faafitauli, ma le mautinoa e te faatalitalia se uō lelei e gaoioi e fesoasoani iā te oe. E tusa ai ma lenā tulaga, ua faapea mai nisi tagata o le Atua e lē o se uō auā e lē o fesoasoani mai. Peitaʻi o le mea moni, e lē gata ua faataunuuina e le Atua le tele o mea mo lo tatou lelei, ae o le a ia gaoioi foʻi e fesoasoani mai i faafitauli ma mafatiaga e tatou te fesagaʻia i aso nei. O ā mea o le a faia e le Atua?

TAFIESEA LE AMIOLEAGA

O le a tafiesea e le Atua le amioleaga e ala i le faaumatia o le puna o le amioleaga. O loo taʻua i le Tusi Paia lenā puna e faapea: “O le lalolagi atoa o loo nofo toʻilalo i le pule a lē o loo leaga.” (1 Ioane 5:19) O “lē o loo leaga” lea na taʻua foʻi e Iesu o “le pule o lenei lalolagi,” o Satani le Tiapolo. (Ioane 12:31) O taaʻiga a Satani i le lalolagi o tagata, ua avea ma pogai autū o le tele o tulaga mafatia o le lalolagi. O le ā o le a faia e le Atua?

O le a gaoioi Ieova le Atua e ala mai i lona Alo o Iesu Keriso, e ʻfaaumatia lē ua iai le malosi e faaoo ai le oti, o le Tiapolo lea.’ (Eperu 2:14; 1 Ioane 3:8) O le mea moni, o loo taʻua i le Tusi Paia ua iloa lelei e le Tiapolo “ua puupuu lona taimi” a o leʻi oo atu i lona faaumatiaga. (Faaaliga 12:12) O le a faaumatia foʻi e le Atua i latou uma e faia le amioleaga.—Salamo 37:9; Faataoto 2:22.

IA AVEA LE LALOLAGI MA PARATAISO

Pe a uma ona aveesea le amioleaga mai i le lalolagi, ona gaoioi lea o Lē na foafoaina mea, ina ia faataunuu lona finagalo mo tagata ia ola e faavavau i se lalolagi parataiso. O le ā e tatou te tulimataʻia?

Le filemu ma le saogalemu e faavavau. “O ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu.”—Salamo 37:11.

Le fau ma soloi o meaʻai mālōlōina. “O le a tele saito i le laueleele; o le a fau ma soloi i tumutumu o mauga.”—Salamo 72:16.

O fale lelei ma galuega faamalieloto. “O le a latou fausia fale ma nonofo ai; e latou te totō foʻi togāvine ma aai i ona fua. . . . O le a matuā fiafia uma oʻu tagata ua filifilia i galuega a o latou lima.”—Isaia 65:21, 22.

Pe e te lē naunau e fia vaai atu i na tulaga? Ua toeitiiti ona avea lea ma mea e masani ai tagata.

SOLOIESEA FAAMAʻI MA LE OTI

E oo uma lava i tagata i aso nei le maʻi ma le oti, ae ua toeitiiti ona lē toe iai lea o na mea. O le a faaaogā atoatoa e le Atua le taulaga togiola a Iesu “ina ia lē fano tagata uma e faatuatua iā te ia, ae ia maua le ola e faavavau.” (Ioane 3:16) O le ā o le a iʻu i ai?

O le a aveesea maʻi. “E lē fai mai foʻi se tasi ua nofo ai: ʻOu te maʻi.’ O le a faamagaloina agasala a i latou o loo nonofo i le laueleele.”—Isaia 33:24.

O le a lē toe mafatia tagata ona o le oti. “O le a faaumatia e ia le oti e faavavau, o le a soloiesea foʻi e le Alii Pule Silisili Ese o Ieova loimata mai i mata uma.”—Isaia 25:8.

O le a ola e faavavau tagata. “O le meaalofa a le Atua o le ola e faavavau lea, e ala iā Keriso Iesu lo tatou Alii.”—Roma 6:23.

O le a faatutūina mai i latou ua maliliu. “E toetutū mai tagata amiotonu ma tagata amiolētonu.” (Galuega 24:15) O le a latou maua aogā atoatoa mai i le meaalofa a le Atua o le togiola.

O le a faapefea ona faataunuuina e le Atua nei mea uma?

FAATŪINA O SE FAIGĀMALO LELEI ATOATOA

O le a faataunuuina le finagalo o le Atua mo tagata ma le lalolagi, e ala mai i se faigāmalo i le lagi lea ua tofia ai Iesu Keriso e avea ma Pule. (Salamo 110:1, 2) O le faigāmalo lea na aʻoaʻo ai e Iesu ona soo e tatalo i upu nei: “Lo matou Tamā e o i le lagi, . . . ia oo mai lou Malo.”—Mataio 6:9, 10.

O le a pule le Malo o le Atua i le lalolagi ma aveesea tigā ma mafatiaga uma o loo iai. O lenei Malo o se faigāmalo silisili lea e mafai ona maua e tagata. O le māfuaaga lea na maelega ai Iesu e talaʻi “le tala lelei o le Malo” a o iai i lana faiva i le lalolagi, ma faatonu ona soo ina ia faia faapea.—Mataio 4:23; 24:14.

O le alofa tele o Ieova le Atua mo tagata, ua ia folafola mai ai o le a ia faataunuuina nei mea matagofie mo i latou. Pe e lē avea lenā mea ma māfuaaga e te fia faalatalata atu ai i le Atua ma iloa lelei o ia? E faapefea ona aogā iā te oe le faia faapea? O le a talanoaina i le mataupu o loo sosoo mai lenā manatu.